ສປປ ລາວ ໄດ້ເອົາໃຈໃສ່ຢ່າງຕັ້ງໜ້າໃນການພັດທະນາ ແລະ ຫັນປ່ຽນພື້ນຖານໂຄງລ່າງດ້ານດີຈີຕອນໃນຂະແໜງສື່ມວນຊົນ ແລະ ຂໍ້ມູນຂ່າວສານ
ວັນທີ 21 ກັນຍາ 2023, ກອງປະຊຸມລັດຖະມົນຕີຖະແຫລງຂ່າວອາຊຽນ ຄັ້ງທີ 16 ໄດ້ເປີດຂຶ້ນຢ່າງເປັນທາງການທີ່ ນະຄອນ ດານັງ ສສ ຫວຽດນາມ, ຜູ້ແທນຝ່າຍລາວນຳໂດຍ ທ່ານ ໂພສີ ແກ້ວມະນີວົງ ຮອງລັດຖະມົນຕີ ກະຊວງຖະແຫລງຂ່າວ, ວັດທະນະທຳ ແລະ ທ່ອງທ່ຽວ (ຖວທ).
ທ່ານ ໂພສີ ແກ້ວມະນີວົງ ໄດ້ມີຄຳເຫັນຕໍ່ກອງປະຊຸມວ່າ: ສປປ ລາວ ໄດ້ເອົາໃຈໃສ່ຢ່າງຕັ້ງໜ້າໃນການພັດທະນາ ແລະ ຫັນປ່ຽນພື້ນຖານໂຄງລ່າງດ້ານດີຈີຕອນໃນຂະແໜງສື່ມວນຊົນ ແລະ ຂໍ້ມູນຂ່າວສານໃນປະເທດ ໂດຍການຮ່ວມມືກັບບັນດາປະເທດຄູ່ຮ່ວມຍຸດທະສາດໃນພາກພື້ນ ໄປສູ່ເປົ້າໝາຍຂອງລະບົບດີຈີຕອນ ແລະ ທັນສະໄໝ. ຄວາມພະຍາຍາມສະເພາະນີ້ແມ່ນໄດ້ດໍາເນີນໂດຍຜ່ານການຮ່ວມມືລະຫວ່າງກະຊວງຖະແຫລງຂ່າວ, ວັດທະນະທໍາ ແລະ ທ່ອງທ່ຽວ ແລະ ກະຊວງເຕັກໂນໂລຊີ ແລະ ການສື່ສານ ແຫ່ງ ສປປ ລາວ ເພື່ອສ້າງເວທີທີ່ເປັນມິດກັບຜູ້ໃຊ້ຫລາຍຂຶ້ນເພື່ອໃຫ້ປະຊາຊົນທຸກຄົນໄດ້ຮັບສິດທິພື້ນຖານໃນການໄດ້ຮັບຂໍ້ມູນຂ່າວສານທີ່ຖືກຕ້ອງໂດຍສະເພາະ. ໃນເວລາທີ່ມີການພັດທະນາຢ່າງວ່ອງໄວຂອງເຕັກໂນໂລຊີຂໍ້ມູນຂ່າວສານ.
ຕາມສະຖິຕິປີຜ່ານມານີ້, ປະຊາກອນລາວເກືອບ 70% ໄດ້ເຊື່ອມຕໍ່ກັບເຄືອຂ່າຍອິນເຕີເນັດ ແລະ 5 ລ້ານກວ່າຄົນໄດ້ນຳໃຊ້ສື່ດີຈີຕອນ ສ່ວນໃຫຍ່ແມ່ນຄົນຮຸ່ນໜຸ່ມ ນີ້ສະແດງໃຫ້ເຫັນເຖິງການຂະຫຍາຍຕົວຢ່າງໄວວາຂອງຜູ້ຊົມໃຊ້ສື່ມວນຊົນດີຈີຕອນ, ຮຽກຮ້ອງໃຫ້ມີການບໍລິການທີ່ດີກວ່າ, ການປັບປຸງໂຄງສ້າງພື້ນຖານ ແລະ ເນື້ອຫາ ເພື່ອຮັບປະກັນການເຂົ້າເຖິງຂໍ້ມູນຂ່າວສານທີ່ມີປະສິດທິພາບຫລາຍຂຶ້ນໂດຍປະຊາຊົນທັງໝົດ. ນີ້ແມ່ນສ່ວນໜຶ່ງຂອງຄວາມພະຍາຍາມເພື່ອປັບປຸງການພັດທະນາເສດຖະກິດສັງຄົມຂອງລາວ ແລະ ຄຸນນະພາບຊີວິດລວມຂອງປະຊາຊົນ. ນອກຈາກຄວາມຄືບໜ້າໃນທາງບວກດັ່ງກ່າວ ຍັງມີສິ່ງທ້າທາຍທີ່ເກີດຂຶ້ນບໍ່ພຽງແຕ່ແຕ່ລະປະເທດເທົ່ານັ້ນ ຫາກຍັງມີຢູ່ໃນລະດັບພາກພື້ນ ແລະ ສາກົນເຊັ່ນ: ຂ່າວປອມ ທີ່ເປັນຂ່າວບໍ່ຖືກຕ້ອງ, ເປັນເຫດໃຫ້ເກີດຄວາມເຂົ້າໃຈຜິດ ແລະ ສັບສົນໃນສັງຄົມ, ເປັນອັນຕະລາຍຕໍ່ເສດຖະກິດ-ສັງຄົມ, ການພັດທະນາ ແລະ ຄວາມປອດໄພ. ອັນນີ້ຮຽກຮ້ອງໃຫ້ມີຄວາມພະຍາຍາມລວມຂອງບັນດາປະເທດສະມາຊິກອາຊຽນໃນການດຳເນີນການຮ່ວມກັນເພື່ອແກ້ໄຂຄວາມກັງວົນດັ່ງກ່າວ.
