10 ເຄັດລັບການບຳລຸງຮັກສາ ແລະ ຍືດອາຍຸການໃຊ້ງານລົດກະບະ

- advert banner 728 90 728x90 - 10 ເຄັດລັບການບຳລຸງຮັກສາ ແລະ ຍືດອາຍຸການໃຊ້ງານລົດກະບະ

ມື້ນີ້ພວກເຮົາມີ 10 ເຄັດລັບໃນການຖະໜອມລົດກະບະໃຫ້ໃຊ້ງານດີ ຄົງສະພາບຄືໃໝ່ຢູ່ສະເໝີມາແນະນຳທ່ານ.

- new3 - 10 ເຄັດລັບການບຳລຸງຮັກສາ ແລະ ຍືດອາຍຸການໃຊ້ງານລົດກະບະ

– ຢ່າລືມປ່ຽນນຳ້ມັນເຄື່ອງຕາມໄລຍະທີ່ກຳນົດ : ການປ່ຽນຖ່າຍນຳ້ມັນເຄື່ອງ ແລະ ກອງນຳ້ມັນເຄື່ອງຕາມໄລຍະທາງ ຫລື ເວລາທີ່ຜູ້ຜະລິດລົດແຕ່ລະລຸ້ນກຳນົດໄວ້ໃນຄູ່ມືການໃຊ້ງານປະຈຳລົດແຕ່ລະລຸ້ນ ເປັນເລື່ອງພື້ນຖານທີ່ສຳຄັນຫລາຍເພື່ອຊ່ວຍຍືດອາຍຸການໃຊ້ງານຂອງເຄື່ອງຈັກໃຫ້ຢູ່ຄູ່ກັບລົດຂອງເຮົາຢ່າງຍາວນານ.

– ສະຫລັບຢາງຕາມໄລຍະ : ຍ້ອນການໝູນຂອງຢາງນັ້ນສຳຄັນຫລາຍ ເຊິ່ງເຮົາມັກໃຫ້ຄວາມສຳຄັນກັບການປ່ຽນຖ່າຍນຳ້ມັນເຄື່ອງຕາມກຳນົດເປັນອັນດັບທຳອິດ ເຊິ່ງເປັນສິ່ງທີ່ຖືກຕ້ອງ ແຕ່ການສະຫລັບຢາງນັ້ນຈະເຮັດໃຫ້ຢາງເສື່ອມສະພາບຢ່າງສະເໝີກັນ ເພາະໂດຍທົ່ວໄປນັ້ນ ຢາງລໍ້ໜ້າຈະເສື່ອມສະພາບຫລາຍກ່ວາ ທັງນີ້ອາດຂຶ້ນຢູ່ກັບລັກສະນະການໃຊ້ງານ ແລະ ການຂັບຂີ່ນຳ.

– ຮັກສາໂຄງສ້າງຢາງເພື່ອຮັກສາຄວາມດຸ່ນດ່ຽງຂອງການໝູນ : ຂະນະທີ່ລໍ້ລົດໝູນນັ້ນຄວນຈະຕ້ອງມີຄວາມດຸ່ນດ່ຽງ ເພາະ ຢາງທີ່ດຸ່ນດ່ຽງຈະເຮັດໃຫ້ມີການກະຈາຍນຳ້ໜັກເທິງເພົາ 2 ດ້ານນັ້ນເທົ່າກັນ ທັງນີ້ສະພາບເສັ້ນທາງທີ່ເປັນຂຸມ ແລະ ຮ່ອງ ຫລື ການໃຊ້ງານແບບອັອບໂຣດຈະຍິ່ງເຮັດໃຫ້ຢາງລົດຂາດຄວາມດຸ່ນດ່ຽງຍິ່ງຂຶ້ນ. ເມື່ອຢາງລົດສູນເສຍຄວາມດຸ່ນດ່ຽງຈະເຮັດໃຫ້ ເກີດການສັ່ນຂະນະຂັບຂີ່ເທິງຖະໜົນ ເຊິ່ງເປັນສາເຫດໃຫ້ລະບົບກັນສະເທືອນມີອາຍຸການໃຊ້ງານສັ້ນລົງ ລວມເຖິງຈະຕ້ອງປ່ຽນ ຢາງໃໝ່ໄວຂຶ້ນຫາກມີໂຄງສ້າງຢາງເສຍຫາຍ.

