ອຸດສາຫະກຳທ່ອງທ່ຽວ ຕ້ອງອາໄສໄລຍະຍາວ ບໍ່ແມ່ນໂກບໂກຍເອົາຫວັງໄດ້ກິນເທື່ອດຽວ

- 2cf24854 9945 4969 87e9 61a8c550a651 - ອຸດສາຫະກຳທ່ອງທ່ຽວ ຕ້ອງອາໄສໄລຍະຍາວ ບໍ່ແມ່ນໂກບໂກຍເອົາຫວັງໄດ້ກິນເທື່ອດຽວ
- 16583075379783 - ອຸດສາຫະກຳທ່ອງທ່ຽວ ຕ້ອງອາໄສໄລຍະຍາວ ບໍ່ແມ່ນໂກບໂກຍເອົາຫວັງໄດ້ກິນເທື່ອດຽວ

ໂດຍ: ທິດກໍ່າ

ນັບແຕ່ລັດຖະບານເຮົາໄດ້ເປີດປະເທດຢ່າງເປັນທາງການມາແຕ່ເດືອນພຶດສະພາ 2022 ເປັນຕົ້ນມາ ປາກົດວ່າມີນັກທ່ອງທ່ຽວຈາກຕ່າງແດນເຂົ້າມາທ່ຽວລາວນັບມື້ນັບຫລາຍຂຶ້ນ, ຄາດກະກັນວ່ານັບຈາກນີ້ໄປຖ້າບໍ່ມີໂຣຄາພະຍາດ, ໂຣກລະບາດ, ໄພທຳມະຊາດ ແລະ ບັນຫາອື່ນໆຈາກພາຍນອກມາກະທົບ ພາກອຸດສາຫະກຳການທ່ອງທ່ຽວຢູ່ລາວເຮົາຍິ່ງຈະສົດໃສ ແລະ ຈະນັບມື້ມີການພັດທະນາທີ່ດີຂຶ້ນໃນອະນາຄົດຢ່າງແນ່ນອນ. ມາຮອດວັນທີ 29 ສິງຫາ 2022 ຜ່ານມາ, ລັດຖະບານຍັງໄດ້ອະນຸຍາດໃຫ້ເປີດດ່ານປະເພນີ ແລະ ດ່ານທ້ອງຖິ່ນພາຍຫລັງໄດ້ປິດມາເປັນເວລາ 3 ປີ ອັນເນື່ອງມາຈາກການແພ່ລະບາດຂອງພະຍາດໂຄວິດ-19. ຈຸດປະສົງໃນການອະນຸຍາດນີ້ກໍເພື່ອອຳນວຍຄວາມສະດວກໃນການໄປມາເຂົ້າ-ອອກ, ການພົວພັນຊື້-ຂາຍ ແລະ ການທ່ອງທ່ຽວລະຫວ່າງປະຊາຊົນໃນເຂດນັ້ນໆໃຫ້ຫວນກັບມາມີບັນຍາກາດອັນໃໝ່ ແລະ ຄຶກຄັກອີກຄັ້ງ.

ແຕ່ແນວໃດກໍຕາມ, ໃນຄຳສັ່ງກໍໄດ້ເນັ້ນວ່າ: ຕ້ອງເອົາໃຈໃສ່ໃນການບໍລິຫານຈັດການ ໂດຍສະເພາະແມ່ນການກວດກາຄຸ້ມຄອງສິນຄ້າເຂົ້າ-ອອກ ອັນໃດຄວນຫ້າມ, ອັນໃດຄວນອະນຸຍາດຕາມກົດໝາຍ ແລະ ລະບຽບການທີ່ໄດ້ກຳນົດ. ມາຮອດປັດຈຸບັນ ເຮົາເຫັນໄດ້ວ່າສະພາບການແພ່ລະບາດຂອງພະຍາດໂຄວິດ-19 ໄດ້ຄີ່ຄາຍລົງຫລາຍແລ້ວ. ນອກຈາກນັ້ນ ສະພາບຄວາມສະຫງົບປອດໄພໃນທົ່ວປະເທດ, ຄວາມຫຍຸ້ງຍາກພາຍໃນ ເປັນຕົ້ນບັນຫານ້ຳມັນ, ບັນຫາເງິນເຟີ້ ແລະ ບັນຫາສິນຄ້າລາຄາຂຶ້ນສູງກໍຄ່ອຍໆກ້າວສູ່ຄວາມສະຫງົບ ພາຍຫລັງກອງປະຊຸມສະໄໝສາມັນຄັ້ງທີ 3 ຂອງສະພາແຫ່ງຊາດຊຸດທີ IX ເມື່ອບໍ່ດົນມານີ້.

ຈາກນີ້ເປັນຕົ້ນໄປ ເພື່ອສືບຕໍ່ຜັນຂະຫຍາຍເນື້ອໃນຈິດໃຈຂອງມະຕິຄັ້ງທີ XI ຂອງພັກ ແລະ ແຜນພັດທະນາເສດຖະກິດ-ສັງຄົມຂອງປະເທດແຕ່ລະໄລຍະໃຫ້ປາກົດຜົນເປັນຈິງຢ່າງເປັນຮູບປະທຳ ພວກເຮົາຍິ່ງຈະຕ້ອງພ້ອມກັນເຢີກໃຫ້ເປັນຂະບວນຟົດຟື້ນໃນທົ່ວພັກ, ທົ່ວກອງທັບ ແລະ ທົ່ວປະຊາຊົນບັນດາເຜົ່າ ເຊິ່ງກ່ອນອື່ນໝົດແມ່ນການຜະລິດສິນຄ້າ ແລະ ການບໍລິການທີ່ໄດ້ຂາດຫາຍມາແຕ່ໂຄວິດ-19 ເລີ່ມມີການລະບາດ.

