ສະເປີ ປາດໜ້າ ເອຟເວີຕັນ ປິດບັນຊີຢືມ ອາເນົາ ດັນຈູມາ ຮ່ວມທີມຈົບລະດູການນີ້

ທັອດແນມ ຮັອດສະເປີ ປະກາດຢືມຕົວ ອາເນົາ ດັນຈູມາ ກອງໜ້າ ບີຢາ ຣຽວ ມາຮ່ວມທີມຈົນຈົບລະດູການນີ້ ພ້ອມເປັນການປາດໜ້າ ເອຟເວີຕັນ ນຳອີກ.

ກ່ອນໜ້ານີ້ ເອຟເວີຕັນ ບັນລຸຂໍ້ຕົກລົງກັບ ບີຢາ ຣຽວ ໃນການຢືມຕົວ ດັນຈູມາ ມາເສີມທີມແລ້ວ ແລະ ນັກເຕະກໍເດີນທາງມາກວດຮ່າງກາຍກັບ ເອຟເວີຕັນ ຮຽບຮ້ອຍ ແຕ່ຍັງບໍ່ມີການເຊັນສັນຍາໃດໆ.

ແຕ່ຢ່າງໃດກໍຕາມ ສະເປີ ກໍສາມາດເຂົ້າໄປຊີງຕົວດາວເຕະອາຍຸ 25 ປີລາຍນີ້ແບບທັນຄວັນ ແລະ ນັກເຕະກໍເບິ່ງວ່າຢາກຍ້າຍມາຫລິ້ນກັບ ສະເປີ ຫລາຍກວ່າ.

ຈົນຫລ້າສຸດກາຍເປັນ ສະເປີ ທີ່ເອົາຊະນະ ເອຟເວີຕັນ ໃນການຢືມ ດັນຈູມາ ມາເສີມທີມໃນຕະຫລາດນັກເຕະເດືອນມັງກອນນີ້ ເປັນທີ່ຮຽບຮ້ອຍແລ້ວ ດ້ວຍສັນຍາຈົນຈົບລະດູການນີ້.

ຫລັງການຍ້າຍທີມ ດັນຈູມາ ໂພສຄວາມຮູ້ສຶກຜ່ານຜ່ານທະວິດເຕີວ່າ : “ ການກ້າຄືການລົງມືເຮັດ ໄປເຮັດວຽກກັນເລີຍ ”.