ຫລາຍພາກສ່ວນອຸປະຖໍາບຸນອອກພັນສາ ແລະ ຊ່ວງເຮືອປະເພນີທ່າວັດຈັນ.
ໃນວັນທີ 2 ຕຸລານີ້, ຢູ່ທີ່ຫ້ອງການປົກຄອງເມືອງຈັນທະບູລີນະຄອນຫລວງວຽງຈັນ, ໄດ້ມີຫລາຍພາກສ່ວນຈາກບໍລິສັດ, ຫ້າງຮ້ານ ແລະ ບຸກຄົນ ໄດ້ມອບເງີນ ແລະ ເຄື່ອງອຸປະໂພກຕ່າງໆລວມມີມູນຄ່າຫລາຍກວ່າ 400 ລ້ານກີບ ເພື່ອສະໜັບສະໜູນການຈັດງານບຸນອອກພັນສາປະວໍລະນາ ແລະ ຊ່ວງເຮືອປະເພນີຢູ່ທ່າວັດຈັນປະຈຳປີ 2017, ຊຶ່ງຮັບໂດຍທ່ານນາງ ບົວລອນ ວົງດາລາແສນ ເຈົ້າເມືອງຈັນທະບູລີ, ພ້ອມທັງຍົກໃຫ້ເຫັນວ່າ: ບຸນອອກພັນສາ ແລະ ຊ່ວງເຮືອປະຈຳປີ, ແມ່ນປະເພນີທີ່ສືບທອດກັນມາແຕ່ດົນນານ, ເຊິ່ງປີນີ້ແມ່ນເລີ່ມແຕ່ວັນທີ 4-6 ຕຸລາ, ໂດຍມີຫລາຍກິດຈະກຳຄື: ພິທີຕັກບາດຖະຫວາຍສັງຄະທານ, ຈູດບັ້ງໄຟດອກຢູ່ອານຸສາວະລີເຈົ້າອານຸວົງ ແລະ ຢູ່ແຄມຂອງທ່າວັດຈັນ, ການໄຫລເຮືອໄຟໂຄກ ແລະ ຄົບງັນຟັງການຂັບລຳ, ການຊ່ວງເຮືອ, ການວາງສະແດງ ແລະ ຂາຍສິນຄ້າຢູ່ຕາມຂອບເຂດສວນເຈົ້າອານຸວົງ, ແຄມຂອງ, ແຄມຖະໜົນຟ້າງຸ່ມ ແລະ ບ່ອນທີ່ເໝາະສົມ. ແນວໃດກໍດີ, ເພື່ອຮັກສາຄວາມສະຫງົບ, ຄວາມເປັນລະບຽບຮຽບຮ້ອຍ ແລະ ວັດທະນາທໍາປະເພນີອັນດີງາມຂອງຊາດ, ສະນັ້ນຄະນະກຳມະການຈັດງານໄດ້ຮຽກຮ້ອງມາຍັງປະຊາຊົນທີ່ຈະມາທ່ຽວງານຫ້າມຂາຍ ຫລື ນຳເອົາອາວຸດທຸກປະເພດເຂົ້າໄປໃນງານຢ່າງເດັດຂາດ, ຫ້າມນຳເອົາຢາເສບຕິດ, ທາດເບື່ອ, ສິ່ງເກີດສຽງດັງເກີນຂອບເຂດ, ບັ້ງກະໂພກເຂົ້າມາຈູດ ແລະ ວາງຂາຍພາຍໃນງານຢ່າງເດັດຂາດ, ຫ້າມນຳເອົາຜະລິດຕະພັນທີ່ລອກແບບຜ້າສິ້ນລາວ ຫລື ເຄື່ອງນຸ່ງລາວມາຂາຍ ແລະ ຈຳໜ່າຍພາຍໃນງານຫ້າມວາງຂາຍເຄື່ອງເກີນຂອບເຂດທີ່ຄະນະກຳມະການຈັດງານ ໄດ້ກຳນົດໃຫ້, ຫ້າມດື່ມສິ່ງມືນເມົາ, ຫ້າມຫລີ້ນການພະນັນທຸກປະເພດ ແລະ ອາລະວາດຕີກັນ. ຊຶ່ງຖ້າຫາກບຸກຄົນໃດຝ່າຝືນຈະຖືກປັບໃໝແຕ່ 50 ພັນກີບຫາ 1 ລ້ານກີບ, ພ້ອມທັງຈັບຕົວໄປດໍາເນີນຄະດີຕາມລະບຽບກົດໝາຍ.
