ຮອງນາຍົກລັດຖະມົນຕີ, ລັດຖະມົນຕີກະຊວງການຕ່າງປະເທດ ເຂົ້າຮ່ວມກອງປະຊຸມ ສະພາປະສານງານອາຊຽນ ຄັ້ງທີ 32 ທີ່ ອິນໂດເນເຊຍ
February 4, 2023 - 11:51 AM
ວັນທີ 3 ກຸມພາ 2023 ທີ່ ຈາກາກຕາ, ອິນໂດເນເຊຍ, ທ່ານ ສະເຫລີມໄຊ ກົມມະສິດ ຮອງນາຍົກລັດຖະມົນຕີ, ລັດຖະມົນຕີກະຊວງການຕ່າງປະເທດ ໄດ້ນໍາພາຄະນະຜູ້ແທນລາວ ເຂົ້າຮ່ວມກອງປະຊຸມ ສະພາປະສານງານອາຊຽນຄັ້ງທີ 32 ໂດຍການເປັນປະທານອາຊຽນຂອງ ອິນໂດເນເຊຍ ພາຍໃຕ້ຄໍາຂວັນ ອາຊຽນມີ ຄວາມສໍາຄັນ: ສູນກາງແຫ່ງການພັດທະນາ (ASEAN Matters: Epicentrum of Growth), ມີລັດຖະມົນຕີກະຊວງການຕ່າງປະເທດ ແລະ ການຮ່ວມມື ຂອງ” ຕີມໍແລັດເຕ” ເຂົ້າຮ່ວມໃນນາມປະເທດສັງເກດ ການ.
ກອງປະຊຸມ ໄດ້ຮັບຊາບບູລິມະສິດຂອງ ອິນໂດເນເຊຍ ສໍາລັບການເປັນປະທານອາຊຽນ ສົກປີ 2023, ຄວາມຄືບໜ້າຮ່າງວິໄສທັດປະຊາຄົມອາຊຽນ ຫລັງປີ 2025 ແລະ ການຈັດຕັ້ງຜັນຂະຫຍາຍຜົນຂອງກອງປະຊຸມ ສຸດຍອດອາຊຽນຄັ້ງທີ 40 ແລະ 41. ພ້ອມນີ້, ກອງປະຊຸມ ໄດ້ເຫັນດີຮັບເອົາລະບຽບການໃນການຈັດຕັ້ງປະຕິບັດ ສະຖານະພາບເປັນປະເທດສັງເກດການຂອງ ຕີມໍແລັດເຕ ແລະ ພາລະບົດບາດຂອງໜ່ວຍງານຮັບຜິດຊອບ ການສະ ໝັກເຂົ້າເປັນສະມາຊິກອາຊຽນຂອງ ຕີມໍແລັດເຕ ແລະ ເຫັນດີຊຸກຍູ້ໃຫ້ສ້າງແຜນງານ ສໍາລັບການເຂົ້າເປັນສະມາຊິກ ສົມບູນ ອາຊຽນຂອງ ຕີມໍແລັດເຕ ໃນຕໍ່ໜ້າ.
ໃນໂອກາດເຂົ້າຮ່ວມກອງປະຊຸມໃນຄັ້ງນີ້, ທ່ານ ສະເຫລີມໄຊ ກົມມະສິດ ຮອງນາຍົກລັດຖະມົນຕີ, ລັດຖະມົນຕີກະຊວງການຕ່າງປະເທດ ພ້ອມດ້ວຍລັດຖະມົນຕີຕ່າງປະເທດອາຊຽນ ເຂົ້າຢ້ຽມຂໍ່ານັບ ທ່ານ Joko Widodo ປະທານາທິບໍດີອິນໂດເນເຊຍ ແລະ ໄດ້ຕາງໜ້າລັດຖະມົນຕີຕ່າງປະເທດອາຊຽນ ໃນນາມປະເທດປະ ທານອາຊຽນ ປີ 2024 ກ່າວສະເເດງຄວາມຂອບໃຈ ແລະ ຊົມເຊີຍ ອິນໂດເນເຊຍ ໃນການເປັນປະທານອາຊຽນ ສົກປີ 2023 ພາຍໃຕ້ຄໍາຂວັນ: “ອາຊຽນມີຄວາມສໍາຄັນ: ສູນກາງເເຫ່ງການພັດທະນາ (ASEAN Matters : Epicentrum of Growth)”.
ນອກນັ້ນ, ທ່ານຮອງນາຍົກລັດຖະມົນຕີ ສະເຫລີມໄຊ ກົມມະສິດ ພ້ອມດ້ວຍ ຄະນະ ໄດ້ພົບປະກັບ ທ່ານ ນາງ Adalijiza Magno ລັດຖະມົນຕີກະຊວງການຕ່າງປະເທດ ແລະ ການຮ່ວມມື ຕີມໍແລັດເຕ ເພື່ອເເລກປ່ຽນຄໍາຄິດເຫັນ ແລະ ປຶກສາຫາລື ກ່ຽວກັບການຮ່ວມມືໃນຂອບສອງຝ່າຍ. ໃນນີ້, ຝ່າຍ ຕີມໍແລັດເຕ ໄດ້ຕີລາຄາສູງ ແລະ ສະເເດງຄວາມຂອບໃຈຕໍ່ການສະໜັບສະໜູນຂອງ ສປປ ລາວ ຕໍ່ການສະໝັກຂອງ ຕີມໍແລັດເຕ ເຂົ້າເປັນສະມາຊິກອາຊຽນ. ພ້ອມກັນນີ້, ທ່ານຮອງນາຍົກລັດຖະມົນຕີ ສະເຫລີມໄຊ ກົມມະສິດ ກໍໄດ້ມອບຮູບເເຕ້ມ ກ່ຽວກັບ ວັດທະນະທໍາ, ຮີດຄອງປະເພນີ ແລະ ເອກະລັກອັນດີງາມຂອງຊາດ ແລະ ປະຊາ ຊົນລາວ ໃຫ້ເເກ່ ທ່ານ Kao Kim Hourn ເລຂາທິການໃຫຍ່ອາຊຽນ ເພື່ອວາງສະເເດງຢູ່ ກອງເລຂາອາຊຽນ.
