ລັດຖະບານ ກໍານົດ 3 ເປີດ ເພື່ອກະຕຸ້ນການລົງທຶນ          

- IMG 3617 - ລັດຖະບານ ກໍານົດ 3 ເປີດ ເພື່ອກະຕຸ້ນການລົງທຶນ          
- AGL banner - ລັດຖະບານ ກໍານົດ 3 ເປີດ ເພື່ອກະຕຸ້ນການລົງທຶນ          

ທ່ານ ທອງລຸນ ສີສຸລິດ ນາຍົກລັດຖະມົນຕີ ໄດ້ກ່າວຕໍ່ກອງປະຊຸມສະໄໝສາມັນ ເທື່ອທີ 4 ສະພາແຫ່ງຊາດ ຊຸດທີ VIII ຫວ່າງຕອນບ່າຍວັນທີ 23 ຕຸລານີ້  ວ່າ:   ເພື່ອຢາກໃຫ້ເສດຖະກິດຂະ ຫຍາຍຕົວຕາມເປົ້າໝາຍທີ່ວາງໄວ້, ລັດຖະບານ ໄດ້ສຸມງົບປະມານ ທີ່ມີຢູ່ຢ່າງຈໍາກັດໃຫ້ມີປະສິດທິພາບ ແລະ ປະສິດທິຜົນ  ແຕ່ພ້ອມດຽວກັນນັ້ນ ການດຶງດູດການລົງທຶນເອກະຊົນພາຍໃນ ແລະ ຕ່າງປະເທດ, ລັດຖະບານ ໄດ້ມີຄວາມພະຍາຍາມປັບປຸງຂອດອະນຸຍາດການລົງທຶນໃຫ້ດີຂຶ້ນ ໂດຍໄດ້ປັບປຸງກົດໝາຍການລົງທຶນ, ສ້າງຕັ້ງຄະນະກໍາມະການຄຸ້ມຄອງການລົງທຶນ ຂັ້ນສູນກາງ (ຄລທສ) , ຄະນະກໍາມະການຄຸ້ມຄອງການລົງທຶນຂັ້ນແຂວງ (ຄລທຂ) ຫັນເອົາກົມຄຸ້ມຄອງ ແລະ ສົ່ງເສີມການລົງທຶນ ກະ ຊວງແຜນການ ແລະ ການລົງທຶນ ໃຫ້ຮັບຜິດຊອບເປັນກອງເລຂາໃຫ້ ຄລທສ, ແຂວງ ກໍໃຫ້ປະຕິບັດໄປໃນທິດທາງດຽວກັນ ໂດຍເລັ່ງໃສ່ແກ້ໄຂບັນຫາຂອດອຸດຕັນໃຫ້ມີຄວາມວ່ອງໄວທັນກັບສະພາບການ, ເມື່ອເປັນເຊັ່ນນັ້ນ ລັດຖະບານ ຈຶ່ງໄດ້ ສ້າງຕັ້ງຄະນະກໍາມະການຄຸ້ມຄອງການລົງທຶນ ເພື່ອອະນຸມັດການລົງທຶນຢູ່ບ່ອນດຽວ ກໍຄືຢູ່ກອງເລຂາຄະນະກໍາມະການຄຸ້ມຄອງການລົງທຶນ ແນໃສ່ເພື່ອສ້າງເງື່ອນໄຂ ແລະອໍານວຍຄວາມສະດວກໃຫ້ກັບນັກລົງທຶນເຂົ້າມາລົງທຶນຢູ່ລາວໃຫ້ນັບມື້ຫຼາຍຂຶ້ນກ່ວາເກົ່າ.

