ອິນໂດເນເຊຍຜະເຊີນນໍ້າຖ້ວມ ແລະ ດິນເຈື່ອນ ແຂວງສຸມາດຕາຕາເວັນຕົກ ເສຍຊີວິດ-ສູນຫາຍ 27 ຄົນ
ທາງການອິນໂດເນເຊຍລາຍງານວ່າ: ມີຜູ້ເສຍຊີວິດແລ້ວຢ່າງໜ້ອຍ 21 ຄົນ ແລະ ສູນຫາຍ 6 ຄົນ ຈາກນໍ້າຖ້ວມ ແລະ ດິນເຈື່ອນຢູ່ແຂວງສຸມາດຕາຕາເວັນຕົກ ພາຍຫລັງເກີດຝົນຕົກໜັກຕໍ່ເນື່ອງຫລາຍວັນ ເຊິ່ງທາງການຕ້ອງອົບພະຍົບປະຊາຊົນຫລາຍກວ່າ 75.000 ຄົນອອກຈາກພື້ນທີ່ສ່ຽງ.
ໜຶ່ງໃນຈຸດທີ່ໄດ້ຮັບຄວາມເສຍຫາຍໜັກທີ່ສຸດຄືບ້ານຢູ່ເທິງເຂົາໃນເຂດຊູເຕຣາ ເຊິ່ງປະຊາຊົນ 200 ກວ່າຄອບຄົວ ຜະເຊີນດິນເຈື່ອນຕາມນໍ້າຖ້ວມກະທັນຫັນ.
ນອກຈາກນີ້, ຢູ່ເມືອງປາດັງ ເມືອງເອກຂອງແຂວງສຸມາດຕາຕາເວັນຕົກ ແລະ ອີກ 8 ພື້ນທີ່ ເຊິ່ງຜະເຊີນຝົນຕົກ ແລະ ນໍ້າຖ້ວມນັບແຕ່ວັນທີ 7 ມີນາ ພົບວ່າມີເຮືອນເກືອບ 700 ຫລັງ ຕະຫລອດຈົນໂຮງຮຽນ ແລະ ຂົວຫລາຍແຫ່ງ ແລະ ເນື້ອທີ່ປູກຝັງອີກ 700 ກວ່າໄລ່ ໄດ້ຮັບຄວາມເສຍຫາຍ.
ຂະນະທີ່ໜ່ວຍກູ້ໄພອິນໂດເນເຊຍຍັງພະຍາຍາມເລັ່ງຄົ້ນຫາຜູ້ສູນຫາຍ ໂດຍລະດົມກໍາລັງເຈົ້າໜ້າທີ່ 150 ກວ່າຄົນ ປະຕິບັດການຄົ້ນຫາຢ່າງຕໍ່ເນື່ອງທ່າມກາງຄວາມຍາກລໍາບາກ ເນື່ອງຈາກດິນເຈື່ອນໄດ້ປິດທັບຖະໜົນຫລາຍເສັ້ນ.
ອ້າງອີງ:
