ລັດຖະບານຍີ່ປຸ່ນ ຊ່ວຍເຫລືອກໍ່ສ້າງອາຄານຮຽນ ແລະ ຫ້ອງນ້ຳ ຢູ່ແຂວງຈຳປາສັກ ລວມມູນຄ່າປະມານ 104.000 ໂດລາສະຫະລັດ
ລັດຖະບານຍີ່ປຸ່ນ ໄດ້ໃຫ້ການຊ່ວຍເຫລືອກໍ່ສ້າງອາຄານຮຽນ ແລະ ຫ້ອງນໍ້າໃໝ່ ຢູ່ໂຮງຮຽນມັດທະຍົມສົມບູນໂນນຍາງ ເມືອງສຸຂຸມາ ແຂວງຈຳປາສັກ ລວມມູນຄ່າປະມານ 104.000 ໂດລາສະຫະລັດ, ພ້ອມທັງສະໜອງອຸປະກອນ-ເຄື່ອງໃຊ້ ໃຫ້ໂຮງຮຽນດັ່ງກ່າວ ເພື່ອສົ່ງເສີມການສຶກສາຂອງນັກຮຽນ ແລະ ຄູອາຈານແຂວງຈຳປາສັກ, ທັງເປັນການປະກອບສ່ວນເຂົ້າໃນການປັບປຸງສະພາບແວດລ້ອມການສຶກສາ ແລະ ສະພາບສຸຂະອານະໄມຂອງໂຮງຮຽນດັ່ງກ່າວ.
ພິທີເຊັນສັນຍາໂຄງການດັ່ງກ່າວ ຈັດຂຶ້ນໃນວັນທີ 24 ກຸມພາ 2023 ທີ່ນະຄອນຫວງວຽງຈັນ, ໂດຍຮ່ວມລົງນາມ ລະຫວ່າງ ທ່ານ ໂຄບະຢະຊິ ເຄັນອິຈິ ເອກອັກຄະຣາຊະທູດຍີ່ປຸ່ນ ປະຈຳ ສປປ ລາວ ແລະ ທ່ານ ວິໄລວົງ ບຸດດາຄຳ ເຈົ້າແຂວງຈຳປາສັກ, ມີຜູ້ຕາງໜ້າຈາກກະຊວງການຕ່າງປະເທດ ແລະ ກະຊວງສຶກສາທິການ ແລະ ກິລາ ເຂົ້າຮ່ວມເປັນສັກຂີພິຍານ.
ໂອກາດນີ້, ທ່ານ ວິໄລວົງ ບຸດດາຄຳ ກ່າວວ່າ: ການຊ່ວຍເຫລືອອັນລ້ຳຄ່າໃນຄັ້ງນີ້ຈະເປັນການປະກອບສ່ວນເຂົ້າໃນວຽກງານພັດທະນາຊັບພະຍາກອນມະນຸດ ແລະ ການພັດທະນາເສດຖະກິດ-ສັງຄົມ ຂອງແຂວງຈຳປາສັກ ໂດຍສະເພາະແມ່ນວຽກງານການສຶກສາຂອງເມືອງສຸຂຸມາ. ໃນຫລາຍປີຜ່ານມາ, ລັດຖະບານ ແລະ ປະຊາຊົນຍີ່ປຸ່ນ ໄດ້ໃຫ້ການຊ່ວຍເຫລືອໃນຫລາຍດ້ານໃຫ້ແກ່ແຂວງຈຳປາສັກ ເຊັ່ນ: ການກໍ່ສ້າງຕຶກປິ່ນປົວຄົນເຈັບ, ໂຮງໝໍແຂວງ ແລະ ໂຮງຮຽນຕ່າງໆ ເຊິ່ງສິ່ງດັ່ງກ່າວໄດ້ສົ່ງເສີມໃຫ້ແກ່ການຍົກລະດັບໂຄງລ່າງພື້ນຖານ ແລະ ຍັງເປັນການເພີ່ມໂອກາດໃນການເຂົ້າສຶກສາຮ່ຳຮຽນຂອງເດັກ ນ້ອຍ ທີ່ດ້ອຍໂອກາດ ອີກດ້ວຍ.
ທ່ານ ໂຄບະຢະຊິ ເຄັນອິຈິ ກ່າວຕື່ມວ່າ: ໂຄງການຊ່ວຍເຫລືອດັ່ງກ່າວ, ຈະຊ່ວຍໃຫ້ສະພາບແວດລ້ອມ ການສຶກສາຮ່ຳຮຽນຂອງນັກຮຽນ ແລະ ການສິດສອນຄູອາຈານໄດ້ຮັບການແກ້ໄຂ ພ້ອມທັງເປັນການຮັກສາ ແລະ ຍົກລະດັບສະພາບສຸຂະອານະໄມຂອງໂຮງຮຽນອີກເຊັ່ນກັນ. ເຊິ່ງໃນໄລຍະ 5 ປີຜ່ານມາ, ລັດຖະບານຍີ່ປຸ່ນ ໄດ້ສະໜັບສະໜູນແຂວງຈຳປາສັກ ໃນດ້ານການສຶກສາ, ສາທາລະນະສຸກ ແລະ ໂຄງລ່າງພື້ນຖານຕ່າງໆ ລວມເປັນມູນຄ່າຫລາຍກວ່າ 780.000 ໂດລາສະຫະລັດ. ພ້ອມກັນນີ້, ປະເທດຍີ່ປຸ່ນ ຈະສືບຕໍ່ໃຫ້ການຊ່ວຍເຫລືອປະເທດລາວ ໃນການປັບປຸງພື້ນຖານຊີວິດການເປັນຢູ່ຂັ້ນຮາກຖານຕໍ່ໄປ ເພື່ອຮັບປະກັນ “ບໍ່ໃຫ້ມີໃຜຖືກຖິ້ມໄວ້ທາງຫລັງ” ຜ່ານການແກ້ໄຂຄວາມແຕກໂຕນໃນພາກພື້ນ.
