ສະຫາຍ ທອງລຸນ ສີສຸລິດ ສະເໜີໃຫ້ແຂວງຢຸນນານຊຸກຍູ້ສົ່ງເສີມນັກທຸລະກິດເຂົ້າມາລົງທຶນຢູ່ ສປປ ລາວ ຫລາຍຂຶ້ນ

ໃນວັນທີ 30 ມີນາ 2023 ນີ້ ທີ່ຫ້ອງວ່າການສູນກາງພັກ, ສະຫາຍ ທອງລຸນ ສີ​ສຸ​ລິດ ເລ​ຂາ​ທິ​ການ​ໃຫຍ່ ປະ​ທານ​ປະ​ເທດ ແຫ່ງ ສ​ປ​ປ ລາວ ໄດ້​ຕ້ອນ​ຮັບການເຂົ້າຢ້ຽມຂໍ່ານັບຂອງ ສະຫາຍ ຫວັງ ໜິງ ເລຂາພັກແຂວງຢຸນນານ ພ້ອມດ້ວຍຄະນະ, ໃນໂອກາດທີ່ເດີນທາງມາຢ້ຽມຢາມ ແລະ ເຮັດວຽກຢູ່ ສປປ ລາວ ແຕ່ວັນທີ 29 ມີນາ ຫາ 1 ເມສາ 2023.

ໃນໂອກາດນີ້, ສະຫາຍ ທອງລຸນ ສີສຸລິດ ໄດ້ສະແດງຄວາມຍິນດີຕ້ອນຮັບ ແລະ ຕີລາຄາສູງຕໍ່ຄະນະຜູ້ແທນແຂວງຢຸນນານ ໃນການຢ້ຽມຢາມ ສປປ ລາວ ໃນຄັ້ງນີ້, ຊຶ່ງເປັນການປະກອບສ່ວນສຳຄັນເຂົ້າໃນການເພີ່ມພູນຄູນສ້າງ ສາຍພົວພັນມິດຕະພາບອັນເປັນມູນເຊື້ອ ແລະ ການຮ່ວມມືຍຸດທະສາດຮອບດ້ານ ລາວ-ຈີນ ຕາມທິດ 4 ດີ, ການເປັນຄູ່ຮ່ວມຊາຕາກຳ ລາວ-ຈີນ, ຈີນ-ລາວ ໃຫ້ນັບມື້ໄດ້ຮັບການເສີມຂະຫຍາຍຢ່າງຕໍ່ເນື່ອງ ທັງລວງກວ້າງ ແລະ ລວງເລິກ ໂດຍສະເພາະແມ່ນການພົວພັນຮ່ວມມື ລະຫວ່າງ ສປປ ລາວ ກັບ ແຂວງຢຸນນານ. ສປປ ລາວ ຖືສໍາຄັນ ແລະ ຕີລາຄາສູງຕໍ່ການພົວພັນຮ່ວມມື ລະຫວ່າງ ສປປ ລາວ ກັບ ແຂວງຢຸນນານ, ໂດຍສະເພາະການຈັດຕັ້ງປະຕິບັດບັນດາໂຄງການຮ່ວມມືຂອງສອງລັດຖະບານ ກໍຄື ການລົງທຶນ ແລະ ດໍາເນີນທຸລະກິດຢູ່ ສປປ ລາວ ຂອງວິສາຫະກິດ-ນັກລົງທຶນຂອງແຂວງຢຸນນານ ໄດ້ປະກອບສ່ວນສໍາຄັນເຂົ້າໃນການພັດທະນາເສດຖະກິດ-ສັງຄົມຂອງ ສປປ ລາວ ໃນໄລຍະຜ່ານມາ. ພ້ອມນີ້, ສະຫາຍ ທອງລຸນ ສີສຸລິດ ໄດ້ສະເໜີໃຫ້ສອງຝ່າຍ ສືບຕໍ່ຜັນຂະຫຍາຍບັນດາຂໍ້ຕົກລົງຂອງການນຳຂັ້ນສູງໃຫ້ໄດ້ຮັບການຈັດຕັ້ງປະຕິບັດ ແລະ ມີໝາກຜົນເປັນຢ່າງດີ, ຊຸກຍູ້ສົ່ງເສີມໃຫ້ບັນດານັກທຸລະກິດຂອງແຂວງຢຸນນານ ເຂົ້າມາລົງທຶນຢູ່ ສປປ ລາວ ໃນຂະແໜງການຕ່າງໆທີ່ມີທ່າແຮງຮ່ວມກັນ, ຊຸກຍູ້ການລົງທຶນກໍ່ສ້າງເສັ້ນທາງດ່ວນ ວຽງຈັນ-ບໍ່ເຕ່ນ, ວຽງຈັນ-ພາກໃຕ້ຂອງລາວ, ເຂດເສດຖະກິດກວມລວມໄຊເສດຖາ, ການລົງທຶນດ້ານກະສິກໍາຂອງແຂວງຢຸນນານ ຢູ່ ສປປ ລາວ ລວມທັງເຂດເສດຖະກິດ ບໍ່ເຕ່ນ-ບໍ່ຫານ, ຊຸກຍູ້ການນຳໃຊ້ທາງລົດໄຟ ໃຫ້ເກີດຜົນປະໂຫຍດຫລາຍຂຶ້ນຕື່ມ, ຮ່ວມກັນຊຸກຍູ້ຜະລິດກະສິກຳຂອງລາວ ເພື່ອສົ່ງອອກໄປ ສປ ຈີນ ເປັນຕົ້ນ ແມ່ນການລ້ຽງງົວ, ຍົກສູງປະສິດທິພາບກົນໄກການຮ່ວມມື ລະຫວ່າງ ແຂວງຢຸນນານ ກັບ 10 ແຂວງພາກເໜືອ ຂອງ ສປປ ລາວ, ຊຸກຍູ້ວຽກງານຮອບດ້ານໃຫ້ແກ່ ການເປີດດ່ານສາກົນທາງລົດໄຟ ລາວ-ຈີນ ຢ່າງເປັນທາງການ.

