ອາເມລິກາພິຈາລະນາປິດ ສະຖານເອກອັກຄະລັດຖະທູດຢູ່ກູບາ

- advert banner 728 90 728x90 - ອາເມລິກາພິຈາລະນາປິດ ສະຖານເອກອັກຄະລັດຖະທູດຢູ່ກູບາ

- tillerson - ອາເມລິກາພິຈາລະນາປິດ ສະຖານເອກອັກຄະລັດຖະທູດຢູ່ກູບາ

- new3 - ອາເມລິກາພິຈາລະນາປິດ ສະຖານເອກອັກຄະລັດຖະທູດຢູ່ກູບາ

ລັດຖະບານ​ວໍ​ຊິງ​ຕັນ​ອາດ​ປິດ​ສະຖານ​ເອກ​ອັກຄະ​ລັດຖະທູດ​ປະຈຳ​ນະຄອນຫຼວງ​ຮາ​ວາ​ນາ, ​ເຖິງ​ວ່າ​ຫາ​ກໍ​ເປີດ​ມາ​ໄດ້​ພຽງ 2 ປີ ​ເນື່ອງ​ຈາກ​ກໍລະນີ​ທີ່​ເຈົ້າໜ້າ​ທີ່​ການ​ທູດ​ຂອງ​ອາ​ເມ​ລິ​ກາ​ຫຼາຍ​ກວ່າ 20 ຄົນ ບໍ່​ສະບາຍ​ໂດຍ​ບໍ່​ຮູ້​ສາ​ເຫດ.

ສຳນັກ​ຂ່າວ​ຕ່າງປະ​ເທດ​ລາຍ​ງານ​ຈາກ​ນະຄອນຫຼວງ​ວໍ​ຊິງ​ຕັນ ປະ​ເທດ​ອາ​ເມ​ລິ​ກາ ​ໃນ​ວັນ​ທີ 17 ກັນຍາ​ວ່າ: ທ່ານ ​ເຣັກ ທິລ​ເລີ​ສັນ ລັດຖະມົນຕີ​ກະຊວງ​ການ​ຕ່າງປະ​ເທດ​ອາ​ເມ​ລິ​ກາ ກ່າວ​ໃນ​ວັນ​ທີ 17 ກັນຍາ​ວ່າ: ລັດຖະບານ​ວໍ​ຊິງ​ຕັນ​ກຳລັງ​ຕີລາຄາ​ເລື່ອງ​ການ​ປິດ​ສະຖານ​ເອກ​ອັກຄະ​ລັດຖະທູດ​ປະຈຳ​ນະຄອນຫຼວງ​ຮາ​ວາ​ນາ ​ເຊິ່ງ​ແນ່ນອນ​ວ່າ​ເປ​ັນການ​ຕັດສິນ​ໃຈ​ຮ້າຍ​ແຮງ​ທີ່​ກ່ຽວຂ້ອງ​ໂດຍ​ກົງ​ກັບ “​ເຫດການ​ທີ່​ຍັງ​ບໍ່​ສາມາດ​ອະທິບາຍ​ໄດ້” ທີ່​ເກີດ​ຂຶ້ນກັບ​ເຈົ້າໜ້າ​ທີ່​ການ​ທູດ​ຂອງ​ອາ​ເມ​ລິ​ກາ ນັບ​ແຕ່​ທ້າຍ​ປີ​ຜ່ານ​ມາ.

​ ​ເຖິງ​ຢ່າງ​ໃດ​ກໍ​ຕາມ, ທ່ານ ທິລ​ເລີ​ສັນ ຢືນຢັນ​ວ່າ: ​ໃນ​ລະຫວ່າງ​ນີ້ ສະຖານ​ເອກ​ອັກຄະ​ລັດຖະທູດ​ອາ​ເມ​ລິ​ກາ​ຢູ່​ກູ​ບາ ​ເຊິ່ງ​ເປີດ​ດຳ​ເນີນ​ການ​ໃນ​ເດືອນ​ສິງຫາ 2015 ຈະ​ຍັງ​ເປີດ​ໃຫ້​ບໍລິການ​ແກ່​ປະຊາຊົນ​ຕາມ​ປົກກະຕິ, ​ແຕ່​ເຕືອນ​ວ່າຄວາມ​ປອດ​ໄພ​ຂອງ​ເຈົ້າໜ້າ​ທີ່​ຊາວ​ອາ​ເມ​ລິ​ກາ​ທຸກ​ຄົນ​ຂອງ​ສະຖານ​ເອກ​ອັກຄະ​ລັດຖະທູດ ຖື​ເປັນ “ຄວາມ​ຮັບຜິດຊອບ” ຂອງ​ລັດຖະບານ​ຮາ​ວາ​ນາ ທີ່​ມີ​ການ​ຟື້ນຟູ​ການ​ພົວພັນ​ທາງ​ການ​ທູດ​ຢ່າງ​ເປັນ​ທາງ​ການ​ກັບ​ອາ​ເມ​ລິ​ກາ​ໃນ​ເດືອນ​ທັນວາ 2014 ຫລັງ​ຢຸດ​ໄປ​ກວ່າ 5 ທົດ​ສະ​ວັດ.