ທ່ານນາຍົກ ທອງລຸນ ສີສຸລິດ ຍັງໄດ້ຍົກຕົວຢ່າງການຈັດອັນດັບຂອງທະນາຄານໂລກ ໃນຄວາມສະດວກຂອງການ ດໍາເນີນທຸລະກິດຂອງ ສປປ ລາວ ໃນປີ 2017 ເຊິ່ງ ສປປ ລາວ ແມ່ນຢູ່ອັນດັບທີ 139 ໃນຈໍານວນ 190 ຂອງໂລກ ແລະ ໃນພາກພື້ນອາຊີອາຄະເນ ຈັດຢູ່ໃນອັນດັບທີ 9 ໃນ 11 ປະເທດ ຊຶ່ງຫຼຸດປະເທດພວກເຮົາມີປະເທດມຽນມາ ແລະ ຕີມໍເລັສ ເຕ, ການຈັດອັນດັບດັ່ງກ່າວ ໄດ້ອີງໃສ່ 10 ດັດສະນີຍ່ອຍ ໂດຍໄດ້ມີການຈັດຕາມດັດສະນີຍ່ອຍດັ່ງກ່າວ ສປປ ລາວ ຈັດຢູ່ໃນອັນດັບທີ 160 ຂອງໂລກ, ຍ້ອນພວກເຮົາ ມີຫຼາຍຂັ້ນຕອນໃນການອະນຸມັດ ເຊິ່ງໃນປັດຈຸບັນມີ 8 ຂັ້ນຕອນ ເຊິ່ງແຕ່ລະຂັ້ນຕອນກໍຕ້ອງໃຊ້ເວລາຫຼາຍເກີນໄປ ລວມທັງໝົດ 60 ກ່ວາມື້ ຈຶ່ງໄດ້ໜັງສືອະນຸຍາດອອກມາ.

ໃນຖານະຫົວໜ້າລັດຖະບານ, ທ່ານນາຍົກ ໄດ້ຈັດກອງປະຊຸມໂຕະມົນລະຫວ່າງພາກລັດກັບພາກທຸລະກິດ ໂດຍໄດ້ມີການພົບປະກັບນັກທຸລະກິດຫຼາຍກຸ່ມ ເພື່ອຊອກຮູ້ບັນຫາການດໍາເນີນທຸລະກິດ ຢູ່ ສປປ ລາວ ລວມທັງເດີນທາງໄປພົບປະກັບນັກລົງທຶນຢູ່ຕ່າງປະເທດໃນຫຼາຍປະເທດ ໂດຍໄດ້ປະກາດໃຫ້ນັກລົງທຶນຕ່າງປະເທດ ຮັບຮູ້ນະໂຍບາຍຂອງລັດ ຖະບານລາວກ່ຽວກັບການລົງທຶນຢູ່ ສປປ ລາວ ໂດຍໄດ້ມີປະກາດ 3 ເປີດ ຄື: ເປີດປະຕູ ( ເປີດໂອກາດ ), ເປີດສິ່ງກີດ ຂວາງ ແລະ ເປີດໃຈໃຫ້ຕ່າງປະເທດ ໄດ້ຮັບຮູ້ ແລະ ໃນປີ 2018-2019 ນີ້ຈະເຮັດໃຫ້ກົນໄກການດໍາເນີນທຸລະກິດງ່າຍຂຶ້ນ ແລະ ໃນຂະນະດຽວກັນ ກໍຈະເຮັດໃຫ້ຂັ້ນຕອນທີ່ຍາກຫຼຸດລົງ.

# ຂ່າວ-ພາບ: ຣັດສະໝີ ດວງສັດຈະ

-    AD conten website - ລັດຖະບານ ກໍານົດ 3 ເປີດ ເພື່ອກະຕຸ້ນການລົງທຶນ          
- lattana banner - ລັດຖະບານ ກໍານົດ 3 ເປີດ ເພື່ອກະຕຸ້ນການລົງທຶນ          
- lattana banner 1 - ລັດຖະບານ ກໍານົດ 3 ເປີດ ເພື່ອກະຕຸ້ນການລົງທຶນ          
error: Alert: ເນື້ອຫາຂ່າວມີລິຂະສິດ !!