– ການຕັ້ງສູນຖ່ວງລໍ້ : ການຂັບຂີ່ເທິງເສັ້ນທາງເປັນຂຸມຢ່າງຮຸນແຮງດ້ວຍຄວາມໄວສູງນັ້ນຈະເຮັດໃຫ້ສູນລໍ້ຜິດດ່ຽງໄປຈາກເກົ່າ ເຊິ່ງເປັນສາເຫດສຳຄັນທີ່ເຮັດໃຫ້ຢາງເສື່ອມສະພາບໄວ ໂດຍທົ່ວໄປແລ້ວຈະເຮັດໃຫ້ກິນນຳ້ມັນເພີ່ມຂຶ້ນ ແລະ ມີການບັງຄັບຄວບຄຸມບໍ່ດີ. ການຕັ້ງສູນລໍ້ໃຫ້ຖືກຕ້ອງຈະຊ່ວຍຍືດອາຍຸຂອງລະບົບກັນສະເທືອນໄດ້ອີກວິທີໜຶ່ງ.

– ກວດເຊັກລະບົບໄຟ : ຢ່າງໜ້ອຍເດືອນລະເທື່ອເຮົາຄວນສະຫລະເວລາເພື່ອກວດເຊັກລົດເປັນປະຈຳ ຫາກພົບຄວາມຜິດປົກກະຕິແມ່ນແຕ່ໜ້ອຍດຽວກໍຄວນຈະຟ້າວດຳເນີນການແກ້ໄຂກ່ອນທີ່ບັນຫາຈະລຸກລາມຫລາຍຂຶ້ນ ໂຕຢ່າງແມ່ນກວດເຊັກລະບົບໄຟ ທັງພາຍໃນ ແລະ ພາຍນອກວ່າຍັງເຮັດວຽກ ຫລື ແຈ້ງຕາມປົກກະຕິຫລືບໍ່, ແສງໄຟທີ່ສ່ອງນັ້ນແຈ້ງໜ້ອຍກ່ວາທີ່ຄວນຈະເປັນອາດກຳລັງສະແດງເຖິງຄວາມຜິດປົກກະຕິຂອງລະບົບໄຟຟ້າຂອງລົດ.

- lattana 1 - 10 ເຄັດລັບການບຳລຸງຮັກສາ ແລະ ຍືດອາຍຸການໃຊ້ງານລົດກະບະ

– ກວດສອບຂອງແຫລວໃຫ້ຢູ່ໃນລະດັບທີ່ເໝາະສົມ : ການເຊັກລະດັບຂອງແຫລວໃຫ້ຢູ່ໃນປະລິມານທີ່ຖືກຕ້ອງ ແລະ ເໝາະສົມເປັນສິ່ງທີ່ສຳຄັນ ແລະ ຈຳເປັນທີ່ຄວນເຮັດທຳອິດແມ່ນການກວດເຊັກລະດັບນຳ້ມັນເຄື່ອງ ໂດຍທົ່ວໄປສາມາດວັດແທກຫລັງຈາກທີ່ມອດເຄື່ອງຈັກ (ອຸນຫະພູມປົກກະຕິ) 1 – 5 ນາທີ (ຫລືຕາມທີ່ຄູ່ມືປະຈຳລົດລະບຸ). ຕໍ່ມາແມ່ນລະດັບນຳ້ຫລໍ່ເຢັນສຳລັບເຄື່ອງຈັກເພື່ອປ້ອງກັນການໂອເວີຮີດຂອງເຄື່ອງຈັກ ໃນກໍລະນີທີ່ລະດັບນຳ້ຫລຸດລົງຫລາຍຈົນຜິດປົກກະຕິ ເຊິ່ງອາດເກີດຈາກການຮົ່ວຊຶມ ຖ້າຫາກຈຳເປັນຕ້ອງມີການຕື່ມນຳ້ຢາຫລໍ່ເຢັນ ຫລື ຄລູແລນ (Coolant) ຄວນໃຊ້ໃຫ້ກົງຕາມທີ່ຜູ້ຜະລິດກຳນົດໄວ້ໃນຄູ່ມືປະຈຳລົດ ແລະ ສຸດທ້າຍລະດັບນຳ້ລ້າງແວ່ນຄວນຢູ່ໃນລະດັບທີ່ເໝາະສົມຄືກັນ.

