NATO ສັ່ງຫ້າມນໍາໃຊ້ TikTok ໃນອຸປະກອນຂອງໜ່ວຍງານ ອ້າງເຫດຜົນດ້ານຄວາມໝັ້ນຄົງ

ສໍານັກຂ່າວ CNN ລາຍງານໂດຍອ້າງອີງແຫລ່ງຂ່າວໃກ້ຊິດວ່າ: ອົງການສົນທິສັນຍາອັດລັງຕິກເໜືອ ຫລື NATO ໄດ້ອອກຄໍາສັ່ງຫ້າມບໍ່ໃຫ້ເຈົ້າໜ້າທີ່ດາວໂຫລດແອັບ TikTok ລົງໃນອຸປະກອນທີ່ NATO ຈັດຫາມາໃຫ້ ໂດຍອ້າງເຫດຜົນດ້ານຄວາມໝັ້ນຄົງ.

ເຈົ້າໜ້າທີ່ຂອງ NATO ໄດ້ສົ່ງຈົດໝາຍແຈ້ງການຫ້າມນໍາໃຊ້ TikTok ເຖິງພະນັກງານທັງໝົດໃນເຊົ້າວັນທີ 31 ມີນາຜ່ານມາ ໂດຍຖືເປັນການສັ່ງຫ້າມຢ່າງເປັນທາງການ, ແຕ່ແຫລ່ງຂ່າວລະບຸວ່າ: ປົກກະຕິອຸປະກອນຂອງ NATO ກໍບໍ່ສາມາດນໍາໃຊ້ TikTok ໄດ້ຢູ່ແລ້ວ ເນື່ອງຈາກມີຂໍ້ຈໍາກັດທາງເຕັກໂນໂລຊີພາຍໃນໜ່ວຍງານ.

NATO ຖືເປັນອົງກອນຫລ້າສຸດຂອງພາກລັດທີ່ປະກາດຫ້າມນໍາໃຊ້ TikTok ຢ່າງເປັນທາງການ ພາຍຫລັງຫລາຍປະເທດເກີດກະແສຄວາມກັງວົນວ່າລັດຖະບານຈີນອາດສາມາດເຂົ້າເຖິງຂໍ້ມູນຂອງຜູ້ນໍາໃຊ້ໄດ້ຜ່ານການແລກປ່ຽນຂໍ້ມູນກັບບໍລິສັດແມ່ຂອງ TikTok ຄື ByteDance ໂດຍກ່ອນໜ້ານີ້ອາເມລິກາ, ອັງກິດ, ນອກແວ, ລັດຖະສະພາເອີຣົບ ແລະ ອີກຫລາຍປະເທດໄດ້ສັ່ງຫ້າມນໍາໃຊ້ TikTok ໃນອຸປະກອນຂອງໜ່ວຍງານລັດແລ້ວ.

ອ້າງອີງ:

https://edition.cnn.com/…/tech/nato-tiktok-ban/index.html