ກົມຄຸ້ມຄອງພະລັງງານ ຫາລືການຄຸ້ມຄອງສາຍສົ່ງໄຟຟ້າແຮງດັນສູງ ຢູ່ ສປປ ລາວ ໃຫ້ເໝາະສົມສອດຄ່ອງ

ກົມຄຸ້ມຄອງພະລັງງານ ກະຊວງພະລັງງານ ແລະ ບໍ່ແຮ່ ໄດ້ຈັດກອງປະຊຸມປຶກສາຫາລື ກ່ຽວກັບການຄຸ້ມຄອງສາຍສົ່ງໄຟຟ້າແຮງດັນສູງ ຂຶ້ນໃນວັນທີ 23 ມີນາ 2023 ຜ່ານມາ ຢູ່ນະຄອນຫລວງວຽງຈັນ, ພາຍໃຕ້ການເປັນປະທານຂອງ ທ່ານ ເພັດສະຫວັນ ລັດຕະນະທົງໄຊ ຫົວໜ້າກົມຄຸ້ມຄອງພະລັງງານ, ມີຜູ້ຕາງໜ້າຈາກບັນດກົມ, ສະຖາບັນ ແລະ ລັດວິສາຫະກິດອ້ອມຂ້າງກະຊວງ ແລະ ຂະແໜງການທີ່ກ່ຽວຂ້ອງອ້ອມຂ້າງສູນກາງເຂົ້າຮ່ວມ.

ທ່ານ ຫົວໜ້າກົມຄຸ້ມຄອງພະລັງງານ ກ່າວວ່າ: ກົມຄຸ້ມຄອງພະລັງງານ ໃນນາມເປັນຜູ້ຮັບຜິດຊອບໄດ້ຈັດກອງປະຊຸມໃນຄັ້ງນີ້ຂຶ້ນເພື່ອປຶກສາຫາລື, ແລກປ່ຽນບົດຮຽນວຽກງານສາຍສົ່ງໄຟຟ້າ ແຮງດັນສູງຂອງບັນດາໂຄງການສາຍສົ່ງໄຟຟ້າຂອງບັນດາໂຄງການ IPPs ແລະ ລັດວິສາຫະກິດໄຟຟ້າ ລາວ ພ້ອມທັງ ປະກອບຄຳເຫັນ ໃສ່ຮ່າງຂໍ້ຕົກລົງ ວ່າດ້ວຍການຄຸ້ມຄອງຄວາມປອດໄພຂອງພາກສາຍສົ່ງໄຟຟ້າແຮງດັນສູງ ຢູ່ ສປປ ລາວ. ເຊິ່ງບັນດາບໍລິສັດ ແລະພາກສ່ວນທີ່ກ່ຽວຂ້ອງຮ່ວມກັນຄົ້ນຄ້ວາ ແລະ ລະດົມແນວຄວາມຄິດຂອງບັນດານັກວິຊາການທີ່ປຶກສາ ເພື່ອສັງລວມຄຳຄິດຄຳເຫັນ, ຂໍ້ສະເໜີເພື່ອປັບປຸງຮ່າງຂໍ້ຕົກລົງສະບັບນີ້ໃຫ້ມີຄວາມສົມບູນ, ຄົບຖ້ວນ ແລະ ສອດຄ່ອງ ກັບລະບຽບ-ກົດໝາຍຂອງບ້ານເຮົາ.

ສຳລັບວຽກງານສ້າງ ແລະ ປັບປຸງນິຕິກຳກໍເປັນວຽກທີ່ ສຳຄັນຂອງກະຊວງພະລັງງານ ແລະ ບໍ່ແຮ່ ເພື່ອຄຸ້ມຄອງບັນດາໂຄງການທີ່ຕ່າງໆ ທີ່ຕິດພັນກັບວຽກງານຂອງຂະແໜງການ ໂດຍສະເພາະນິຕິກຳທີ່ຄຸ້ມຄອງລະບົບສາຍສົ່ງແຮງດັນສູງ ເຊິ່ງເປັນວຽກງານໜຶ່ງທີ່ສຳຄັນ. ຜ່ານມາໄດ້ຈັດກອງປະຊຸມປຶກສາຫາລືກັນແລ້ວ ໃນວັນທີ 14 ກຸມພາ 2012 ທີ່ຜ່ານມານັ້ນຢູ່ເມືອງ ວັງວຽງ, ແຂວງວຽງຈັນ ແລະ ໄດ້ພ້ອມກັນເຫັນດີ ປັບປຸງບັນດາໝວດ, ບັນດາມາດຕາ ແລະ ເນື້ອໃນຕ່າງໆ ທີ່ຍັງບໍ່ທັນຄົບຖ້ວນສົມບູນ, ເຊິ່ງຄະນະຮັບຜິດຊອບໄດ້ນໍາເອົາຄໍາຄິດເຫັນຈາກຜູ້ເຂົ້າຮ່ວມໄປປັບປຸງ ແລະ ໄດ້ພິຈາລະນາຢ່າງ ລະອຽດຖີ່ຖ້ວນ. ເພື່ອເຮັດໃຫ້ຮ່າງຂໍ້ຕົກລົງມີຄວາມຄົບຖ້ວນສົມບູນຂຶ້ນ.