ໃນນີ້, ສະເໜີໃຫ້ສອງຝ່າຍ ເນັ້ນດ້ານການໂຄສະນາຕໍ່ພາຍໃນ ແລະ ຕ່າງປະເທດ ໃຫ້ໄດ້ຮັບຮູ້ຢ່າງທົ່ວເຖິງກ່ຽວກັບໝາກຜົນຂອງການພົວພັນຮ່ວມມື ແລະ ການຕັດສິນໃຈສູງຂອງການນຳສອງປະເທດ ໃນການຮ່ວມກັນສ້າງສາ ແລະ ພັດທະນາໂຄງການລົດໄຟ ລາວ-ຈີນ ຊຶ່ງແມ່ນໂຄງການຍຸດທະສາດ ທີ່ເປັນສັນຍາລັກທີ່ເປັນແບບຢ່າງອັນດີຂອງການພົວພັນ ລາວ-ຈີນ ໂດຍຈະຊ່ວຍເຫຼືອ ສປປ ລາວ ໃນການສ້າງວຽກເຮັດງານທໍາ ແລະ ການເກັບລາຍຮັບຈາກການທ່ອງທ່ຽວ ໂດຍຜ່ານການນໍາໃຊ້ເສັ້ນທາງລົດໄຟ ລາວ-ຈີນ. ພ້ອມດຽວກັນນີ້, ກໍສະເໜີໃຫ້ແຂວງຢຸນນານ ຊ່ວຍສ້າງບຸກຄະລາກອນ, ຖ່າຍທອດ ແລະ ແລກປ່ຽນບົດຮຽນ ກ່ຽວກັບ ການລຶບລ້າງຄວາມທຸກຍາກ ໃຫ້ແກ່ ສປປ ລາວ ໃນຕໍ່ໜ້າ.

