ກະຊວງກະສິກຳ-ປ່າໄມ້ ແລະ ກະຊວງອຸດສາຫະກຳ-ການຄ້າ ຫາລືຊຸກຍູ້ສົ່ງເສີມການຜະລິດເປັນສິນຄ້າ ໃຫ້ມີຄວາມຫລາກຫລາຍ

ວັນທີ 3 ມິຖຸນາ 2024 ທີ່ກະຊວງອຸດສາຫະກໍາ ແລະ ການຄ້າ ໄດ້ຈັດກອງປະຊຸມພົບປະ ເເລະ ປຶກສາຫາລືວຽກງານ ລະຫວ່າງ ກະຊວງອຸດສາຫະກໍາ-ການຄ້າ ແລະ ກະຊວງກະສິກໍາ-ປ່າໄມ້ ໂດຍເປັນປະທານຮ່ວມລະຫວ່າງ ທ່ານ ມະໄລທອງ ກົມມະສິດ ລັດຖະມົນຕີກະຊວງອຸດສາຫະກໍາ ເເລະ ການຄ້າ ເເລະ ທ່ານ ລິນຄໍາ ດວງສະຫວັນ ລັດຖະມົນຕີກະຊວງກະສິກໍາ ເເລະ ປ່າໄມ້ ມີບັນດາຮອງລັດຖະມົນຕີ ຫົວໜ້າຫ້ອງການ ຫົວໜ້າກົມ ສະຖາບັນສອງກະຊວງ ຕາງໜ້າຫ້ອງວ່າການສໍານັກງານນາຍົກລັດຖະມົນຕີ ກະຊວງພາຍໃນ ສູນສະຖິຕິແຫ່ງຊາດ ພະເເນກອຸດສາຫະກໍາ ເເລະ ການຄ້າ ເເລະ ພະເເນກກະສິກໍາ ເເລະ ປ່າໄມ້ ນະຄອນຫລວງວຽງຈັນ ແລະ ສະພາການຄ້າ ແລະ ອຸດສາຫະກໍາ ແຫ່ງຊາດລາວເຂົ້າຮ່ວມ.

ຈຸດປະສົງກອງປະຊຸມຄັ້ງນີ້ ເພື່ອຮັບຟັງລາຍງານຜົນການຈັດຕັ້ງປະຕິບັດ ບົດບັນທຶກກອງປະຊຸມພົບປະ ແລະ ປຶກສາຫາລືວຽກງານລະຫວ່າງສອງກະຊວງ ຄັ້ງວັນທີ 14 ມິຖຸນາ 2023 ປຶກສາຫາລືກົນໄກ ແລະ ວິທີການໃນການເເກ້ໄຂບັນຫາທີ່ຍັງຄົງຄ້າງ ຂອງສອງຂະແໜງການທີ່ຕ້ອງໄດ້ຮ່ວມກັນແກ້ໄຂ ຕາມບົດບັນທຶກຜົນຂອງກອງປະຊຸມຄັ້ງວັນທີ 14 ມິຖຸນາ 2023 ໃຫ້ຂາດຕົວ ແລະ ມີໝາກຜົນຕົວຈິງ ແລະ ປຶກສາຫາລືກົນໄກ ແລະ ວາງມາດຕະການຮ່ວມກັນໃນການຈັດຕັ້ງຜັນຂະຫຍາຍ ທິດຊີ້ນໍາຂອງຂັ້ນເທິງທີ່ມອບໝາຍໃຫ້ສອງຂະເເໜງການຕ້ອງມີສ່ວນຮ່ວມ ແລະ ຄວາມຮັບຜິດຊອບຮ່ວມກັນ ເພື່ອເເກ້ໄຂບັນຫາເຄັ່ງຮ້ອນຕ່າງໆທີ່ລັດຖະບານ ກໍຄື ສັງຄົມໄດ້ຍົກຂຶ້ນໃຫ້ມີປະສິດທິພາບ ປະສິດທິຜົນດີຂຶ້ນກວ່າເກົ່າ ແລະ ໄດ້ຮັບໝາກຜົນສໍາເລັດເທື່ອລະກ້າວ ໂດຍສະເພາະປີ່ນອ້ອມບັນຫາການຄຸ້ມຄອງລາຄາສິນຄ້າ ການຊຸກຍູ້ສົ່ງເສີມການຜະລິດເປັນສິນຄ້າໃຫ້ມີຄວາມຫລາກຫລາຍ ເພື່ອຮັບໃຊ້ພາຍໃນກ້າວເປັນເຖິງການຫລຸດຜ່ອນ ແລະ ຈໍາກັດການນໍາເຂົ້າເທື່ອລະກ້າວ.