ຄະນະຜູ້ແທນພັກ ປປ ລາວ ເດີນທາງໄປຊົມເຊີຍຜົນສໍາເລັດກອງປະຊຸມໃຫຍ່ຄັ້ງທີ XIX ຂອງພັກກອມມູນິດຈີນ

ຄະນະຜູ້ຕາງໜ້າພິເສດຂອງສະຫາຍເລຂາທິການໃຫຍ່ຄະນະບໍລິຫານງານສູນກາງພັກປະຊາຊົນປະຕິວັດລາວ, ນໍາໂດຍສະຫາຍນາງ ສູນທອນ ໄຊຍະຈັກ ກໍາມະການສູນກາງພັກ, ຫົວໜ້າຄະນະພົວພັນຕ່າງປະເທດສູນກາງພັກ, ໄດ້ເດີນທາງໄປຊົມເຊີຍຜົນສໍາເລັດກອງປະຊຸມໃຫຍ່ຜູ້ແທນທົ່ວປະເທດຄັ້ງທີ XIX ຂອງພັກກອມມູນິດຈີນໃນລະຫວ່າງວັນທີ 29-31 ຕຸລາ 2017.

ໃນຕອນບ່າຍວັນທີ 30 ຕຸລານີ້, ສະຫາຍນາງ ສູນທອນ ໄຊຍະຈັກ ພ້ອມດ້ວຍຄະນະ ໄດ້ເຂົ້າຢ້ຽມຂໍ່ານັບສະຫາຍ ສີຈິ້ນຜິງ ເລຂາທິການໃຫຍ່ຄະນະກໍາມະການສູນກາງພັກກອມມູນິດຈີນຢູ່ທີ່ຫໍປະຊຸມປະຊາຊົນ, ສະຫາຍໄດ້ຕາງໜ້າໃຫ້ສະຫາຍເລຂາທິການໃຫຍ່ຄະນະບໍລິຫານງານສູນກາງພັກປະຊາຊົນປະຕິວັດລາວ ສະແດງຄວາມຊົມເຊີຍຢ່າງສຸດອົກສຸດໃຈຕໍ່ຜົນສໍາເລັດອັນສະຫງ່າງາມຂອງກອງປະຊຸມໃຫຍ່ຜູ້ແທນທົ່ວປະເທດຄັ້ງທີ XIX ຂອງພັກກອມມູນິດຈີນ, ເຊິ່ງໄດ້ສໍາເລັດລົງໃນວັນທີ 24 ຕຸລາ ຜ່ານມາ. ສະຫາຍຍັງໄດ້ມອບສານຊົມເຊີຍຂອງສະຫາຍ ບຸນຍັງ ວໍລະຈິດ ເລຂາທິການໃຫຍ່ຄະນະບໍລິຫານງານສູນກາງພັກ ປປ ລາວ ໃຫ້ສະຫາຍ ສີຈິ້ນຜິງ ເນື່ອງໃນໂອກາດທີ່ໄດ້ຮັບເລືອກຕັ້ງໃຫ້ດໍາລົງຕໍາແໜ່ງເປັນເລຂາທິການໃຫຍ່ຄະນະກໍາມະການສູນກາງພັກກອມມູນິດຈີນອີກສະໄໝໜຶ່ງ.

ສະຫາຍນາງ ສູນທອນ ໄຊຍະຈັກ ໄດ້ຕີລາສູງຕໍ່ຜົນສໍາເລັດຂອງການດໍາເນີນກອງປະຊຸມໃຫຍ່ຄັ້ງທີ XIX ຂອງພັກກອມມູນິດຈີນ, ເຊິ່ງເປັນເຫດການການເມືອງທີ່ມີຄວາມໝາຍສຳຄັນຍິ່ງໃນຊີວິດການເມືອງຂອງພັກກອມມູນິດຈີນ ທີ່ໄດ້ໄຂຂຶ້ນໃນໄລຍະທີ່ສໍາຄັນຂອງການກໍານົດຍຸດທະສາດ ແລະ ວາງແນວທາງນະໂຍບາຍ ເພື່ອບັນລຸເປົ້າໝາຍການສ້າງສັງຄົມອັນອິ່ມໜຳສຳລານຮອບດ້ານ ແລະ ຄວາມຝັນຂອງຈີນໃນການຟື້ນຟູຄວາມຮຸ່ງເຮືອງສີວິໄລຂອງເຊື້ອຊາດຈີນໃຫ້ປະກົດຜົນເປັນຈິງ ແລະ ສະແດງຄວາມເຊື່ອໝັ້ນວ່າພາຍໃຕ້ການຊີ້ນຳ-ນຳພາອັນສະຫລາດສ່ອງໃສຂອງພັກກອມມູນິດຈີນ ທີ່ຖືສະຫາຍ ສີຈິ້ນຜິງ ເປັນແກນກາງນັ້ນ, ພັກ-ລັດ ແລະ ປະຊາຊົນຈີນອ້າຍນ້ອງຈະສາມາດຍາດໄດ້ໄຊຊະນະໃໝ່, ຮອບດ້ານ ແລະ ໃຫຍ່ຫລວງກວ່າເກົ່າໃນການສ້າງປະເທດສັງຄົມນິຍົມທີ່ທັນສະໄໝຕາມສີສັນພິເສດຂອງຈີນ, ບັນລຸບັນດາເປົ້າໝາຍຍຸດທະສາດ ແລະ ພາລະກໍາປະຫວັດສາດຂອງພັກກອມມູນິດຈີນທີ່ມີກຽດສະຫງ່າຢ່າງມີໄຊ. ພ້ອມ​ນີ້, ສະຫາຍນາງ ສູນທອນ ໄຊຍະຈັກ ຍັງໄດ້ຕີລາຄາສູງຕໍ່ສາຍພົວພັນມິດຕະພາບອັນເປັນມູນເຊື້ອ ແລະ ການພົວພັນແບບຄູ່ຮ່ວມຍຸດທະສາດຮອບດ້ານໝັ້ນຄົງຍາວນານຕາມທິດ 4 ດີ ລະຫວ່າງ 2 ພັກ, 2 ລັດ ແລະ ປະຊາຊົນສອງຊາດລາວ-ຈີນ ທີ່ໄດ້ຮັບການເສີມຂະຫຍາຍ ແລະ ເກີດດອກອອກຜົນຢ່າງບໍ່ຢຸດຢັ້ງຕະຫລອດໄລຍະທີ່ຜ່ານມາ.

