ກຳປູເຈຍຂຶ້ນຄ່າແຮງງານ ກຳມະກອນໂຮງງານຕັດຫຍິບ
ລັດຖະບານກຳປູເຈຍປະກາດໃນວັນທີ 6 ຕຸລາ ຂຶ້ນຄ່າແຮງຂັ້ນຕໍ່າສຳລັບກຳມະກອນທີ່ເຮັດວຽກໃນໂຮງງານຕັດຫຍິບ 11% ເປັນເດືອນລະ 17 ໂດລາສະຫະລັດ, ຂະນະທີ່ນາຍົກລັດຖະມົນຕີ ຮຸນເຊນ ເລັ່ງຈະໄດ້ສຽງສະໜັບສະໜູນກ່ອນການເລືອກຕັ້ງທົ່ວໄປໃນປີໜ້າເຊັ່ນກັນ.
ກະຊວງແຮງງານກຳປູເຈຍ ກ່າວໃນຖະແຫລງການວ່າ: ນາຍົກລັດຖະມົນຕີ ຮຸນເຊນ ໃຫ້ຄວາມສົນໃຈ ແລະ ເປັນຫ່ວງສະຫວັດດີການ ແລະ ການເປັນຢູ່ຂອງກຳມະກອນສະເໝີ ແລະ ການປັບຄ່າແຮງຂັ້ນຕໍ່າໃນຄັ້ງນີ້ຈະມີຜົນບັງຄັບໃຊ້ແຕ່ວັນທີ 1 ມັງກອນປີໜ້າເປັນຕົ້ນໄປ. ນອກຈາກນັ້ນ ລັດຖະບານຈະຍັງຢຸດການເກັບພາສີຜົນກຳໄລຂອງອຸດສາຫະກຳຕັດຫຍິບ ແລະ ຍົກເລີກຄ່າທຳນຽມການສົ່ງອອກດ້ານນີ້. ກ່ອນໜ້ານີ້ ກະຊວງແຮງງານປະກາດວ່າ: ກອງປະຊຸມນາຍຈ້າງ, ສະຫະພາບແຮງງານ ແລະ ລັດຖະບານ ເຫັນພ້ອມເພີ່ມຄ່າແຮງຂັ້ນຕໍ່າເປັນ 165 ໂດລາ, ແຕ່ມາປະກາດໃນເວລາຕໍ່ມາວ່າ: ນາຍົກລັດຖະມົນຕີຕັດສິນໃຈເພີ່ມໃຫ້ອີກ 5 ໂດລາ ເປັນ 170 ໂດລາ. ກຳປູເຈຍຈະຈັດການເລືອກຕັ້ງທົ່ວໄປໃນປີໜ້າ ແລະ ຈະເປັນການທົດສອບການຄອງອຳນາດຂອງທ່ານ ຮຸນເຊນ ທີ່ດຳລົງຕຳແໜ່ງນາຍົກລັດຖະມົນຕີມາເຖິງ 32 ປີ ແລະ ແຕ່ເດືອນສິງຫາຜ່ານມາ, ທ່ານ ຮຸນເຊນ ໄດ້ພົບປະກັບບັນດາກຳມະກອນໂຮງງານຕັດຫຍິບເປັນປະຈຳທຸກອາທິດ ແລະ ໃນໄລຍະຜ່ານມາ, ທ່ານໄດ້ພົບປະກັບບັນດາກຳມະກອນກຸ່ມນີ້ເກືອບທຸກວັນ, ໄປຮັບປະທານອາຫານນຳກັນ ໂດຍໄລຍະກ່ອນໜ້ານີ້ ກຳມະກອນໂຮງງານຕັດຫຍິບປະທະກັບຕຳຫລວດຫລາຍຄັ້ງ ແລະ ສະຫະພາບແຮງງານບາງແຫ່ງເຂົ້າຮ່ວມກັບກຸ່ມຝ່າຍຄ້ານ ເພື່ອປະທ້ວງນະໂຍບາຍຂອງລັດຖະບານທ່ານ ຮຸນເຊນ. ສຳລັບຄ່າຈ້າງຂັ້ນຕໍ່າຂອງກຳມະກອນໃນໂຮງງານຕັດຫຍິບເພີ່ມຂຶ້ນ 150% ໃນໄລຍະ 5 ປີຜ່ານມາ ຈາກ 61 ໂດລາ ໃນປີ 2012 ເປັນ 153 ໂດລາ ໃນປັດຈຸບັນ, ອຸດສາຫະກຳຕັດຫຍິບໃນກຳປູເຈຍຈ້າງກຳມະກອນປະມານ 700.000 ຄົນ ເຊິ່ງເປັນອຸດສາຫະກຳສຳຄັນທີ່ຊ່ວຍຮັກສາເສດຖະກິດຂອງກຳປູເຈຍ.