ທັງ​ນີ້, ລາຍ​ງານ​ຂອງ​ກະຊວງ​ການ​ຕ່າງປະ​ເທດ​ອາ​ເມ​ລິ​ກາລະ​ບຸ​ວ່າ: ​ເຈົ້າໜ້າ​ທີ່​ການ​ທູດ​ປະຈຳ​ກູ​ບາ​ຢ່າງ​ໜ້ອຍ 21 ທ່ານ “ບໍ່​ສະບາຍ​ຢ່າງ​ປິດສະໜາ” ຈາກ​ອາການ​ທີ່ “ຍັງ​ບໍ່​ຮູ້​ສາ​ເຫດ​ແນ່ນອນ” ​ໂດຍ​ເຈົ້າໜ້າ​ທີ່​ບາງ​ທ່ານ​ເລືອກ​ເດີນທາງ​ກັບ​ມາ​ປິ່ນປົວ​ຢູ່​ອາ​ເມ​ລິ​ກາ ​ແລະ ອີກ​ຈຳນວນ​ໜຶ່ງ​ເຂົ້າຮັບ​ການ​ປິ່ນປົວ​ຈາກ​ຄະນະ​ແພດ​ຊາວ​ອາ​ເມ​ລິ​ກາ ​ເຊິ່ງ​ເດີນທາງ​ໄປ​ສະຖານ​ເອກ​ອັກຄະ​ລັດຖະທູດ​ເພື່ອ​ກໍລະນີ​ນີ້​ໂດຍ​ສະ​ເພາະ. ນອກຈາກ​ນີ້ ມີ​ລາຍ​ງານ​ອີກ​ວ່າ​ເຈົ້າໜ້າ​ທີ່​ການ​ທູດ​ຂອງ​ກາ​ນາ​ດາ​ຢູ່​ກູ​ບາ “ອີກ​ຈຳນວນ​ໜຶ່ງ” ບໍ່​ສະບາຍ​ດ້ວຍ​ອາການ​ດຽວ​ກັນ, ສ່ວນ​ປະທານາທິບໍດີ ຣາອູ​ລ ກາສ​ໂຕຣ ​ເຄີຍ​ຢືນຢັນ​ດ້ວຍ​ຕົນ​ເອງ​ວ່າ: ກູ​ບາ​ບໍ່​ມີ​ສ່ວນ​ກ່ຽວຂ້ອງ​ກັບ “​ເຫດການ​ປະຫຼາດ” ທີ່​ເກີດ​ຂຶ້ນ ​ແລະ ພ້ອມ​​ໃຫ້ການ​ຮ່ວມ​ມື​ກັບ​ການ​ສືບສວນ​ຢ່າງ​ເຕັມ​ສ່ວນ.

​ເຖິງ​ຢ່າງ​ໃດກໍ​ຕາມ, ສື່​ທ້ອງ​ຖິ່ນ​ຫຼາຍ​ແຫ່ງ​ຢູ່​ອາ​ເມ​ລິ​ກາ​ລາຍ​ງານ​ໄປ​ໃນ​ທາງ​ດຽວ​ກັນ​ວ່າ: ຝ່າຍ​ສືບສວນ​ນຳ​ໂດຍ​ສຳນັກງານ​ສອບ​ສວນ​ກາງ (FBI) ຕັ້ງສົມມຸດ​ຖານ​ວ່າ​ອາການ​ປ່ວຍ​ທີ່​ເກີດ​ຂຶ້ນ​ ​ເຊິ່ງຮຸນ​ແຮງ​​ເຖິງ​ຂັ້ນສູນ​ເສຍ​ການ​ໄດ້​ຍິນ ​ແລະ ຕ້ອງ​ໃສ່​ເຄື່ອງ​ຊ່ວຍ​ຟັງ ອາດ​ຈະ​ເປັນ​ຜົນ​ມາ​ຈາກ​ອາວຸດ​ຄື້ນຄວາມ​ຖີ່​ສຽງ​ປະສິດທິພາບ​ສູງ ​ເຊິ່ງມີ​ຜູ້ນຳ​ມາ​ຕິດຕັ້ງ​ໃກ້​ກັບ​ເຮືອນ​ພັກ​ຂອງ​ເຈົ້າໜ້າ​ທີ່​ເຫຼົ່າ​ນີ້.

error: Content is protected !!