ຕໍ່ກັບບັນຫາດັ່ງກ່າວ, ສປປ ລາວ ໄດ້ສ້າງຕັ້ງທີມງານ ທີ່ມີຊື່ວ່າ: ທີມຕອບໂຕ້ສຸກເສີນຄອມພິວເຕີ (Lao CERT). ກຸ່ມນີ້ປະກອບດ້ວຍຜູ້ຕາງໜ້າບັນດາກະຊວງ, ອຳນາດການປົກຄອງຕ່າງໆ ເຊັ່ນ: (1) ກົມສື່ມວນຊົນ ກະຊວງ ຖວທ; (2) ສູນອິນເຕີເນັດແຫ່ງຊາດ, ກະຊວງເຕັກໂນໂລຊີ ແລະ ການສື່ສານ; (3) ກົມປະຊາສໍາພັນພາຍໃຕ້ສໍານັກງານນາຍົກລັດຖະມົນຕີ; (4) ກົມຂ່າວ, ກະຊວງການຕ່າງປະເທດ; (5) ກະຊວງປ້ອງກັນປະເທດ; (6) ກະຊວງປ້ອງກັນຄວາມສະຫງົບ; ແລະ (7) ສະມາຄົມນັກຂ່າວລາວ.
ທີມງານດັ່ງກ່າວມີໜ້າທີ່ຕິດຕາມສະຖານະການທັງໝົດ ໂດຍການຕິດຕາມ ແລະ ກວດສອບແຫຼ່ງຂ່າວຢ່າງໃກ້ຊິດ ພ້ອມທັງການຕອບໂຕ້ຂອງສະມາຊິກປະຊາຊົນ ໂດຍປະຕິບັດຕາມກົດໝາຍວ່າດ້ວຍການຕ້ານອາດຊະຍາກຳທາງອິນເຕີເນັດ ແລະ ກົດໝາຍວ່າດ້ວຍສື່ມວນຊົນຂອງລາວ ແລະ ອື່ນໆ. ຕໍ່ກັບບັນຫາດັ່ງກ່າວ, ສປປ ລາວ ໄດ້ມີຄວາມຄືບໜ້າຢ່າງໃຫຍ່ຫຼວງໃນການສະໜອງ ແລະ ແລກປ່ຽນບົດຮຽນ, ປະສົບການ ແລະ ຄວາມຮູ້ໃຫ້ແກ່ປະຊາຊົນທົ່ວໄປຜ່ານຫຼາຍເວທີ, ເພື່ອສ້າງປະຊາຄົມທີ່ແຂງແກ່ນ ແລະ ຕອບສະໜອງດ້ວຍການດຳເນີນການຝຶກອົບຮົມ, ກອງປະຊຸມ, ສຳມະນາ ແລະ ເຜີຍແຜ່ໃນທົ່ວປະເທດ. ເຫຼົ່ານີ້ລວມມີ: 1. ກອງປະຊຸມຄວາມຮູ້ທາງດ້ານສື່ດີຈີຕອລອອນລາຍ ແລະ ອອບລາຍ, 2. ກອງປະຊຸມສຳມະນາກ່ຽວກັບຜົນປະໂຫຍດຂອງສື່ສັງຄົມໃນການຊຸກຍູ້ການພັດທະນາເສດຖະກິດ-ສັງຄົມຂອງຊາດ ລວມທັງບັນຫາທາງລົບ, ເພື່ອສະເຫຼີມສະຫຼອງວັນສື່ມວນຊົນ ແລ ະສື່ມວນຊົນຄົບຮອບ 73 ປີ, 3. ກອງປະຊຸມແຫ່ງຊາດກ່ຽວກັບການເຊື່ອມໂຍງສື່ພື້ນເມືອງ ແລະ ສື່ໃໝ່, 4. ເຜີຍແຜ່ວຽກງານຫັນເປັນດີຈີຕອນປະຈຳປີຢູ່ບັນດາແຂວງ, 