ອະນາໄມໂລກເລີ່ມແຈກວັກແຊງ ປ້ອງກັນອະຫິວາ ໃຫ້ຄ້າຍຜູ້ອົບພະຍົບໂຣຮິງຢາ ຢູ່ບັງກະລາເທດ
ອົງການອະນາໄມໂລກເລີ່ມແຈກຢາຍວັກແຊງປ້ອງກັນພະຍາດອະຫິວາ 900.000 ຊຸດ ໃຫ້ຄ້າຍຜູ້ອົບພະຍົບຊາວໂຣຮິງຢາຢູ່ບັງກະລາເທດແລ້ວໃນວັນທີ 10 ຕຸລານີ້, ຂະນະທີ່ພະຍາຍາມຫາທາງປ້ອງກັນການແຜ່ລະບາດຄັ້ງໃຫຍ່.
ອົງການອະນາໄມໂລກລາຍງານວ່າ: ໃນອາທິດຜ່ານມາ, ພົບຜູ້ປ່ວຍພະຍາດຖອກທ້ອງແລ້ວຫລາຍກວ່າ 10.000 ຄົນ ແລະ ແພດຢູ່ຄລີນິກ 2 ແຫ່ງເປີດເຜີຍວ່າ: ພົບຜູ້ປ່ວຍຫລາຍຄົນມີອາການຂອງພະຍາດອະຫິວາ ເຊິ່ງເປັນພະຍາດຖອກທ້ອງຊະນິດຮຸນແຮງ, ຖ້າບໍ່ໄດ້ຮັບການປິ່ນປົວອາດເສຍຊີວິດພາຍໃນ 36 ຊົ່ວໂມງ. ຜູ້ແທນອົງການອະນາໄມໂລກຢູ່ບັງກະລາເທດກ່າວວ່າ: ມີຄວາມສ່ຽງຈະເກີດພະຍາດອະຫິວາລະບາດ, ແຕ່ອາດບໍ່ຮຸນແຮງຄືຢູ່ເຢເມນ. ເຖິງຢ່າງໃດກໍຕາມ, ການປຸກລະດົມແຈກຢາຍວັກແຊງປ້ອງກັນພະຍາດອະຫິວາຢູ່ບັງກະລາເທດຄັ້ງນີ້ ຖືເປັນສິ່ງສຳຄັນທີ່ຈະຊ່ວຍຄວບຄຸມການລະບາດຂອງພະຍາດ, ສ່ວນເຈົ້າໜ້າທີ່ບັນເທົາທຸກກຳລັງກັງວົນກ່ຽວກັບການຂາດບຸກຄະລາກອນຊ່ວຍແຈກຢາຍວັກແຊງຢ່າງວ່ອງໄວ. ຂະນະທີ່ອົງການອະນາໄມໂລກຕ້ອງການເງິນຈຳນວນ 10,2 ລ້ານໂດລາສະຫະລັດ ຢ່າງຮີບດ່ວນເພື່ອນຳມາໃຊ້ສະໜັບສະໜູນການປຸກລະດົມດັ່ງກ່າວ.
ການປຸກລະດົມແຈກຢາຍວັກແຊງໃນຮອບທຳອິດຈະໃຫ້ຜູ້ທີ່ມີອາຍຸແຕ່ 1 ປີຂຶ້ນໄປຈຳນວນ 650.000 ຄົນ ແລະ ຮອບທີ 2 ຈະເປັນການໃຫ້ຕື່ມອີກ ເພື່ອປ້ອງກັນເປັນພິເສດແກ່ເດັກອາຍຸລະຫວ່າງ 1-5 ປີ ຈຳນວນ 250.000 ຄົນ.
