ລັດຖະບານຍີ່ປຸ່ນ ໃຫ້ທຶນຊ່ວຍເຫລືອລ້າເກືອບ 5 ຕື້ ໃຫ້ແກ່ຜູ້ທີ່ຖືກຜົນກະທົບຈາກລະເບີດບໍ່ທັນແຕກ ຢູ່ເມືອງແປກ ແລະ ເມືອງຜາໄຊ ແຂວງຊຽງຂວາງ
ວັນທີ 21 ມີນາ 2023 ຜ່ານມາ, ລັດຖະບານຍີ່ປຸ່ນໄດ້ລົງນາມສັນຍາມອບທຶນການຊ່ວຍເຫລືອ ເພື່ອສົ່ງເສີມການສຶກສາຄວາມສ່ຽງໄພຂອງລະເບີດ ບໍ່ທັນແຕກ (ລບຕ) ໃຫ້ແກ່ເດັກນ້ອຍ ແລະ ຄອບຄົວຂອງເຂົາເຈົ້າ ຢູ່ເມືອງແປກ ແລະ ເມືອງຜາໄຊ ແຂວງຊຽງຂວາງ ມູນຄ່າປະມານ 290.000 ໂດລາສະຫະລັດ ຫລື ເກືອບ 5 ຕື້ກີບ ໂດຍຮ່ວມລົງນາມລະຫວ່າງ ທ່ານ ໂຄບະຢະຊິ ເຄັນອິຈິ ແລະ ທ່ານ ອີມຸຣະ ຮີໂຣຊິ ມີຕາງໜ້າຈາກກະຊວງ, ແຂວງ ແລະ ພາກສ່ວນ ທີ່ກ່ຽວຂ້ອງເຂົ້າຮ່ວມ.
ພ້ອມນັ້ນຍັງເປັນການເຝິກຝົນທັກສະໃນການດຳລົງຊີວິດໃຫ້ແກ່ຜູ້ທີ່ໄດ້ຮັບຜົນກະທົບຈາກລະເບີດບໍ່ທັນແຕກຢູ່ແຂວງຊຽງຂວາງ ເຊິ່ງການຊ່ວຍເຫລືອຄັ້ງນີ້ແມ່ນພາຍໃຕ້ໂຄງການຊ່ວຍເຫລືອລ້າຜ່ານອົງການ NGO ຍີ່ປຸ່ນ.
ທ່ານ ອີມຸຣະ ຮີໂຣຊິ ຜູ້ຈັດການໂຄງການອົງການ ເທຍຣ່າຣີນາຍຊານ ກ່າວວ່າ: ການສຶກສາ ຄວາມສ່ຽງໄພຂອງ ລບຕ ມີເປົ້າໝາຍຈັດຕັ້ງປະຕິບັດໃຫ້ແກ່ ເດັກນ້ອຍ ແລະ ພໍ່ແມ່ປະຊາຊົນຢູ່ ເມືອງແປກ ແລະ ເມືອງຜາໄຊ ພ້ອມກັນນັ້ນ ລັດຖະບານຍີ່ປຸ່ນຍັງສະໜັບສະໜູນໃນການຍົກລະດັບຊີວິດການເປັນຢູ່ຂອງປະຊາຊົນຜູ້ດ້ອຍໂອກາດໂດຍສະເພາະແມ່ນຜູ້ເຄາະຮ້າຍຈາກ ລບຕ ແລະ ຄອບຄົວຂອງເຂົາເຈົ້າລວມເຖິງຄອບຄົວ ຜູ້ທີ່ມີລາຍໄດ້ຕ່ຳ ໂດຍການສົ່ງເສີມການເຝິກທັກສະທີ່ຈຳເປັນໃນການລ້ຽງເຜິ້ງ ແລະ ຜະລິດ ນ້ຳເຜິ້ງເພື່ອໃຫ້ເປັນອາຊີບ ປະກອບສ່ວນ ໃນເພື່ອຈຸດປ່ອນການຖາງປ່າເຮັດໄຮ່.
ໂອກາດນີ້ ທ່ານ ໂຄບະຢະຊິ ເຄັນອິຈິ ເອກອັກ ຄະຣາຊະທູດຍີ່ປຸ່ນ ປະຈຳ ສປປ ລາວ ໄດ້ກ່າວວ່າ ຢູ່ເມືອງແປກ ແລະ ເມືອງຜາໄຊມີ ລບຕ ຕົກຄ້າງຢູ່ເປັນຈຳນວນຫລາຍ ແລະ ເດັກນ້ອຍ ອາຍຸຕໍ່າກວ່າ 7 ປີມີຄວາມສ່ຽງຕໍ່ອຸບັດເຫດ ຈາກ ລບຕ ຫລາຍທີ່ສຸດ ສະນັ້ນ ພວກເຮົາບໍ່ຄວນ ເບິ່ງຂ້າມຜົນກະທົບຈາກ ຄວາມສ່ຽງຂອງ ລບຕ ທີ່ກາຍເປັນອຸປະ ສັກອັນໃຫຍ່ຫຼວງຕໍ່ການພັດທະນາເສດຖະກິດ-ສັງຄົມຂອງປະຊາຊົນໃນສອງເມືອງເປົ້າໝາຍ ຄາດວ່າຄວາມພະຍາຍາມຂອງ ອົງການເທຍຣ່າ ຣີນາຍຊານຈະເປັນການປະກອບສ່ວນເຂົ້າໃນການຍົກລະດັບຄວາມຕື່ນໂຕຕໍ່ຄວາມປອດໄພ ແລະ ປັບປຸງສະພາບຊີວິດ ຄວາມເປັນຢູ່ຂອງປະ ຊາຊົນໂດຍການຫລີກລ່ຽງອຸບັດເຫດຈາກ ລບຕ ແລະ ສ້າງລາຍຮັບເພີ່ມ ເພື່ອຄຸນະພາບຄວາມເປັນຢູ່ທີ່ດີຂຶ້ນ.