5. ໂຄສະນາເຕືອນໄພໃນຊ່ອງໂທລະພາບ, ລາຍການວິທະຍຸ, ສື່ອອນລາຍ, ສື່ສິ່ງພິມ ແລະ ເວັບໄຊຂ່າວໃນ ສປປ ລາວ. ຂໍສະໜັບສະໜູນຖະແຫລງການວິໄສທັດ AMRI “ອາຊຽນ 2030: ກ້າວໄປສູ່ຂະແໜງຂໍ້ມູນຂ່າວສານ ແລະ ສື່ມວນຊົນທີ່ມີການຫັນປ່ຽນ, ຕອບສະໜອງ ແລະ ຢືດຢຸ່ນ”; ຖະແຫລງການຈາກນະຄອນດານັງ ກ່ຽວກັບ “ສື່ມວນຊົນ: ຈາກຂໍ້ມູນຂ່າວສານສູ່ຄວາມຮູ້ເພື່ອຄວາມຢືດຢຸ່ນ ແລະ ຕອບສະໜອງຂອງອາຊຽນ”; ແລະ ຂໍ້ແນະນຳກ່ຽວກັບການຄຸ້ມຄອງຂໍ້ມູນຂ່າວສານຂອງລັດຖະບານໃນການຕ້ານຂ່າວປອມ ແລະ ການເຜີຍແຜ່ຂ່າວທີ່ບໍ່ມີມູນຄວາມຈິງ.
ເອກະສານເຫຼົ່ານີ້ບໍ່ພຽງແຕ່ສອດຄ່ອງກັບບັນດາເອກະສານທີ່ກ່ຽວຂ້ອງຂອງອາຊຽນ, ເຊັ່ນ: ແຜນແມ່ບົດການສື່ສານອາຊຽນ ໄລຍະທີ 2, ແຜນຍຸດທະສາດອາຊຽນດ້ານຂໍ້ມູນຂ່າວສານ ແລະ ສື່ມວນຊົນ 2016-2025 ແລະ ASCC Blueprint 2025, ແຕ່ຍັງສະໜັບສະໜູນແຜນພັດທະນາເສດຖະກິດດີຈີຕອນແຫ່ງຊາດຂອງລາວ 2021-2025 ແລະ ແຜນພັດທະນາ 5 ປີ ຂອງກະຊວງຖະແຫລງຂ່າວ, ວັດທະນະທຳ ແລະ ທ່ອງທ່ຽວ ໄລຍະ 2021-2025. ສະນັ້ນ, ສປປ ລາວ ພ້ອມແລ້ວທີ່ຈະຮ່ວມມືຢ່າງ ແໜ້ນແຟ້ນກັບບັນດາປະເທດສະມາຊິກອາຊຽນ ແລະ ປະເທດຄູ່ເຈລະຈາໃນຊຸມປີຕໍ່ໜ້າ ເພື່ອເສີມຂະຫຍາຍການຮ່ວມມືໃນໂຄງການຮ່ວມມືຕ່າງໆ ກ້າວໄປສູ່ປະຊາຄົມດີຈີຕອນອາຊຽນ.
ຂໍຖືໂອກາດອັນພິເສດນີ້ມາແຈ້ງໃຫ້ທ່ານຊາບວ່າ, ສປປ ລາວ ຈະໄດ້ເປັນປະທານອາຊຽນ ໃນປີ 2024. ພ້ອມດຽວກັນນັ້ນ, ສປປ ລາວ ຍັງຈະໄດ້ເປີດຂະບວນການສົ່ງເສີມການທ່ອງທ່ຽວປີທ່ອງທ່ຽວລາວ 2024 ຊຶ່ງມີການຈັດກິດຈະກຳການທ່ອງທ່ຽວທີ່ຫຼາກຫຼາຍ ແລະ ກິດຈະກໍາງານບຸນຕະຫລອດປີສໍາລັບທ່ານທັງໝົດທີ່ຈະມີຄວາມສຸກ.