– ເຄື່ອງຈັກຕ້ອງການອາກາດທີ່ສະອາດ : ອາກາດທີ່ສະອາດແມ່ນສິ່ງທີ່ຈຳເປັນສຳລັບເຄື່ອງຈັກ ນັ້ນເປັນສາເຫດທີ່ຕ້ອງມີໄສ້ ກອງອາກາດເພື່ອກອງຂີ້ຝຸ່ນບໍ່ໃຫ້ເຂົ້າໄປສູ່ຫ້ອງເຜົາໄໝ້ໃນເຄື່ອງຈັກ ເຊິ່ງໄສ້ກອງອາກາດນີ້ອາດເກີດການອັດຕັນໄດ້ ໂດຍປົກກະຕິແລ້ວໄສ້ກອງອາກາດມັກຈະມີອາຍຸການໃຊ້ງານ 20.000 – 40.000 ກິໂລແມັດ (ອາດແຕກ ຕ່າງກັນໄປຕາມຜູ້ຜະລິດແຕ່ລະລຸ້ນ) ຫລື ອາດມີຄວາມຈຳເປັນຕ້ອງປ່ຽນໄວກ່ວານັ້ນຫາກໃຊ້ງານໃນພື້ນທີ່ທີ່ມີຂີ້ຝຸ່ນຫລາຍເປັນພິເສດ ເຊິ່ງໄສ້ກອງອາກາດທີ່ສະອາດນັ້ນບໍ່ພຽງແຕ່ຈະຊ່ວຍຍືດອາຍຸການໃຊ້ງານຂອງເຄື່ອງຈັກ ແຕ່ຍັງມີຜົນຕໍ່ອັດຕາເລັ່ງ ແລະ ອັດຕາສິ້ນເປືອງທີ່ດີນຳ.

– ບຳລຸງຮັກສາຕາມລັກສະນະການໃຊ້ງານ : ສິ່ງໜຶ່ງທີ່ສຳຄັນສຳລັບການດູແລຮັກສາລົດກະບະສຸດຮັກຂອງເຮົາໃນໄລຍະຍາວກໍແມ່ນຕ້ອງເຂົ້າໃຈວ່າລັກສະນະການໃຊ້ງານນັ້ນເປັນແນວໃດ ເຊັ່ນ : ຕ້ອງບັນທຸກສິ່ງຂອງໜັກຢູ່ຕະຫລອດເວລາ, ແລ່ນເທິງເສັ້ນທາງກັນດານເປັນປະຈຳ, ໃຊ້ງານໃນເມືອງ ຫລື ແມ່ນແຕ່ລົດທີ່ຈອດປະໄວ້ບໍ່ຄ່ອຍໄດ້ໃຊ້ກໍຕາມ ທັງນີ້ເພື່ອການດູແລບຳລຸງຮັກສາ ແລະ ກວດເຊັກໃຫ້ເໝາະສົມຕາມລັກສະນະການໃຊ້ງານ ເຊິ່ງອາດແຕກຕ່າງກັນໄປ ເພາະການໃຊ້ງານບາງປະເພດນັ້ນ ຕ້ອງການບຳລຸງຮັກສາຫລາຍເປັນພິເສດ.

– ຢ່າລືມກວດເຊັກຕາມກຳນົດ ຖ້າມີບາງສິ່ງທີ່ສາມາດຊ່ວຍໃຫ້ລົດກະບະຂອງທ່ານມີອາຍຸການໃຊ້ງານທີ່ຍາວນານໄດ້ຫລາຍທີ່ສຸດ ນັ້ນກໍແມ່ນການອາໄສຊ່າງທີ່ຊຳນານ ບໍ່ວ່າຈະແມ່ນໂຕແທນສູນບໍລິການ ຫລື ອູ່ສ້ອມແປງທົ່ວໄປ ເຊິ່ງຊ່າງທີ່ມີຄວາມຊຳນານ ຫລື ປະສົບການໃນການເບິ່ງແຍງຮັກສາລົດກະບະໄດ້ໂດຍກົງ.

– ຄູ່ມືປະຈຳລົດແມ່ນສິ່ງສຳຄັນ ທຸກສິ່ງທຸກຢ່າງທີ່ຈຳເປັນສຳລັບການເບິ່ງແຍງຮັກສາລົດກະບະຂອງທ່ານໃຫ້ສາມາດໃຊ້ງານໄດ້ດີນັ້ນຖືກແນະນຳໄວ້ໃນຄູ່ມືປະຈຳລົດຕັ້ງແຕ່ອອກມາຈາກໂຮງງານແລ້ວ. ການເບິ່ງແຍງຮັກສາລົດກະບະບໍ່ແມ່ນເລື່ອງຍາກ ຫາກຜູ້ເປັນເຈົ້າຂອງໃຫ້ຄວາມເອົາໃຈໃສ່ ແລະ ຢ່າລືມອ່ານປື້ມຄູ່ມືປະຈຳລົດຂອງໂຕເອງນຳ.

error: Content is protected !!