ຄວາມສະຫງົບປອດໄພເປັນປັດໄຈພື້ນຖານຂອງຄວາມສຸກ
ໂດຍ: ທິດກໍ່າ
ໃນມື້ກ່ອນນັ້ນ, ທິດກໍ່າກໍໄດ້ຂຽນບົດໜຶ່ງທີ່ກ່ຽວຂ້ອງກັບພວກໂຈນຫ້າຮ້ອຍ.ສໍາລັບໃນຄໍລໍາມື້ນີ້ ກໍຂໍໂງມາໃສ່ເລື່ອງຄວາມສະຫງົບປອດໄພ. ເປັນຫຍັງຈຶ່ງຕັ້ງບັນຫານີ້ຂຶ້ນມານັ້ນກໍຍ້ອນເຮົາເຫັນວ່າຄວາມສະຫງົບປອດໄພມັນເປັນປັດໄຈພື້ນຖານຂອງຄວາມສຸກ. ຕາມທິດກໍ່າຄິດ ຄົນເຮົາບໍ່ວ່າໃຜຈະຢູ່ໃສ, ເຮັດຫຍັງກໍຕາມ ຖ້າຫາກມີຄວາມສຸກແລ້ວກໍຖືວ່າສຸດຍອດຂອງຄວາມເປັນມະນຸດ.ສ່ວນວ່າເຫດຜົນດ້ານອື່ນໆນັ້ນມັນກໍຫາກມີຫຼາຍເຫດຜົນ ແລະ ຫຼາຍປັດໄຈ ເປັນຕົ້ນ ວ່າປາກົດການຫຍໍ້ທໍ້ໃນບ້ານເຮົາປັດຈຸບັນເບິ່ງຢ່າງໜຶ່ງມັນຄືໜັກໜ້າ ແລະ ມີການແຜ່ອອກໄປຕິກໆ ຄືນັບແຕ່ມື້ອອກພັນສາເປັນຕົ້ນໄປຕາມປະເພນີຂອງບ້ານເຮົາກໍຈະມີງານບຸນຕ່າງໆ ແລະ ປີ 2018 ທີ່ຈະມາເຖິງນີ້ຈະເປັນປີທ່ອງທ່ຽວລາວ, ແນ່ນອນຖ້າຫາກສະພາບເປັນຄືດັ່ງວ່າ ແຂກຕ່າງດ້າວທ້າວຕ່າງແດນກໍຈະພາກັນຫຼັ່ງໄຫຼເຂົ້າມາທ່ອງທ່ຽວລາວຢ່າງມາກໜ້າຫຼາຍຕາ ແລະ ຄັບຄາໜາແໜ້ນ. ເມື່ອມີນັກທ່ອງທ່ຽວເຂົ້າມາຫຼາຍແນ່ນອນເຮົາກໍຕ້ອງພ້ອມພາກັນເຮັດໃຫ້ສັງຄົມມີຄວາມສະຫງົບປອດໄພໄປມາທາງໃດກໍໃຫ້ມີແຕ່ຄວາມມ່ວນຄວາມຊື່ນ ແລະ ໃຫ້ແຂກຄົນຕິດອົກຕິດໃຈຕໍ່ອັດທະຍາໃສໄມຕີຈິດຮີດຄອງປະເພນີຂອງປະຊາຊົນບັນດາເຜົ່າ. ກົງກັນຂ້າມ ຫາກໄປມາທາງໃດກໍເຫັນແຕ່ສິ່ງເຮິຮ້າຍ, ບໍ່ມີອັນໃດພໍທີ່ຈະຕິດອົກຕິດໃຈມ່ວນຊື່ນ ແລະ ທັງບໍ່ມີຄວາມສະຫງົບປອດໄພ ແລ້ວກໍບໍ່ຕ່າງຫຍັງກັບຄໍາວ່າ ມີແຕ່ອັນ “ເປິະ”.