ພ້ອມນັ້ນ, ສະຫາຍ ທອງລຸນ ສີສຸລິດ ໄດ້ອວຍພອນໃຫ້ສາຍພົວພັນມິດຕະພາບທີ່ເປັນມູນເຊື້ອ, ການຮ່ວມມືແບບຄູ່ຮ່ວມຍຸດທະສາດຮອບດ້ານ ໝັ້ນຄົງ ຍາວນານ ຕາມທິດ 4 ດີ ແລະ ການເປັນຄູ່ຮ່ວມຊາຕາກຳສັງຄົມນິຍົມ ລາວ-ຈີນ ຈົ່ງໝັ້ນຄົງຂະໜົງແກ່ນຕະຫຼອດໄປ, ອວຍພອນໃຫ້ ຄະນະການນຳແຂວງຢຸນນານ ຈົ່ງປະສົບຜົນສຳເລັດໃນການຢ້ຽມຢາມເຮັດວຽກຢູ່ ສປປ ລາວ ຄັ້ງນີ້.

ໃນຂະນະດຽວກັນ, ສະຫາຍ ຫວັງ ໜິງ ກໍໄດ້ສະແດງຄວາມຂອບໃຈຕໍ່ການຕ້ອນຮັບອັນອົບອຸ່ນ ແລະ ໄດ້ແຈ້ງໃຫ້ຊາບເຖິງຈຸດປະສົງໃນການເດີນທາງຢ້ຽມຢາມເຮັດວຽກຢູ່ ສປປ ລາວ ໃນຄັ້ງນີ້ ຊຶ່ງຈະປະກອບສ່ວນສຳຄັນເຂົ້າໃນການເພີ່ມທະວີການພົວພັນໄມຕີຈິດມິດຕະພາບ ລະຫວ່າງ ສອງຊາດ ລາວ-ຈີນ ໃຫ້ນັບມື້ເລິກເຊິ່ງຍິ່ງໆຂຶ້ນ. ພັກ-ລັດຖະບານ ແລະ ປະຊາຊົນຈີນ ເວົ້າລວມ, ເວົ້າສະເພາະ ກໍຄື ແຂວງຢຸນນານ ຍິນດີໃຫ້ການຮ່ວມມືກັບ ສປປ ລາວ ເພື່ອພັດທະນາໄປພ້ອມກັນໃນດ້ານຕ່າງໆ ເປັນຕົ້ນ ການພັດທະນາພື້ນຖານໂຄງລ່າງ, ການຜະລິດກະສິກຳ, ການສົ່ງອອກສິນຄ້າລາວໄປຈີນ, ການຮ່ວມມືດ້ານພະລັງງານ-ບໍ່ແຮ່, ການທ່ອງທ່ຽວ, ການສຶກສາ, ການພັດທະນາຊັບພະຍາກອນມະນຸດ ແລະ ອື່ນໆ, ທັງນີ້ ກໍເພື່ອນຳເອົາຄວາມຈະເລີນຮຸ່ງເຮືອງ, ຄວາມສົມບູນພູນສຸກ ແລະ ນຳເອົາຜົນປະໂຫຍດຕົວຈິງມາສູ່ປະຊາຊົນສອງຊາດ ຈີນ-ລາວ, ລາວ-ຈີນ. ນອກຈາກນີ້, ສະຫາຍ ຫວັງ ໜິງ ໄດ້ແຈ້ງໃຫ້ຊາບ ກ່ຽວກັບ ສະພາບການພັດທະນາເສດຖະກິດ-ສັງຄົມ ແລະ ຜົນສຳເລັດຈຳນວນໜຶ່ງຂອງແຂວງຢຸນນານໃນໄລຍະ 5 ປີ ຜ່ານ​ມາ.