ອາເມລິກາເລີ່ມມາດຕະການໃໝ່ ກວດກາເຂັ້ມງວດຜູ້ໂດຍສານການບິນ
ມາດຕະການໃໝ່ດ້ານຄວາມໝັ້ນຄົງ ລວມທັງການກວດກາຜູ້ໂດຍສານເຂັ້ມງວດກວ່າເກົ່າ ເລີ່ມມີຜົນບັງຄັບໃຊ້ແຕ່ວັນທີ 26 ຕຸລານີ້ ສຳລັບທຸກຖ້ຽວບິນໂດຍສານທີ່ເດີນທາງມຸ່ງໜ້າສູ່ສະຫະລັດອາເມລິກາ ເພື່ອໃຫ້ເປັນໄປຕາມຂໍ້ກຳນົດຂອງລັດຖະບານ ທີ່ອອກແບບເພື່ອຫລີກເວັ້ນການຫ້າມເອົາໂນດບຸກຂຶ້ນເຮືອບິນ.
ສຳນັກຂ່າວຣອຍເຕີ, ເອເອຟພີ ແລະ ເອພີ ລາຍງານຈາກນະຄອນຫລວງວໍຊິງຕັນ ປະເທດສະຫະລັດອາເມລິກາ ໃນວັນທີ 25 ຕຸລາວ່າ: ຫລາຍສາຍການບິນສາກົນກ່າວວ່າ: ມາດຕະການໃໝ່ຂອງທາງການອາເມລິກາເລີ່ມມີຜົນບັງຄັບໃຊ້ໃນວັນທີ 26 ຕຸລານີ້.
ຈາກການຕີລາຄາຂອງທາງການອາເມລິກາ ຄາດວ່າມາດຕະການໃໝ່ຈະສົ່ງຜົນກະທົບຕໍ່ຜູ້ໂດຍສານປະມານ 325.000 ຄົນ ໃນຖ້ຽວບິນການຄ້າປະມານ 2.000 ຖ້ຽວ ທີ່ເດີນທາງເຖິງອາເມລິກາໃນແຕ່ລະວັນ ຂອງສາຍການບິນ 180 ບໍລິສັດ ຈາກສະໜາມບິນ 280 ແຫ່ງໃນ 105 ປະເທດ.
ທາງການອາເມລິກາປະກາດມາດຕະການໃໝ່ໃນເດືອນມິຖຸນາ ເພື່ອຍົກເລີກຂໍ້ຫ້າມເອົາອຸປະກອນເອເລັກໂຕຣນິກແບບພົກພາຂຶ້ນເຮືອບິນຈາກ 10 ສະໜາມບິນໃນ 8 ປະເທດ ໃນພາກພື້ນຕາເວັນອອກກາງ ແລະ ອາຟຣິກາເໜືອ ເພື່ອຕອບສະໜອງຕໍ່ໄພຄຸກຄາມດ້ານຄວາມໝັ້ນຄົງ ແລະ ຂໍ້ຈຳກັດຖືກຍົກເລີກໃນເດືອນກໍລະກົດ, ແຕ່ລັດຖະບານອາເມລິກາຂອງປະທານາທິບໍດີ ໂດນັນ ທຣຳ ກ່າວວ່າ: ອາດກຳນົດໃຊ້ມາດຕະການໃໝ່ອີກເປັນແຕ່ລະກໍລະນີ, ຖ້າສາຍການບິນ ແລະ ສະໜາມບິນຕ່າງໆບໍ່ເພີ່ມມາດຕະການຄວາມປອດໄພ.
