ຕໍາຫລວດເຜີຍໄລຍະບຸນອອກພັນສາ ແລະ ຊ່ວງເຮືອທ່າວັດຈັນມີປະຊາຊົນຫລາຍລາຍຕົກເປັນເຫຍືອແກ໋ງມິດສາຊີບ

ຮອງຫົວໜ້າກອງບັນຊາການ ປກສ ເມືອງຈັນທະບູລີນະຄອນຫລວງວຽງຈັນ ເປີດເຜີຍໃຫ້ຮູ້ວ່າ: ຕະຫລອດໄລຍະຂອງການຄົບງັນບຸນອອກພັນສາປະວໍລະນາ ແລະ ຊ່ວງເຮືອປະເພນີປະຈໍາປີທ່າວັດຈັນນະຄອນຫລວງວຽງຈັນລະຫວ່າງວັນທີ 4-6 ຕຸລາຜ່ານມານີ້, ໄດ້ມີປາກົດການຫຍໍ້ທໍ້ເກີດຂຶ້ນຫລາຍສົມຄວນ, ພົ້ນເດັ່ນແມ່ນບັນຫາລັກຊັບ, ແຫກກະເປົາ ແລະ ຈົກກະເປົາຂອງຜູ້ມາທ່ຽວບຸນຂອງແກ໋ງມິດສາຊີບ, ເກີດຂຶ້ນຫລາຍກວ່າ 10 ຄັ້ງ, ທຽບໃສ່ປີຜ່ານມາເຫັນວ່າມີລັກສະນະເພີ່ມຂຶ້ນ, ອັນໄດ້ສ້າງຄວາມເສຍຫາຍທາງດ້ານວັດຖຸຊັບສີນຫລາຍລ້ານກີບ.

ຮອງຫົວໜ້າກອງບັນຊາການ ປກສ ເມືອງດັ່ງກ່າວ ໃຫ້ຮູ້ວ່າ: ​ສໍາລັບການຮັກສາຄວາມສະຫງົບໃນງານບຸນອອກພັນສາປີນີ້, ໄດ້ຈັດກໍາລັງ​ວິຊາ​ສະ​ເພາະລົງ ປະຈຳ​ຢູ່​ຈຸດ​ຫລໍ່​ແຫລມຕ່າງໆພາຍ​ໃນ​ງານ​ບຸນ​ຢ່າງ​ເຂັ້ມງວດ ​ເພື່ອຕິດຕາມຄວາມບໍ່ເປັນລະບຽບຮຽບຮ້ອຍ ແລະ ອໍານວຍຄວາມສະດວກດ້ານຕ່າງໆໃຫ້ແກ່ຜູ້ທີ່ ມາທ່ຽວບຸນ, ​ໂດຍ​ສະ​ເພາະ​ເອົາໃຈໃສ່​ສະກັດ​ກັ້ນກຸ່ມແກ໋ງມິດສາຊີບ​ທີ່​ສວຍ​ໂອກາດ​ລ່ວງ ​ແລະ ​ແຫກ​ກະ​ເປົາ​ຂອງນັກ​ທ່ອງ​ທ່ຽວ, ແຕ່​ເນື່ອງ​ຈາກງານບຸນດັ່ງກ່າວ​ມີ​ຄົນ​ມາ​ທ່ຽວ​ເປັນ​ຈຳນວນ​ຫລວງຫລາຍ ແລະ ມີຄວາມ​ແອ​ອັດໃນຫລາຍຈຸດຈຶ່ງເຮັດໃຫ້ກຸ່ມຄົນບໍ່ດີດັ່ງກ່າວສາມາດ​ລົງມື​ກໍ່​ເຫດ​ໄດ້​ງ່າຍ.