ຈັບຊາຍໜຸ່ມສອງຄົນ ທີ່ເຄື່ອນໄຫວລັກລົດຈັກ ແລະ ເຄີຍຖືກເຈົ້າໜ້າທີ່ຈຳຄຸກມາແລ້ວ 2 ປີ

ເຈົ້າໜ້າທີ່ ປກສ ເມືອງສີໂຄດຕະບອງ ນະຄອນຫລວງວຽງຈັນ ກັກຕົວທ້າວ ອຸທອນ ຫລື ນຸ້ຍ ແລະ ທ້າວ ຈິນດາ ຫລື ມືດ ພາຍຫລັງຊີງຊັບ (ລົດຈັກ) ໄປໄດ້ 3 ວັນ ເຊິ່ງທັງ 2 ຄົນ ເຄີຍຖືກດັດສ້າງມາແລ້ວ 2 ປີ ໃນຂໍ້ຫາລັກຊັບພົນລະເມືອງ ແລະ ມີຢາເສບຕິດໄວ້ໃນຄອບຄອງ.

ທ່ານ ພັທ ດາວວົງ ຫຸມມະວົງ ຫົວໜ້າພະແນກຕໍາຫລວດ ປກສ ເມືອງສີໂຄດຕະບອງ  ໃຫ້ຮູ້ວ່າ: ເຈົ້າໜ້າທີ່ ປກສ ເມືອງສີໂຄດຕະບອງ ໄດ້ຮັບແຈ້ງຄວາມຈາກຜູ້ເສຍຫາຍ ຢູ່ບ້ານໂນນຂີ້ເຫລັກ ເມືອງສີໂຄດຕະບອງ ວ່າ: ເວລາ 00:40 ນາທີ ຂອງວັນທີ 24 ກຸມພາ 2023 ຜ່ານມາ, ໄດ້ຂັບຂີ່ລົດຈັກມາແຕ່ບ່ອນເຮັດວຽກ ພໍຮອດເຂດບ້ານໂພນສົມບູນ ມີຊາຍ 2 ຄົນ ໄດ້ຂັບຂີ່ລົດຈັກມາຮຽງຂ້າງ ພ້ອມທັງ ບອກໃຫ້ຈອດ ແຕ່ຕົນເອງໄດ້ຂີ່ລົດລົບໜີ ເມື່ອຮອດໄຟແດງເຂດບ້ານໂພນສົມບູນ ຊາຍ 2 ຄົນກໍນຳທັນ ແລະ ດຶງເຂົາລົດເຮັດໃຫ້ລົດລົ້ມ. ຈາກນັ້ນ ຊາຍ 1 ຄົນໄດ້ລົງມາຍາດເອົາລົດຈັກຂອງຕົນເອງ ປ້າຍເລກທະບຽນ ດຫ 6636 ກຳແພງນະຄອນ, ພ້ອມທັງ ຊັບສິນຢູ່ກ້ອງເບາະລົດແລ້ວຂັບຂີ່ຫລົບໜີໄປ. ສ່ວນຜູ້ເສຍໄດ້ຮັບບາດເຈັບສົມຄວນ. ພາຍຫລັງໄດ້ຮັບແຈ້ງຄວາມ, ເຈົ້າໜ້າທີ່ ຈິ່ງໄດ້ສົມທົບກັບພາກສ່ວນກ່ຽວຂ້ອງລົງກວດກາສະຖານທີ່ເກີດເຫດ ແລະ ຕິດຕາມເປົ້າໝາຍສົງໄສຕາມຈຸດຕ່າງໆ. ມາຮອດວັນທີ 27 ກຸມພາ 2023, ກໍສາມາດກັກຕົວຜູ້ຖືກສົງໄສໄດ້ 2 ຄົນຄື: ທ້າວ ອຸທອນ ຫລື ນຸ້ຍ ອາຍຸ 20 ປີ, ອາຊີບ ວ່າງງານ, ບ້ານໂນນຂີ້ເຫລັກ ແລະ ທ້າວ ຈິນດາ ຫລື ມືດ ອາຍຸ 32 ປີ, ອາຊີບ ວ່າງງານ, ບ້ານໂນນແກ້ວ ທັງສອງຄົນຢູ່ ເມືອງສີໂຄດຕະບອງ ນະຄອນຫລວງວຽງຈັນ, ພ້ອມທັງ ເກັບກູ້ຂອງກາງລົດຈັກຄືນມາໄດ້.

ຜ່ານການສືບສວນ-ສອບສວນ ຂອງເຈົ້າໜ້າທີ່ ທ້າວ ອຸທອນ ຫຼື ນຸ່ຍ ໄດ້ຮັບສາລະພາບວ່າ: ຕົນເອງໄດ້ຮ່ວມກັບ ທ້າວ ຈິນດາ ຫຼື ມືດ ກໍ່ເຫດຍາດຊີງລົດຈັກ ປ້າຍເລກທະບຽນ ດຫ 6636 ກຳແພງນະຄອນແທ້ ແລະຜ່ານມາ ແມ່ນຖືກດັດສ້າງຢູ່ ປກສ ເມືອງສີໂຄດຕະບອງ 2 ປີ ໃນຂໍ້ຫາລັກຊັບພົນລະເມືອງ ແລະ ມີຢາເສບຕິດໄວ້ໃນຄອບຄອງ. ຫຼັງຈາກພົ້ນໂທດອອກມາ ຈິງໄດ້ພາກັນມາຊີງຊັບ ເພື່ອນໍາໄປຂາຍແລ້ວນໍາເງິນມາແລ້ວໄດ້ໄປໃຊ້ຈ່າຍ.

ປັດຈຸບັນ ເຈົ້າໜ້າທີ່ ປກສ ເມືອງສີໂຄດຕະບອງ ກໍາລັງສືບຕໍ່ດໍາເນີນການ ສືບສວນ-ສອບສວນ ເພື່ອເປີດກ້ວາງຂະຫຍາຍຜົນຊອກຫາພວກຮ່ວມຂະບວນການ ມາດຳເນີນຄະດີຕາມຂັ້ນຕອນຂອງກົດໝາຍ; ສ່ວນລົດຈັກທີ່ເກັບກູ້ໄດ້ແມ່ນມອບໃຫ້ເຈົ້າຂອງແລ້ວ.