ກຽມທົດລອງປ່ອຍຍຸງລາຍທີ່ມີເຊື້ອໂວບັກເຄຍ ໄປປະສົມພັນກັບຍຸງລາຍທີ່ມີເຊື້ອພະຍາດ ໃຫ້ກາຍເປັນຍຸງບໍ່ມີເຊື້ອອັນຕະລາຍ

ທ່ານນາງ ພຸດມະນີ ທຳມະວົງ ຜູ້ຈັດການໂຄງການ ຄວບຄຸມປະຊາກອນຍຸງໂລກ ປະຈຳອົງການຊ່ວຍເຫລືອເດັກສາກົນ ປະຈຳລາວ ໄດ້ລາຍງານ ກອງປະຊຸມວິຊາການດ້ານການໂຄສະນາສື່ສານຜ່ານສື່ມວນຊົນ ແລະ ການມີສ່ວນຮ່ວມໂຄງການທົດລອງການຈັດຕັ້ງປະຕິບັດ ວິທີການນຳໃຊ້ຍຸງລາຍບ້ານ  ໃນວັນທີ 19 ມັງກອນ 2023 ວ່າ:

ຍຸງລາຍບ້ານທີ່ມີເຊື້ອ ໂວບັກເຄຍ ມີພູມຕ້ານທານທີ່ສາມາດຢຸດຢັ້ງເຊື້ອໄວຣັສພາຍໃນໂຕມັນເອງ, ເວລາຍຸງດັ່ງກ່າວໄປກັດຜູ້ປ່ວຍໄຂ້ຍຸງລາຍ ຫລື ພະຍາດອື່ນໆ ທີ່ມີຍຸງລາຍເປັນພາຫະນຳເຊື້ອ ຈະບໍ່ສາມາດສົ່ງຕໍ່ພະຍາດດັ່ງກ່າວໄດ້.
ຜ່ານການຄົ້ນຄວ້າວິໄຈໂຄງການຄວບຄຸມປະຊາກອນຍຸງໂລກ ສະແດງໃຫ້ເຫັນວ່າ ການປ່ອຍຍຸງລາຍບ້ານ ທີ່ມີເຊື້ອໂວບັກເຄຍ ຈະສາມາດຫລຸດຜ່ອນ ການສົ່ງຕໍ່ເຊື້ອໄຂ້ຊະນິດດັ່ງກ່າວໄດ້ ເບື້ອງຕົ້ນຈະນຳເອົາຍຸງລາຍບ້ານທີ່ຖືເຊື້ອ ໂວບັກເຄຍ ໄປປ່ອຍໃນເຂດພື້ນທີ່ ທີ່ມີການລະບາດຂອງໄຂ້ຍຸງລາຍ ເພື່ອໃຫ້ມີການປະສົມພັນກັບຍຸງທະມະຊາດ ຈະເຮັດໃຫ້ຈໍານວນຍຸງທີ່ມີເຊື້ອໂວບັກເຄຍ ແຜ່ຂະຫຍາຍເພີ່ມຂຶ້ນ ແລະ ມີຄວາມປອດໄພຕໍ່ຄົນ, ສັດ ແລະ ສິ່ງແວດລ້ອມ.

ເບື້ອງຕົ້ນຄາດວ່າຈະທົດລອງ ຢູ່ເມືອງຈັນທະບູລີ ແລະ ເມືອງໄຊເສດຖາ ໃນ 32 ບ້ານ, ໃ້ເວລາທົດລອງປ່ອຍ 20 ອາທິດ ໃນພື້ນທີ່ 50×50 ແມັດ/ຈອກປ່ອຍຍຸງ 1 ໜ່ວຍ. ໄລຍະປ່ອຍຍຸງ ແລະ ຫລັງປ່ອຍຍຸງ ປະຊາຊົນ ຫລື ແຕ່ລະຄົວເຮືອນ ສາມາດປະຕິບັດມາດຕະການ ປ້ອງກັນ ແລະ ຄຸ້ມຄອງພາຫະນະນຳເຊື້ອຕາມປົກກະຕິ ໝາຍຄວາມວ່າ ປະຊາຊົນສາມາດທຳລາຍແຫລ່ງແພ່ພັນຍຸງໄດ້ ແຕ່ຫ້າມທຳລາຍຈອກບັນຈຸຍຸງຂອງໂຄງການຢ່າງເດັດຂາດ.

ເຖິງຢ່າງໃດກໍຕາມ ພວກເຮົາບໍ່ສາມາດຮູ້ ຫລື ຈໍາແນກຍຸງລາຍບ້ານ ທີ່ມີເຊື້ອ ແລະ ຍຸງລາຍບ້ານທີ່ບໍ່ມີເຊື້ອໄດ້ ດ້ວຍການສໍາຜັດ ຫລື ເບິ່ງດ້ວຍຕາເປົ່າ ນອກຈາກການເອົາຕົວຢ່າງຍຸງໄປເຮັດການວິໄຈຢູ່ຫ້ອງທົດລອງ (ຫ້ອງແລັບ) ເຊິ່ງທີມງານວິຊາການ ຈະລົງຕິດຕາມກວດກາຜົນທຸກໆ 2 ອາທິດ ແລະ ຫລັງປ່ອຍຍຸງ ຈະສືບຕໍ່ລົງຕິດຕາມຜົນທຸກໆ 4 ອາທິດ ເພື່ອເກັບເອົາຕົວຢ່າງຍຸງລາຍບ້ານ ຢູ່ໃນພື້ນທີ່ປ່ອຍຍຸງ ແລ້ວສົ່ງໄປວິໄຈ ເພື່ອຈະຮູ້ວ່າຍຸງຢູ່ພື້ນທີ່ ປ່ອຍຍຸງນັ້ນມີເຊື້ອ ໂວບັກເຄຍ ຫລາຍໜ້ອຍສ່ຳໃດ.