ໃນໂອກາດອັນສະຫງ່າລາສີນີ້, ສະຫາຍ ສີຈິ້ນຜິງ ໄດ້ສະແດງຄວາມຂອບໃຈຕໍ່ສະຫາຍຜູ້ຕາງໜ້າພິເສດຂອງສະຫາຍເລຂາທິການໃຫຍ່ ບຸນຍັງ ວໍລະຈິດ ທີ່ໄດ້ນໍາເອົາຄວາມຊົມເຊີຍຂອງຄະນະບໍລິຫານງານສູນກາງພັກ ປປ ລາວ ຕໍ່ຜົນສໍາເລັດກອງປະຊຸມໃຫຍ່ຄັ້ງທີ XIX ຂອງພັກກອມມູນິດຈີນ ແລະ ສານຊົມເຊີຍຂອງສະຫາຍ ບຸນຍັງ ວໍລະຈິດ ໃນໂອກາດທີ່ສະຫາຍໄດ້ຖືກເລືອກຕັ້ງເປັນເລຂາທິການໃຫຍ່ຄະນະກໍາມະການສູນກາງພັກກອມມູນິດຈີນອີກສະໄໝໜຶ່ງ, ເຊິ່ງເປັນການປະກອບສ່ວນອັນສໍາຄັນເຂົ້າໃນການເສີມສ້າງສາຍພົວພັນມິດຕະພາບອັນເປັນມູນເຊື້ອລະຫວ່າງສອງພັກ, ສອງລັດ ແລະ ປະຊາຊົນສອງຊາດລາວ-ຈີນ. ສະຫາຍ ສີຈິ້ນຜິງ ຍັງໄດ້ແຈ້ງໃຫ້ຄະນະຊາບກ່ຽວກັບຜົນສໍາເລັດຂອງກອງປະຊຸມໃຫຍຄັ້ງທີ XIX ຂອງພັກກອມມູນິດຈີນທີ່ຜ່ານມາ. ສະຫາຍ ຍັງໄດ້ຕີລາຄາສູງຕໍ່ຜົນສໍາເລັດໃນການສ້າງສາພັດທະນາທີ່ພັກ, ລັດ ແລະ ປະຊາຊົນລາວຍາດມາໄດ້ໃນໄລຍະທີ່ຜ່ານມາ ແລະ ໄດ້ສະແດງຄວາມເຊື່ອໝັ້ນວ່າ ປະຊາຊົນລາວອ້າຍນ້ອງ, ພາຍໃຕ້ການນໍາພາຂອງພັກ ປປ ລາວ ທີ່ມີສະຫາຍ ບຸນຍັງ ວໍລະຈິດ ເປັນຜູ້ນໍາໜ້ານັ້ນ, ຈະສືບຕໍ່ຍາດໄດ້ຜົນສໍາເລັດໃໝ່ ໃຫຍ່ຫລວງກວ່າເກົ່າໃນການພັດທະນາປະເທດຊາດຂອງຕົນ ແລະ ໄດ້ຝາກຄວາມຢື້ຢາມຖາມຂ່າວມາຍັງສະຫາຍ ບຸນຍັງ ວໍລະຈິດ ເລຂາທິການໃຫຍ່, ປະທານປະເທດແຫ່ງ ສປປ ລາວ.

ໃນໄລຍະຢ້ຽມຢາມ ແລະ ເຮັດວຽກທີ່ ສປຈີນ, ສະຫາຍນາງ ສູນທອນ ໄຊຍະຈັກ ຍັງໄດ້ພົບປະກັບ ສະຫາຍ ຊົ້ງທາວ ກໍາມະການສູນກາງພັກ, ຫົວໜ້າຄະນະພົວພັນຕ່າງປະເທດສູນກາງພັກກອມມູນິດຈີນ, ເຊິ່ງສອງຝ່າຍໄດ້ແຈ້ງໃຫ້ກັນຊາບກ່ຽວກັບສະພາບພົ້ນເດັ່ນພາຍໃນປະເທດຂອງຕົນ ແລະ ປຶກສາຫາລືທິດທາງໃນການຮ່ວມມືລະຫວ່າງສອງພັກ ກໍຄືສອງຄະນະພົວພັນຕ່າງປະເທດສູນກາງພັກລາວ-ຈີນ ເພື່ອສືບຕໍ່ເພີ່ມພູນຄູນສ້າງສາຍພົວພັນແບບຄູ່ຮ່ວມຍຸດທະສາດຮອບດ້ານໝັ້ນຄົງຍາວນານລະຫວ່າງສອງພັກ, ສອງລັດ ແລະ ປະຊາຊົນສອງຊາດລາວ-ຈີນ ໃຫ້ນັບມື້ໄດ້ຮັບການເພີ່ມພູນຄູນສ້າງ ແລະ ແຕກດອກອອກຜົນຢ່າງບໍ່ຢຸດຢັ້ງ.

error: Alert: Content is protected !!