G7 ຫາວິທີຮັບມືນັກຮົບ IS ໜີກັບມາເອີຣົບ
ລັດຖະມົນຕີພາຍໃນກຸ່ມປະເທດອຸດສາຫະກຳຊັ້ນນຳ 7 ປະເທດ (G7) ປະຊຸມລະດົມແນວຄິດໃນວັນທີ 20 ຕຸລາ ເພື່ອຫາທາງຮັບມືກັບນັກຮົບທີ່ຈະໜີກັບມາເອີຣົບ ເນື່ອງຈາກຖານທີ່ໝັ້ນຂອງກຸ່ມລັດອິດສະລາມ (IS) ຢູ່ຊີຣີຖືກຖະຫລົ່ມ, ສ່ວນສະຫະພາບເອີຣົບ (EU) ຮັບປາກຈະຊ່ວຍປິດເສັ້ນທາງທີ່ກຸ່ມກໍ່ການຮ້າຍອາດໃຊ້ລັກລອບເຂົ້າມາ.
ລັດຖະມົນຕີພາຍໃນ G7 ເປີດປະຊຸມຄະນະວາລະທຳອິດ ຢູ່ເກາະອິສກີ ຂອງອີຕາລີ, ພາຍຫລັງທ່ານ ມາຣໂກ ມິນນີຕີ ລັດຖະມົນຕີພາຍໃນອີຕາລີ ເຕືອນໃນອາທິດກ່ອນວ່າ: ກຸ່ມຕິດອາວຸດທີ່ວາງແຜນກໍ່ເຫດແກ້ແຄ້ນຢູ່ເອີຣົບ ພາຍຫລັງຖານທີ່ໝັ້ນ IS ຢູ່ຊີຣີຖືກຖະຫລົ່ມອາດລັກລອບເຂົ້າມາດ້ວຍການຂີ່ເຮືອຈາກລີບີ. ທ່ານ ໂດນັນ ທຸສ ປະທານຄະນະມົນຕີເອີຣົບ ກ່າວໃນວັນທີ 19 ຕຸລາວ່າ: ຈະຊ່ວຍອີຕາລີປະສານງານກັບທາງການລີບີ ແລະ ອາດຈະປິດເສັ້ນທາງແລ່ນເຮືອຢູ່ທາງຕອນກາງຂອງທະເລເມດິເຕລານຽນ. ຜ່ານມາອີຕາລີຊ່ວຍເຝິກແອບໜ່ວຍຍາມຝັ່ງລີບີສະກັດກັ້ນແກ້ງຄ້າມະນຸດທີ່ໃຊ້ນ່ານນ້ຳລີບີເປັນເສັ້ນທາງຂີ່ເຮືອ ແລະ ຖືກວິຈານທີ່ເຮັດຂໍ້ຕົກລົງກັບກຸ່ມຕິດອາວຸດລີບີໃຫ້ຊ່ວຍສະກັດບໍ່ໃຫ້ຜູ້ອົບພະຍົບຂີ່ເຮືອອອກຈາກຝັ່ງ.
ອີຕາລີເປີດເຜີຍວ່າ: ກຸ່ມ G7 ຈະຫາລືວິທີການປັບທັດສະນະຄະຕິຜູ້ກັບຈາກການຮ່ວມຮົບກັບ IS ເພື່ອປ້ອງກັນບໍ່ໃຫ້ເປັນໄພດ້ານຄວາມໝັ້ນຄົງ ເມື່ອເຂົ້າໄປຢູ່ໃນຄຸກ. ຂະນະທີ່ຝຣັ່ງເປີດເຜີຍວ່າ: ກຸ່ມ G7 ຈະຫາທາງແກ້ໄຂບັນຫາດ້ານກົດໝາຍເລື່ອງການດຳເນີນຄະດີກັບນັກຮົບທີ່ກັບມາ ໂດຍສະເພາະເລື່ອງຫລັກຖານທີ່ຈະນຳມາຮ້ອງຟ້ອງ. ຄາດຄະເນວ່າມີພົນລະເຮືອນຈາກປະເທດຕາເວັນຕົກເດີນທາງໄປຮ່ວມຮົບກັບ IS ຢູ່ຊີຣີ ແລະ ອີຣັກຫລາຍໝື່ນຄົນລະຫວ່າງປີ 2014-2016 ບາງສ່ວນກັບມາ ແລະ ກໍ່ການຮ້າຍທີ່ມີຜູ້ເສຍຊີວິດແລ້ວຫລາຍຄັ້ງ.
