3 ວຽກງານທີ່ ປກສ ເມືອງສີໂຄດຕະບອງຈະຕ້ອງສຸມໃສ່ ເພື່ອຮັບປະກັນຄວາມຫງົບ ຕາມຊາຍແດນ

ວັນທີ 17 ມີນາ 2023 ຜ່ານມາ, ປກສ ເມືອງສີໂຄດຕະບອງ ຈັດກອງປະຊຸມສະຫລຸບວຽກງານຊາຍແດນ ປະຈໍາປີ 2022 ແລະ ວາງທິດທາງແຜນການ ປະຈໍາປີ 2023, ທີ່ຈັດຂຶ້ນຢູ່ສະໂມສອນປົກຄອງ ເມືອງສີໂຄດຕະບອງ ນະຄອນຫລວງວຽງຈັນ, ໂດຍການເປັນປະທານຂອງ ທ່ານ ພັທ ຈໍາປາ ແສງສຸລິຍາ ຫົວໜ້າກອງບັນຊາການ ປກສ ເມືອງສີໂຄດຕະບອງ ນະຄອນຫລວງວຽງຈັນ, ມີບັນດານາຍບ້ານ 60 ບ້ານ, ຫົວໜ້າຈຸຈອດເຮືອ, ປກສ ກຸ່ມ 7 ກຸ່ມ, ພະນັກງານ-ນັກຮົບທີ່ກ່ຽວຂ້ອງ ແລະ ແຂກຖືກເຊີນ ເຂົ້າຮ່ວມ.

ທ່ານ ພັທ ຄໍາເພົ້າ ສິງປະເສີດ ຮອງຫົວໜ້າພະແນກສັນຕິບານ ປກສ ເມືອງສີໂຄດຕະບອງ ໄດ້ຜ່ານບົດສະຫລຸບວຽກງານຊາຍແດນ ປະຈໍາປີ 2022 ແລະ ວາງທິດທາງແຜນການ ປະຈໍາປີ 2023 ໃຫ້ຮູ້ວ່າ: ໃນປີ 2023 ຄະນະພະແນກສັນຕິບານຈະສຸມໃສ່ ຄື:

1. ຈະສົມທົບກັບການຈັດຕັ້ງບ້ານ, ປກສ ກຸ່ມ, ກອງຮ້ອຍທະຫານຊາຍແດນກອງ 242 ແລະ ຄະນະອະນຸກໍາມະການປ້ອງກັນຊາດ-ປ້ອງກັນຄວາມສະຫງົບ ລຽບຕາມຊາຍແດນ ລະຫວ່າງເມືອງສີໂຄດຕະບອງ ແລະ ອຳເພີສີຊຽງໃໝ່.
2.  ສືບຕໍ່ເຮັດບົດບັນທຶກສັນຍາ ກັບເຈົ້າຂອງເຮືອ ເຂົ້າ-ອອກ ໃຫ້ຖືກຕ້ອງຕາມໂມງເວລາທີ່ໄດ້ກໍານົດໄວ້.
3.  ເອົາໃຈໃສ່ເຄື່ອນໄຫວອອກກວດກາລາດຕະເວນ ຕາມຂອບເຂດຊາຍແດນ, ພ້ອມທັງຂຶ້ນບັນຊີຜູ້ທີ່ມີການເຄື່ອນໄຫວກະທໍາຜິດຕໍ່ລະບຽບກົດໝາຍ.

ນອກນັ້ນ, ທ່ານ ພັທ ຈໍາປາ ແສງສຸລິຍາ ໄດ້ເນັ້ນໃຫ້ຄະນະພະແນກສັນຕິບານ ປກສ ເມືອງສີໂຄດຕະບອງ ຕ້ອງເອົາໃຈໃສ່ເຮັດວຽກງານສຶກສາອົບຮົມການເມືອງ-ແນວຄິດ ໃຫ້ພະນັກງານ-ນັກຮົບ ມີແນວຄິດອຸ່ນອ່ຽນ, ທຸ່ນທ່ຽງ, ພ້ອມທັງຮຽກຮ້ອງໃຫ້ນາຍບ້ານແຕ່ລະບ້ານ ຕ້ອງເອົາໃຈໃສ່ສຶກສາອົບຮົມປະຊາຊົນພາຍໃນບ້ານຂອງຕົນ ໃຫ້ເຂົ້າໃຈແຈ້ງຕໍ່ແນວທາງຂອງພັກ-ລັດ ໂດຍການນໍາເອົາເອກະສານສໍາຄັນຕ່າງໆ ເຜີຍແຜ່ໃຫ້ເຂົາເຈົ້າໄດ້ຮັບຮູ້ ແລະ ເຂົ້າໃຈ, ໂດຍສະເພາະແມ່ນວຽກງານວາລະແຫ່ງຊາດ ຕິດພັນກັບການແກ້ໄຂບັນຫາຢາເສບຕິດ; ໃນນີ້ ປກສ ກຸ່ມ ຕ້ອງໄດ້ສົມທົບກັບການຈັດຕັ້ງບ້ານ ແລະ ພາກສ່ວນທີ່ກ່ຽວຂ້ອງ ໃນການກວດກາຄຸ້ມຄອງຄົນມາພັກເຊົາ ເພື່ອກໍາໃຫ້ໄດ້ບັນດາເປົ້າໝາຍ, ທັງກວດກາຈຸດຫລໍ່ແຫລມ, ຈຸດທີ່ມີຄວາມສ່ຽງຕ່າງໆ; ຕໍ່ກັບສະມາຄົມເຮືອ ຕ້ອງເອົາໃຈໃສ່ໃນການຄຸ້ມຄອງເຮືອເຂົ້າ-ອອກ ໃຫ້ຖືກຕ້ອງໂມງເວລາທີ່ກໍານົດ, ຫລີກລ່ຽງບໍ່ໃຫ້ກຸ່ມຄົນບໍ່ດີສວຍໃຊ້ເຮືອດັ່ງກ່າວໄດ້ເດັດຂາດ ເພື່ອສະກັດກັ້ນການລັກລອບຂົນສົ່ງນໍາເຂົ້າ-ສົ່ງອອກ ຢ່າງເດັດຂາດ.