ລັດຖະບານໃຫ້ບູລິມະສິດຂະແໜງສາທາລະນະສຸກເພື່ອສົ່ງເສີມສຸຂະພາບຂອງປະຊາຊົນ
ປັດຈຸບັນພັກ-ລັດຖະບານ ໄດ້ຖືເອົາວຽກງນຂະແໜງສາທະລະນະສຸກ ເປັນບູລິມະສິດເວົ້າລວມ ເວົ້າສະເພາະແມ່ນການສັກຢາກັນພະຍາດ, ການຮັກສາສຸຂະພາບຂອງແມ່ ແລະ ເດັກ. ສະນັ້ນ, ລັດຖະບານຈຶ່ງຈັດສັນງົບປະມານແຕ່ລະປີໃຫ້ພຽງພໍກັບບັນດາໂຄງການຕ່າງໆທີ່ຈຳເປັນຂອງຂະແໜງສາທາລະນະສຸກ ຕາມສະພາໄດ້ຮັບຮອງຮັບເອົາເພື່ອໃຫ້ປະຊາຊົນລາວບັນດາເຜົ່າມີສຸຂະພາບດີຂຶ້ນເທື່ອລະກ້າວ.
ທ່ານ ສົມດີ ດວງດີ ຮອງນາຍົກລັດຖະມົນຕີ ລັດຖະມົນຕີກະຊວງການເງິນ ໄດ້ໃຫ້ສຳພາດຕໍ່ທີມງານອົງກາວີ ໃນວັນທີ 16 ຕຸລານີ້ ທີ່ສູນກາງຊາວໜຸ່ມ ປະຊາຊົນ ປະຕິວັດລາວ ເຊິ່ງທ່ານ ຮອງນາຍົກລັດຖະມົນຕີ ລັດຖະມົນຕີວ່າ: ໃນໄລຍະຜ່ານມາ ສປປ ລາວ ໄດ້ຮັບການສະໜັບສະໜູນຢ່າງຕໍ່ເນື່ອງໃນວຽກງານສັກຢາກັນພະຍາດບໍ່ວ່າຈະເປັນທາງດ້ານ ງົບປະມານ, ວັກຊິນ, ວັດຖຸອຸປະກອນ, ພາຫະນະ ແລະ ການເຄື່ອນໄຫວວຽກງານແມ່ ແລະ ເດັກ, ການສັກຢາກັນພະຍາດໃນຂັັ້ນທ້ອງຖິ່ນ ເພື່ອໃຫ້ເຂົ້າເຖິງກຸ່ມເປົ້າໝາຍ, ຄຽງຄູ່ກັນນີ້ພັກ-ລັດຖະບານຍັງໄດ້ຈັດສັນງົບປະມານໃຫ້ຂະ ແໜງສາທາລະນະສຸກໃຫ້ບັນລຸເປົ້າໝາຍທີ່ວາງໄວ້ຄື : ແຜນພັດທະນາເສດຖະກິດ-ສັງຄົມ 5 ປີ ຄັ້ງທີ VIII (2016-2020) ລັດຖະບານກໍ່ໄດ້ຖືເອົາວຽກງານສາທາລະນະສຸກເປັນບູລິມະສິດ ເນື່ອງຈາກວ່າເປັນຂະແໜງການໜຶ່ງທີ່ຈະຊ່ວຍໃຫ້ ສປປ ລາວ ຫລຸດພົ້ນອອກຈາກຄວາມດ້ອຍພັດທະນາ.
ດັ່ງທີ່ໄດ້ຮັບຊາບແລ້ວວ່າປັດຈຸບັນເສດຖະກິດມະຫາພາກຂອງ ສປປ ລາວ ມີຄວາມໝັ້ນທ່ຽງ ແລະ ເຕີບໂຕຢ່າງຕໍ່ເນື່ອງສະເລ່ຍ 6-7%, ແລະ ການຊ່ວຍເຫລືອສະໜັບສະໜູນຂອງຄູ່ຮ່ວມພັດທະນາຈະຫລຸດລົງໃນຕໍ່ໜ້າ ໂດຍສະເພາະທາງອົງການກາວີ (Global Allinance for Vaccines and lmmunizations) ຈະໄດ້ຄອ່ຍຫລຸດຜ່ອນການຊ່ວຍເຫລືອຂະແໜງສາທາລະນະສຸກເທື່ອລະໜ້ອຍ, ລັດຖະບານກະໄດ້ຖືເອົາວຽກສາທະລະນະສຸກເປັນບູລິມະສິດ ແລະ ມີຄວາມພະຍາຍາມເພີ່ມທຶນຮອນເຂົ້າໃນວຽກງານດັ່ງກ່າວໃຫ້ພຽງພໍກັບບັນດາໂຄງການຕ່າງໆ…ທີ່ຈຳເປັນຂອງຂະແໜງສາທາລະນະສຸກ ຕາມມະຕິຕົກລົງຂອງສະພາແຫ່ງຊາດຮັບຮອງເອົາ 9% ຂອງລາຍຈ່າຍງົບປະມານ.
ນອກຈາກນີ້, ຂະແໜງການກ່ຽວຂ້ອງຍັງໄດ້ມີແຜນຍຸດທະສາດໄລຍະຍາວຂອງ ການພັດທະນາຂະແໜງ ສາທາລະນະສຸກ ທີ່ເຮັດໃຫ້ບັນລຸເປົ້າໝາຍດ້ານສະຫັດສະວັດ. ດັ່ງນັ້ນ, ລັດຖະບານ ຈຶ່ງໄດ້ສຸມທຶນຮ້ອນໃສ່ວຽກງານດັ່ງກ່າວເຂົ້າໃນການພັດທະນາ ເວົ້າລວມເວົ້າສະເພາະ ແມ່ນການສັກຢາກັນພະຍາດ, ການຮັກສາສຸຂະພາບຂອງແມ່ ແລະ ເດັກ ເພື່ອໃຫ້ປະຊາຊົນລາວບັນດາເຜົ່າມີສຸຂະພາບດີຂຶ້ນເທື່ອລະກ້າວ.
ທ່ານ ຮອງນາຍົກລັດຖະມົນຕີ ກ່າວຕື່ມອີກວ່າ: ຄຽງຄູ່ກັບການສະໜອງທຶນລັດຖະບານຍັງຈະຕ້ອງໄດ້ເອົາໃຈປັບປຸງລະບົບກອງທຶນຂອງຂະແໜງສາທາລະນະສຸກ ເພື່ອເປັນປະກອບສ່ວນເຂົ້າໃນວຽກງານສາທາລະນະສຸກໃຫ້ກວ້າງຂວ້າງ ແລະ ໃຫ້ປະຊາຊົນທຸກຊົນຊັ້ນເຂົ້າເຖິງທຸກກຸ່ມເປົ້າໝາຍ ຢ່າງມີປະສິດທິຜົນ.
