ຈັບຄົນຮ້າຍລັກລົດຈັກ 9 ຄົນ ເຄື່ອນໄຫວ ລັກມາແລ້ວຫລາຍກວ່າ 20 ຄັນ ເພື່ອສົ່ງ ຂາຍໄປຕ່າງແຂວງ
ໜັງສືພິມຄວາມສະຫງົບ ລາຍງານໃນວັນທີ 27 ກໍລະກົດ 2023 ນີ້ວ່າ: ເຈົ້າໜ້າທີ່ຕໍາຫຼວດວິຊາສະເພາະ ຫ້ອງຕໍາຫຼວດ ກອງບັນຊາການ ປກສ ນະຄອນຫຼວງວຽງຈັນ ສາມາດແກ້ໄຂກຸ່ມແກ້ງລັກລົດຈັກໄດ້ 9 ຄົນ ແລະ ເກັບກູ້ລົດຈັກທີ່ຖືກລັກໄປໄດ້ 20 ຄັນ.
ທ່ານ ພັທ ຄໍາ ທັກຂິນ ຫົວໜ້າພະແນກຕຳຫຼວດສືບສວນ-ສອບສວນຄະດີອາຍາ ຫ້ອງຕຳຫຼວດ ປກສ ນະຄອນຫຼວງວຽງຈັນ ໃຫ້ຮູ້ວ່າ: ໃນລະຫວ່າງວັນທີ 6-22 ກໍລະກົດ 2023 ພະແນກຕໍາຫຼວດສືບສວນ-ສອບສວນຄະດີອາຍາ ໄດ້ແກ້ໄຂກຸ່ມແກ້ງລັກລົດຈັກ ໄດ້ທັງໝົດ 9 ຄົນ ຄື: ທ້າວ ຄຳສິງ ອາຍຸ 49 ປີ, ທ້າວ ອິນທະຈັກ ( ແຈັກ ຫຼື ບິນລີ້ ) ອາຍຸ 16 ປີ, ທ້າວ ອາທິດ ອາຍຸ 18 ປີ, ທ້າວ ລາໂດ້ ຫຼື ໂດ້ ອາຍຸ 21 ປີ, ທ້າວ ວັນນະເດດ ຫຼື ເຕ້ຍ ອາຍຸ 21 ປີ, ທ້າວ ບ໊ອບບີ່ ອາຍຸ 23 ປີ, ທ້າວ ວິໄລເພັດ ຫຼື ກ໊ອບ ອາຍຸ 35 ປີ, ທ້າວ ອານຸລັກ ຫຼື ເຕີ້ ອາຍຸ 23 ປີ, ທ້າວ ພອນ ອາຍຸ 32 ປີ.
ຜ່ານການສືບສວນ-ສອບສວນ ພວກກ່ຽວໄດ້ຮັບສາລະພາບຕໍ່ເຈົ້າໜ້າທີ່ວ່າ: ໄດ້ເຄື່ອນໄຫວລັກລົດຈັກ ຢູ່ນະຄອນຫຼວງວຽງຈັນ ຈຳນວນ 27 ຄັນ, ພາຍຫຼັງທີ່ລັກລົດຈັກໄດ້ແລ້ວ ແມ່ນນໍາໄປຂາຍໃຫ້ບຸກຄົນ ຢູ່ນະຄອນຫຼວງວຽງຈັນ ແລະ ຂາຍໄປຕ່າງແຂວງ, ປັດຈຸບັນ, ເຈົ້າໜ້າທີ່ສາມາດເກັບກູ້ລົດຈັກທີ່ຄົນຮ້າຍລັກໄປ ຄືນມາໄດ້ທັງໝົດ ຈຳນວນ 20 ຄັນ.
