ບໍລິສັດໃນຍີ່ປຸ່ນເລີ່ມຫລຸດມື້ເຮັດວຽກ ເຫລືອພຽງ 4 ວັນຕໍ່ອາທິດ

ບໍລິສັດໃນຍີ່ປຸ່ນຫລາຍແຫ່ງ ເລີ່ມປ່ຽນຮູບແບບມື້ເຮັດວຽກ ສະເໜີທາງເລືອກໃຫ້ພະນັກງານມາເຮັດວຽກອາທິດລະ 4 ວັນ ໂດຍຫວັງຈະຊ່ວຍປັບສົມດູນຊີວິດ ແລະ ການເຮັດວຽກຂອງພະນັກງານຊາວຍີ່ປຸ່ນ.

ກະແສການຫລຸດມື້ເຮັດວຽກຕໍ່ອາທິດ ກໍາລັງມີທ່າອ່ຽງເພີ່ມຂຶ້ນເລື້ອຍໆໃນຫລາຍປະເທດ ໂດຍສະເພາະຢູ່ເຂດເອີຣົບ. ຂະນະທີ່ທາງອາຊີ ມີຍີ່ປຸ່ນເລີ່ມໃຫ້ຄວາມສົນໃຈ ແລະ ນໍາເອົາມາໃຊ້ ລັດຖະບານຍີ່ປຸ່ນໃຫ້ການສະໜັບສະໜູນ ແລະ ບັນຈຸໄວ້ໃນນະໂຍບາຍ ໂດຍແນະນໍາໃຫ້ບໍລິສັດ ແລະ ອົງກອນສະເໜີທາງເລືອກມື້ພັກ 3 ວັນຕໍ່ອາທິດ ຕໍ່ພະນັກງານ.

ບໍລິສັດໃນເຄືອພານາໂຊນິກ ເປັນບໍລິສັດຫລ້າສຸດທີ່ອະນຸຍາດໃຫ້ພະນັກງານເລືອກມື້ພັກໄດ້ອາທິດລະ 3 ວັນ ເທົ່າກັບເຫລືອມື້ເຮັດວຽກພຽງ 4 ວັນຕໍ່ອາທິດ ຕາມຮອຍຂອງບໍລິສັດຮິຕາຊິ, ທະນາຄານມິຊູໂຮະ ແລະ ບໍລິສັດຟາສ ຣີເທວລິງ ເຊິ່ງເບິ່ງແຍງຍີ່ຫໍ້ຢູນິໂຄ ທີ່ອະນຸຍາດໃຫ້ພະນັກງານຫລຸດມື້ເຮັດວຽກຕໍ່ອາທິດໄດ້ກ່ອນໜ້ານີ້ແລ້ວ.

ທ່ານ ຢູກິ ຄຸຊຸມິ ປະທານຂອງບໍລິສັດພານາໂຊນິກ ກ່າວວ່າ: ເປັນຄວາມຮັບຜິດຊອບຂອງບໍລິສັດທີ່ຕ້ອງເຮັດໃຫ້ພະນັກງານທີ່ມີຄວາມຫລາກຫລາຍຂອງບໍລິສັດ ມີສົມດູນຂອງຊີວິດ ແລະ ການເຮັດວຽກທີ່ດີ.

ຈາກການສໍາຫລວດບໍລິສັດ 4.000 ແຫ່ງ ໃນປີຜ່ານມາພົບວ່າ: 8,5% ຂອງບໍລິສັດທົ່ວປະເທດ ບໍ່ໄດ້ບັງຄັບໃຫ້ພະນັກງານຕ້ອງມາເຮັດວຽກອາທິດລະ 5 ວັນ.

ໃນເດືອນສິງຫາ 2019 ບໍລິສັດໄມໂຄຣຊັອບສາຂາຍີ່ປຸ່ນ ທົດລອງໃຫ້ພະນັກງານເລີ່ມເຮັດວຽກອາທິດລະ 4 ວັນ ໂດຍໃຫ້ພັກແຕ່ວັນສຸກຈົນຮອດວັນອາທິດ ເປັນເວລາ 5 ອາທິດ ພົບວ່າ ຜົນຜະລິດຈາກການເຮັດວຽກເພີ່ມຂຶ້ນເຖິງ 40%, ກອງປະຊຸມວຽກໃຫ້ປະສິດທິພາບເພີ່ມຂຶ້ນ, ພະນັກງານມີຄວາມສຸກຫລາຍຂຶ້ນ ແລະ ລາພັກໜ້ອຍລົງ.

ພະນັກງານ 9 ໃນ 10 ຄົນຂອງບໍລິສັດ ກ່າວວ່າ: ພວກເຂົາພໍໃຈມື້ເຮັດວຽກທີ່ຫລຸດລົງ ລວມທັງຜົນປະໂຫຍດອື່ນໆເຊັ່ນ: ຫລຸດການໃຊ້ໄຟຟ້າໃນບໍລິສັດໄດ້ 23%, ຫລຸດການໃຊ້ເຈ້ຍໄດ້ 59% ເຊິ່ງເຮັດໃຫ້ຫົວໜ້າບໍລິສັດພໍໃຈເຊັ່ນກັນ.