ດັ່ງພວກເຮົາຮູ້ນໍາກັນແລ້ວວ່າ, ການທີ່ພັກ ແລະ ລັດຖະບານໄດ້ກໍານົດເອົາປີ 2018 ເປັນປີທ່ອງທ່ຽວລາວກໍຖືວ່າເປັນນິມິດໝາຍທີ່ດີສໍາລັບປວງຊົນລາວທັງຊາດ ເພາະວ່າພວກເຮົາຈະພ້ອມກັນເຮັດໃຫ້ປີດັ່ງກ່າວກາຍເປັນປີເງິນປີຄໍາ ວ່າປະເທດລາວຂອງພວກເຮົາມີເງື່ອນໄຂ ແລະ ປັດໄຈຫຼາຍຢ່າງທີ່ເອື້ອອໍານວຍໃນການທ່ອງທ່ຽວ ໂດຍສະເພາະໃນດ້ານຮີດຄອງປະເພນີ, ສິລະປະ, ຮ່ອງຮອຍວັດທະນະທໍາ, ສະຖາປັດຕະຍະກໍາຫຼາຍແຫ່ງທີ່ຍັງລຶກລັບພິດສະດານອັນເປັນການສົມຄວນໃນການສຶກສາຄົ້ນຄວ້າ. ນອກນັ້ນ ກໍມີພູຜາປ່າໄມ້, ຖ້ຳຮູພູເຂົາ, ແມ່ນ້ຳລໍາເຊ, ແກ້ງຕາດຫາດຊາຍອັນສວຍສົດງົດງາມ ເຊິ່ງກາຍເປັນແຫຼ່ງທ່ອງທ່ຽວທີ່ສໍາຄັນເພື່ອຜູ້ຄົນຈະໄດ້ໄປສໍາຜັດກັບຄວາມງາມອັນເປັນທໍາມະຊາດ. ຕາມທິດກໍ່າຄິດ, ງານປະເພນີວັດທະນະທໍາ ເຊິ່ງຈະເປັນງານຊ້າງຂອງປວງຊົນລາວທັງຊາດທີ່ຈະມາເຖິງໃນມໍ່ໆນີ້ກໍແມ່ນບຸນນະມັດສະ ການພະທາດຫຼວງທີ່ນະຄອນຫຼວງວຽງຈັນ ແລະ ໃນໂອກາດດັ່ງກ່າວ ທາງການເຮົາກໍຈະໄດ້ມີພິທີເປີດປີທ່ອງທ່ຽວຢ່າງເປັນທາງການນັບແຕ່ມື້ນັ້ນເປັນຕົ້ນໄປ. ໃນໂອກາດບຸນນະມັດສະການພະທາດຫຼວງປີນີ້ກໍຈະມີຫຼາກຫຼາຍກິດຈະກໍາມະຫໍ ລະສົບຄົບງັນອັນເປັນການສະແດງໃຫ້ເຫັນເຖິງວິຖີຊີວິດ, ຮີດຄອງປະເພນີວັດ ທະນະທໍາທີ່ດີງາມ ແລະ ເປັນເອກະລັກສະເພາະຂອງຊາດລາວຄົນລາວ.
ແນວໃດກໍຕາມ, ກ່ອນໄປຮອດບຸນນະມັດສະການພະທາດຫຼວງ ແລະ ປີທ່ອງທ່ຽວຂອງປະເທດເຮົາ, ກ່ອນອື່ນໝົດ ວຽກທີ່ເຮົາຈະຕ້ອງມີຄວາມພ້ອມແລະເຮັດໄປກ່ອນໝູ່ນັ້ນກໍຄືຄວາມສະຫງົບປອດໄພ ຍ້ອນວ່າວຽກງານດັ່ງກ່າວເປັນວຽກຮັກສາຊີວິດ ແລະ ຊັບສິນຂອງບຸກຄົນ, ຂອງສັງຄົມ ກໍຄືຂອງປະເທດຊາດ, ທັງເປັນວຽກລະອຽດອ່ອນຮີບດ່ວນກູ້ໜ້າກູ້ຕາຂອງຊາດບ້ານເມືອງເອົາໄວ້. ນອກນັ້ນ ມັນຍັງເປັນວຽກຕ້ານ ແລະ ສະກັດກັ້ນພວກໄມ້ມືຂອງກຸ່ມຄົນບໍ່ດີ ເຊິ່ງຍາມໃດພວກເຂົາກໍພະຍາຍາມໂຄສະນາຖັບຖົມ, ໃສ່ຮ້າຍປ້າຍສີ ແລະ ຕ້ານແນວທາງຂອງພັກ ແລະ ລັດຖະບານເຮົາຕ່າງໆນາໆ ດັ່ງພວກເຮົາຈະເຫັນໄດ້ໃນສື່ຕ່າງໆໃນແຕ່ລະໄລຍະ ແລະ ແຕ່ລະວັນ. ຕາມເຮົາວ່າ ການປົກປັກຮັກສາຄວາມສະຫງົບປອດໄພຂອງສັງຄົມນັ້ນເປັນໜ້າທີ່ຂອງໝົດທຸກຄົນ, ແຕ່ພາກສ່ວນທີ່ຮັບຜິດຊອບໂດຍກົງນັ້ນກໍຄວນເປັນຜູ້ອອກໜ້າອອກຕາ. ນອກນັ້ນ ກໍແມ່ນການປະກອບສ່ວນຂອງບຸກຄົນ, ຊັ້ນຄົນ ແລະ ຂອງປວງຊົນລາວທັງຊາດ.
ເຖິງຢ່າງໃດກໍດີ, ຕາມທິດກໍ່າຄິດ ໃນໂອກາດປີທ່ອງທ່ຽວລາວທີ່ຈະມາເຖິງ ນີ້, ກ່ອນອື່ນໝົດ ຄວາມສະຫງົບປອດໄພຕ້ອງໄດ້ໄປກ່ອນ ແລະ ໃຫ້ຍືນຍົງໝັ້ນຄົງສະຫງົບປອດໄພຢ່າງໜັກແໜ້ນ ຍ້ອນວ່າຄວາມສຸກກາຍສະບາຍໃຈທີ່ປອດສິ່ງເຮິະຮ້າຍນັ້ນເປັນຍອດປາດຖະໜາຂອງຄົນກາຍເປັນຄວາມສຸກຢ່າງຍືນຍາວແລ້ວຊີວິດກໍຈະຍືນຍົງ.
