ປກສ ເມືອງປາກຊ່ອງ ຈັບຜູ້ຄ້າ-ຂາຍຢາເສບຕິດ 6 ຄົນ ພ້ອມ ຂອງກາງຢາບ້າ 5.270 ກວ່າເມັດ
ວັນທີ 24 ມັງກອນ 2024ນີ້, ເຈົ້າໜ້າທີ່ວິຊາສະເພາະພະແນກຕໍາຫລວດ ປກສ ເມືອງປາກຊ່ອງ ແຂວງຈຳປາສັກ ໄດ້ເຂົ້າມ້າງກຸ່ມຄົນທີ່ເຄື່ອນໄຫວມົ້ວສຸມເສບຢາ ແລະ ຄ້າ-ຂາຍ ຢາເສບຕິດ ຢູ່ບ້ານ ເຊນໍ້ານ້ອຍ ເມືອງ ປາກຊ່ອງ ສາມາດຈັບກຸມໄດ້ 3 ຄົນ ຄື: ນາງ ກອງ ອາຍຸ 28 ປີ, ຊາວສວນ ບ້ານເຊນໍ້ານ້ອຍ ເມືອງປາກຊ່ອງ ໃນຂໍ້ຫາ ເສບ ແລະ ຄ້າ-ຂາຍຢາບ້າ ພ້ອມຂອງກາງ 818 ເມັດ, ໂທລະສັບ 1 ໜ່ວຍ, ເງິນກີບ 21 ລ້ານກວ່າກີບ ພ້ອມສິ່ງຂອງມີຄ່າອີກຈຳນວນໜຶ່ງ; ທ້າວ ແພະ ອາຍຸ 24 ປີ ບ້ານທົ່ງຫວາຍ ແລະ ທ້າວ ບົວໄລ ອາຍຸ 20 ປີ ຊາວສວນ ຢູ່ບ້ານ ໜອງເຂືອງໃຫຍ່ ເມືອງປາກຊ່ອງ ໃນຂໍ້ຫາເສບຢາເສບຕິດ.
ຜ່ານການສືບສວນ-ສອບສວນຂະຫຍາຍຜົນສາມາດກັກຕົວຜູ້ຮ່ວມຂະບວນການໄດ້ເພີ່ມອີກ 3 ຄົນ ຄື: ນາງ ຫ່ຽນ ຫລື ເສືອງອາຍຸ 51 ປີ ຊາວສວນ ຂໍ້ກ່າວຫາເສບ ແລະ ຄ້າ-ຂາຍຢາບ້າ ພ້ອມເຄື່ອງຂອງກາງ 62 ເມັດ, ໂທລະສັບຕັ້ງໂຕະຈຳນວນ 1 ໜ່ວຍ; ທ້າວ ຍອມ ອາຍຸ 28 ປີ ຊາວສວນ ໃນຂໍ້ຫາເສບ ແລະ ຄ້າ-ຂາຍຢາບ້າ ພ້ອມເຄື່ອງຂອງກາງ 4.390 ກວ່າເມັດ ແລະ ທ້າວ ເບີ່ງ ອາຍຸ 40 ປີ ຊາວສວນ ໃນຂໍ້ຫາເສບຢາເສບຕິດ. ທັງສາມຄົນເປັນປະຊາຊົນຢູ່ ບ້ານທົ່ງກາຫຼົງ ເມືອງປາກຊ່ອງ ແຂວງຈຳປາສັກ, ປັດຈຸບັນຄະດີດັ່ງກ່າວ ຍັງຢູ່ໃນຂັ້ນຕອນສືບສວນ-ສອບສວນ ຂອງເຈົ້າໜ້າທີ່ ເພື່ອຊອກຫາຜູ້ຮ່ວມຂະບວນການ ມາດຳເນີນຄະດີຕາມຂັ້ນຕອນຂອງກົດໝາຍ.
