ທະນາຄານລາວ-ຫວຽດແນະນໍາຜະລິດຕະພັນໃໝ່ສ້າງຄວາມສະດວກແກ່ລູກຄ້າ
ໃນວັນທີ 27 ຕຸລາຜ່ານມາ, ທະນາຄານລາວ-ຫວຽດ, ທີ່ນະຄອນຫຼວງ ວຽງຈັນ, ໄດ້ຈັດພິທີແນະນຳຜະລິດຕະພັນໃໝ່ຂອງຕົນ ເພື່ອສ້າງຄວາມສະ ດວກສະບາຍໃຫ້ລູກຄ້າ, ໂດຍການເຂົ້າຮ່ວມຂອງທ່ານນາງ ໂພທິຈັນ ທໍາມະເທວາ ຮອງຫົວໜ້າກົມຄຸນຄອງທະນາຄານທຸລະກິດ, ທະນາຄານແຫ່ງ ສປປ ລາວ.
ຜະລິດຕະພັນໃໝ່ທີ່ນຳສະເໜີຄັ້ງນີ້ ແມ່ນການເປີດນຳໃຊ້ລະບົບ LaoVietBank Digital Banking, ຊຶ່ງເປັນລະບົບຍຸກເທັກໂນໂລຊີທີ່ທັນສະ ໄໝໃນການອະນຸມັດໃຫ້ລູກຄ້າບຸກຄົນ ແລະ ນິຕິບຸກຄົນ, ໃຊ້ບໍລິການໄດ້ຕະ ຫຼອດ 24 ຊົ່ວໂມງ, ໂດຍຜ່ານລະບົບດີຈີຕໍເຊັ່ນ: ໂທລະສັບມືຖື, ຄອມພິວເຕີ, ແທັບແລັດ, ຊຶ່ງລູກຄ້າບໍ່ຈໍາເປັນຕ້ອງເຂົ້າໄປທະນາຄານ.
LaoVietBank Digital Banking ປະກອບມີບັນດາແອັບພລີເຄເຊິນ ດີຈີຕໍຄື: Mobile Smart Banking ເປັນລະບົບຕິດຕັ້ງແອັບໃນໂທລະສັບມືຖືສະມາດໂຟນ, ສາມາດນຳໃຊ້ໄດ້ສະເພາະບຸກຄົນ, ສ່ວນ Internet Banking ແມ່ນນໍາໃຊ້ບຣາວເຊີ ອິນເຕີແນັດ ໃນຄອມພິວເຕີ, ແທັບແລັດ, ໂທລະສັບມືຖື, ຊຶ່ງເໜາະສໍາລັບນິຕິບຸກ, ໂດຍທັັງສອງມີບົດບາດ ແລະ ໜ້າທີ່ໃນການຄຸ້ມຄອງບັນຊີ, ໂອນເງິນໃນລະບົບທະນາຄານລາວຫວຽດ, ໂອນໄປທະນາຄານ ອື່ນຢູ່ພາຍໃນ ສປປ ລາວ, ໂອນເປັນງວດອັດຕະໂນມັດ, ໂອນເປັນກຸ່ມ, ຕື່ມມູນຄ່າໂທ Topup ຂອງບັນດາເຄືອຄ່າຍໂທລະຄົມໃນລາວ, ຊໍາລະບັນດາໃບບິນ, ຝາກຖອນບັນຊີເງິນຝາກອອນລາຍ, ບໍລິການບັດໃນການຄົ້ນຫາທຸລະກໍາ ປິດ/ເປີດບັດ, ເຊື່ອມໂຍງເລກບັນຊີ, ເບີ່ງອັດຕາແລກປ່ຽນ, ອັດຕາດອກ ເບ້ຍ, ຈຸດທີ່ຕັ້ງສາຂາ, ທີ່ຕັ້ງ ATM.
ພິເສດສໍາລັບນິຕິບຸກຄົນ ຫຼື Internet Banking ແອັບພລີເຄເຊິນຍັງ ອະນຸຍາດໃຫ້ບັນດາບໍລິສັດສາມາດແບ່ງຂອບເຂດສິດໃນການອະນຸມັດທຸລະກໍາ, ກໍານົດວົງເງິນທຸລະກໍາດ້ວຍບໍລິສັດເອງ. ນອກຈາກນີ້ Internet Banking ຍັງ ສາມາດໃຫ້ບໍລິສັດຊໍາລະເງິນເດືອນໃຫ້ແກ່ພະນັກງານໄດ້ຢ່າງວ່ອງໄວ, ໂດຍບໍ່ ຕ້ອງເຂົ້າໄປທະນາຄານ ພຽງແຕ່ຜ່ານ LaoVietBank Digital Banking ກໍາສາມາດຊໍາລະໄດ້. ທັງນີ້ເພື່ອເປັນການສ້າງຄວາມສະດວກ ສະບາຍ ແລະ ປອດໄພໄປດ້ວຍຄຸນນະພາບໃຫ້ລູກຄ້າໄດ້ນຳໃຊ້.
ທະນາຄານຮ່ວມທຸລະກິດລາວ-ຫວຽດ (ທລວ) ໄດ້ຮັບການສ້າງຕັ້ງຂຶ້ນ ໃນວັນທີ 22 ມິຖຸນາ 1999 ບົນພື້ນຖານແຫ່ງຄວາມສາມັກຄີອັນພິເສດ ແລະ ຮອບດ້ານລະຫວ່າງ ສອງພັກ-ສອງລັດ ແລະ ປະຊາຊົນສອງຊາດລາວ-ຫວຽດ ນາມ ແນໃສ່ການເສີມຂະຫຍາຍສາຍພົວພັນທາງດ້ານເສດຖະກິດ-ການຄ້າ, ຊ່ວຍເຫຼືອບັນດານັກລົງທຶນ ແລະ ປະຊາຊົນທັງສອງຊາດ ລາວ-ຫວຽດນາມ.
