ອາເມລິກາພົບຜູ້ຕິດເຊື້ອພະຍາດໄຂ້ຫວັດສັດປີກຄົນທີ 3 ຂອງປະເທດ ເຊິ່ງເຊື່ອມໂຍງກັບການລະບາດຂອງເຊື້ອໄວຣັສໃນກຸ່ມງົວນົມ

ວັນທີ 31 ພຶດສະພາ, ສໍານັກຂ່າວຕ່າງປະເທດລາຍງານວ່າ: ກ່ອນໜ້າການລາຍງານພົບຜູ້ຕິດເຊື້ອຄົນທີ 3 ອາເມລິກາມີຜູ້ຕິດເຊື້ອ 2 ຄົນທີ່ຕິດເຊື້ອໄວຣັສໄຂ້ຫວັດສັດປີກສາຍພັນ H5N1 ຢູ່ລັດເທັກຊັສ ແລະ ລັດມິຊິແກນ ເຊິ່ງທັງສອງເປັນກໍາມະກອນຢູ່ຟາມງົວນົມທີ່ມີອາການພຽງເລັກໜ້ອຍ ແລະ ຫາຍດີແລ້ວ.

ສູນຄວບຄຸມ ແລະ ປ້ອງກັນພະຍາດອາເມລິກາ (CDC) ລະບຸໃນຖະແຫລງການວ່າ: ຜູ້ຕິດເຊື້ອທັງ 3 ຄົນໄດ້ຮັບເຊື້ອໄວຣັສຈາກງົວ ບໍ່ແມ່ນກໍລະນີການແຜ່ເຊື້ອຈາກຄົນສູ່ຄົນ, ໃນໄລຍະບໍ່ເທົ່າໃດປີຜ່ານມາ, ອາເມລິກາກວດພົບໄຂ້ຫວັດສັດປີກຊະນິດສ້າງພະຍາດຮຸນແຮງ (HPAI) ສາຍພັນ H5N1 ນຳສັດຫລາຍກວ່າ 50 ສາຍພັນພາຍໃນປະເທດ ເຊິ່ງລວມທັງງົວນົມຢູ່ອາເມທີ່ໄດ້ກວດພົບນັບແຕ່ເດືອນມີນາຜ່ານມາ.
ຄວາມແຕກຕ່າງລະຫວ່າງອາເມລິກາກັບເອີຣົບຄື: ຊາວກະສິກອນ ໃນອາເມລິກາໄດ້ຮັບອະນຸຍາດໃຫ້ນໍາເອົາຂີ້ໄກ່ບົດໄປລ້ຽງງົວ ເຊິ່ງນັກວິທະຍາສາດບາງຄົນ ກ່າວວ່າ: ສິ່ງນີ້ອາດເປັນປັດໄຈສ່ຽງຕໍ່ພະຍາດໄຂ້ຫວັດສັດປີກ ເຖິງວ່າອຸດສາຫະກໍາອາຫານສັດຄັດຄ້ານຄໍາກ່າວອ້າງດັ່ງກ່າວ ແລະ ທາງການອາເມລິກາເຊື່ອວ່າ: ນົກປ່າເປັນສາເຫດທີ່ເຮັດໃຫ້ງົວຕິດເຊື້ອ.

ໃນອາທິດຜ່ານມາ, CDC ລະບຸວ່າ: ການປະເມີນຄວາມສ່ຽງສໍາລັບປະຊາຊົນທົ່ວໄປຍັງຢູ່ໃນລະດັບຕໍ່າ, ແຕ່ຄາດວ່າຈະມີຜູ້ຕິດເຊື້ອເພີ່ມຂຶ້ນ. ພ້ອມແນະນໍາວ່າ: ນອກຈາກການໃຊ້ອຸປະກອນປ້ອງກັນສ່ວນບຸກຄົນ ປະຊາຊົນຄວນຫລີກລ່ຽງການສໍາຜັດສັດທີ່ຕິດເຊື້ອ ຫລື ຕາຍແລ້ວ ບໍ່ວ່າຈະເປັນນົກປ່າ, ນົກທີ່ລ້ຽງຢູ່ເຮືອນ ແລະ ສັດລ້ຽງອື່ນໆ ລວມທັງຂີ້ຂອງສັດ, ວັດຖຸຮອງນອນຂອງສັດ ຫລື ການບໍລິໂພກນົມທີ່ບໍ່ຜ່ານການຂ້າເຊື້ອ.