ກະຊວງການເງິນ ມອບ-ໂອນ 7 ຫົວໜ່ວຍວິສາຫະກິດ ໃຫ້ແຂວງບໍລິຄຳໄຊ ຄຸ້ມຄອງ
ວັນທີ 31 ມີນາ 2023 ນີ້ ກະຊວງການເງິນ ມອບ-ໂອນ 7 ໜ່ວຍວິສາຫະກິດ ໃຫ້ແຂວງບໍລິຄຳໄຊ ຄຸ້ມຄອງ ໂດຍການເຂົ້າຮ່ວມຂອງ ທ່ານ ປຸນປອນ ວັນນະຈິດ ຮອງລັດຖະມົນຕີກະຊວງການເງິນ ທ່ານ ບຸນເສັງ ປະທຳມະວົງ ຮອງເຈົ້າແຂວງບໍລິຄຳໄຊ.
ໂດຍປະຕິບັດຕາມມາດຕາ 03 ຂໍ້ທີ່ 1 ຂອງມະຕິກອງປະຊຸມສະໄໝສາມັນເທື່ອທີ 4 ຂອງສະພາແຫ່ງຊາດ ຊຸດທີ IX ສະບັບເລກທີ 63/ສພຊ, ລົງວັນທີ 09 ທັນວາ 2022 ກະຊວງການເງິນ ແລະ ແຂວງບໍລິຄຳໄຊ ເຫັນດີເປັນເອກະພາບ ມອບ-ຮັບ ການທົດລອງຫັນຫົວໜ່ວຍວິສາຫະກິດທີ່ສູນກາງຄຸ້ມຄອງໃນໄລຍະຜ່ານມາ ໃຫ້ແຂວງບໍລິຄຳໄຊ, ສືບຕໍ່ຄຸ້ມຄອງ ແລະ ຈັດຕັ້ງປະຕິບັດໃນປີ 2023 ຈຳນວນ 23 ຫົວໜ່ວຍວິສາຫະກິດ ເພື່ອໃຫ້ກາຍເປັນແຂວງເກີນດຸນທາງດ້ານງົບປະມານ (ລາຍຮັບກຸ້ມລາຍຈ່າຍ ແລະ ມີສ່ວນເຫຼືອດຸ່ນດ່ຽງໃຫ້ສູນກາງ)
ໃນນັ້ນປະກອບມີ: ບໍລິສັດ ເທີນຫີນບູນ ພາວເວີ ຈຳກັດ, ບໍລິສັດ ໄຟຟ້ານ້ຳງຽບ 1 ຈຳກັດ, ບໍລິສັດ ລັດ 20 ມັງກອນພັດທະນາ, ບໍລິສັດ ບໍ່ຄໍາ ຄໍາເກີດ-ແສນອຸດົມ ຈຳກັດ, ບໍລິສັດ ບໍ່ຄຳເກີດ-ແສນອຸດົມ 2 ຈຳກັດ, ບໍລິສັດ ໄຟຟ້າ ນ້ຳເທີນ 1 ຈຳກັດ ແລະ ບໍລິສັດ ນ້ຳຮົງ ພາວເວີ ຈຳກັດ.
ການມອບ-ໂອນຫົວໜ່ວຍວິສາຫະກິດທີ່ສູນກາງຄຸ້ມຄອງຜ່ານມາມອບໃຫ້ທ້ອງຖິ່ນ, ແມ່ນເຫັນຄວາມຈໍາເປັນໃນການພັດທະນາທ້ອງຖິ່ນ, ອັນຈະສ້າງຄວາມສະດວກໃນການຄຸ້ມຄອງ, ການປະສານວຽກ ແລະ ທິດນໍາຂອງລັດຖະບານກໍຄືກະຊວງການເງິນ ທີ່ໄດ້ເຫັນດີເປັນເອກະພາບມອບ-ໂອນຫົວໜ່ວຍທຸລະກິດຂະໜາດໃຫຍ່ທີ່ສູນກາງຄຸ້ມຄອງ, ເພື່ອໃຫ້ແຂວງຮັບຜິດຊອບ ໃນໄລຍະທີ່ທາງສູນກາງໄດ້ມອບໃຫ້ແຂວງກຸ້ມຕົນເອງທາງດ້ານງົບປະມານ. ສະນັ້ນ,ຈຶ່ງມີການຈັດສັນໂດຍການມອບຫົວໜ່ວຍທຸລະກິດ ແລະ ບໍລິສັດທີ່ຕັ້ງຢູ່ກັບແຂວງນັ້ນເພື່ອໃຫ້ແຂວງຄຸ້ມຄອງເອງ. ທັງນີ້, ເພື່ອໃຫ້ກາຍເປັນແຂວງເກີນດຸນທາງດ້ານງົບປະມານ (ລາຍຮັບກຸ້ມລາຍຈ່າຍ ແລະ ມີສ່ວນເຫຼືອດຸ່ນດ່ຽງໃຫ້ສູນກາງ).
