ແມນຢູ ສຽງແຕກເປັນສອງຝັ່ງ ຄວນໃຫ້ໂອກາດ ກຣີນວູດ ກັບມາລ່າຕາຂ່າຍຫລືບໍ່

ແມນເຊສເຕີ ຢູໄນເຕັດ ຕົກເປັນຂ່າວ ສຽງແຕກເປັນສອງຝັ່ງ ວ່າຄວນຈະໃຫ້ໂອກາດ ເມສັນ ກຣີນວູດ ທີ່ຫາກໍພົ້ນຜິດ ຄະດີພະຍາຍາມຂົ່ມຂືນ ບີບບັງຄັບ ແລະ ທຳຮ້າຍຮ່າງກາຍອະດີດແຟນສາວ ກັບມາລົງສະໜາມໃຫ້ທີມຫລືບໍ່.

ແລະ ຈົນຕອນນີ້ ແມນເຊສເຕີ ຢູໄນເຕັດ ກໍຍັງບໍ່ມີຄວາມຈະແຈ້ງຈະໃຫ້ໂອກາດ ກຣີນວູດ ກັບມາລົງສະໜາມໃຫ້ກັບທີມອີກຄັ້ງຫລືບໍ່ ໃນຖະແຫລງການ ບອກພຽງວ່າຈະມີການສອບສວນພາຍໃນກັບນັກເຕະອີກເທື່ອຫນຶ່ງ.

ທັງນີ້ ລາຍງານຫລ້າສຸດຈາກ ເດິ ກາດຽວ ສື່ຊື່ດັງຂອງອັງກິດລະບຸວ່າ ເວລານີ້ໃນສູນຝຶກແມນຢູ ສຽງບໍ່ເປັນເອກະພາບກັນ ແບ່ງເປັນສອງຝ່າຍ ຝັ່ງໜຶ່ງກໍຢາກຈະໃຫ້ໂອກາດ ກຣີນວູດ ກັບມາລົງສະໜາມອີກເທື່ອຫນຶ່ງ ເພາະຖືເປັນດາວຮຸ່ງທີ່ສະໂມສອນປັ້ນມາກັບມື ແລະ ຢູ່ກັບທີມມາດົນ ສ່ວນອີກຝ່າຍກໍບໍ່ເຫັນດີນຳ ເພາະສັງຄົມຈະເບິ່ງບໍ່ດີ ແລະ ພຶດຕິກຳຂອງ ກຣີນວູດ ອາດຈະສົ່ງຜົນກັບພາບລັກຂອງສະໂມສອນນຳອີກ.

ຂະນະທີ່ The Sun ອ້າງແຫລ່ງຂ່າວໃກ້ຊິດລະບຸວ່າ ກຣີນວູດ ບໍ່ຕ້ອງການຈະກັບມາຫລິ້ນໃຫ້ ແມນຢູ ອີກແລ້ວ ແລະ ກັງວົນປະຕິກິລາຈາກແຟນບານ ຫາກຕ້ອງຫລິ້ນໃນອັງກິດ.

“  ໃນເວລານີ້ ລາວບໍ່ຢາກຈະກັບມາໃສ່ເສື້ອ ແມນເຊສເຕີ ຢູໄນເຕັດ ອີກແລ້ວ ເພາະລາວຮູ້ສຶກວ່າ ສະໂມສອນບໍ່ໄດ້ຢູ່ຂ້າງລາວເລີຍໃນໄລຍະທີ່ມີບັນຫາ ລາວຄົງຈະມີຄວາມສຸກກວ່າ ຫາກໄປໃນລີກຈີນ ຕາບໃດທີ່ຍັງໄດ້ຄ່າເມື່ອຍທີ່ສູງພໍ ແລະ ໄດ້ໂອກາດລົງຫລິ້ນ ທ່າທີລາວເບິ່ງອ່ອນລົງ ແຕ່ກໍຍັງບໍ່ຄ່ອຍມີ ຄວາມສຸກຫລາຍ ”.