ເຖິງຢ່າງໃດກໍດີ, ໜຶ່ງໃນພາລະກິດທີ່ຈະເຮັດໃຫ້ພວກເຮົາມີເງິນເຕັມໄຖ່ເຕັມຖົງນັ້ນ ກໍຄືເລັ່ງພັດທະນາພາກອຸດສາຫະກຳການທ່ອງທ່ຽວໃຫ້ແຂງແຮງ ແລະ ໝັ້ນຄົງ. ຫາກຕັ້ງໂຈດກັນວ່າ: ປັດໄຈທີ່ຈະດຶງດູດເອົານັກທ່ອງທ່ຽວ, ແຂກຕ່າງດ້າວທ້າວຕ່າງແດນເຂົ້າມາທ່ຽວລາວນັ້ນມີຫຍັງແດ່. ອັນທີໜຶ່ງຄືປະເທດລາວຄົນລາວມີພື້ນຖານປະເພນີວັດທະນະທຳທີ່ດີງາມອ່ອນຊ້ອຍ, ອັດທະຍາໄສໄມຕີຈິດສືບທອດກັນມາແຕ່ຍຸກອະລິຍະທຳລ້ານຊ້າງ. ອັນສອງກໍແມ່ນລາວເຮົາມີທຳມະຊາດ, ອາກາດ ແລະ ສິ່ງແວດລ້ອມທີ່ດີ, ມີພູຜາປ່າໄມ້, ແມ່ນ້ຳລຳເຊ, ຖ້ຳຮູພູເຂົາທີ່ຫລາກຫລາຍສະຫລັບສັບຊ້ອນ. ຈາກຈຸດພິເສດດັ່ງກ່າວຈຶ່ງພາໃຫ້ເກີດມີຄວາມສົດຊື່ນປອດໃສ, ມີນ້ຳຕົກຕາດໂຕນຄອນ ກາຍເປັນແຫລ່ງທ່ອງທ່ຽວທີ່ຫາໄດ້ຍາກໃນພາກພື້ນນີ້. ສ່ວນປັດໄຈອັນສຸດທ້າຍໃນປັດຈຸບັນລາວເຮົາພວມມີໃບໜ້າໃໝ່ ຄືມີລົດໄຟຄວາມໄວສູງ ລາວ-ຈີນ ເຊິ່ງກາຍເປັນປັດໄຈຕົວເຕັງເພື່ອດຶງດູດເອົານັກທ່ອງທ່ຽວເຂົ້າມາທ່ຽວລາວຫລາຍລ້ານເທື່ອຄົນໃນປີໜຶ່ງໆ. ຈາກສາມປັດໄຈພື້ນຖານນີ້ ຈະສ້າງເງື່ອນໄຂໃຫ້ນັກທ່ອງທ່ຽວຈາກຕ່າງແດນເຂົ້າມາທ່ຽວເມືອງລາວນັບມື້ຫລາຍຂຶ້ນໃນແຕ່ລະປີ.

ແນວໃດກໍຕາມ, ສິ່ງທີ່ໜ້າເປັນຫ່ວງນັ້ນມັນກໍມີບັນຫາຄາໃຈ ຄືການບໍລິຫານຈັດການເພື່ອເອື້ອອຳນວຍໃຫ້ແຂກຄົນມີຄວາມພໍໃຈກັບປະເທດລາວ. ອັນສຳຄັນແມ່ນຄວາມເຫັນແກ່ໄດ້ໃນມື້ໜຶ່ງຍາມດຽວ ເວລາເຫັນແຂກມາໃຊ້ບໍລິການຫລາຍ ເພິ່ນມັກຫລອຍຂຶ້ນລາຄາຕາມໃຈໂດຍບໍ່ຄຳນຶງເຖິງຄວາມເປັນມາດຕະຖານ ຫລື ລະບຽບກົດໝາຍ ດັ່ງນັກທ່ອງທ່ຽວບາງລາຍໄດ້ຈົ່ມທຸກເວລາມາທ່ຽວລາວໃນສື່ອອນລາຍຜ່ານມານັ້ນແລ !.

- lattana banner - ອຸດສາຫະກຳທ່ອງທ່ຽວ ຕ້ອງອາໄສໄລຍະຍາວ ບໍ່ແມ່ນໂກບໂກຍເອົາຫວັງໄດ້ກິນເທື່ອດຽວ
-    AD conten website - ອຸດສາຫະກຳທ່ອງທ່ຽວ ຕ້ອງອາໄສໄລຍະຍາວ ບໍ່ແມ່ນໂກບໂກຍເອົາຫວັງໄດ້ກິນເທື່ອດຽວ
- lattana banner 1 - ອຸດສາຫະກຳທ່ອງທ່ຽວ ຕ້ອງອາໄສໄລຍະຍາວ ບໍ່ແມ່ນໂກບໂກຍເອົາຫວັງໄດ້ກິນເທື່ອດຽວ
No comments yet! You be the first to comment.

Leave a Reply

Your email address will not be published.

This site uses Akismet to reduce spam. Learn how your comment data is processed.

error: Alert: ເນື້ອຫາຂ່າວມີລິຂະສິດ !!