ຊາວນະຄອນຫລວງວຽງຈັນຮ່ວມແຫ່ຜາສາດຜິ້ງໃນບຸນນະມັດສະການພະທາດຫລວງດ້ວຍບັນຍາກາດຄືກຄື້ນ
ພິທີແຫ່ຜາສາດເຜິ້ງໃນບຸນນະມັດສະການພະທາດຫລວງວຽງຈັນໄດ້ຈັດຂຶ້ນດ້ວຍບັນຍາກາດຄືກຄື້ນໃນຕອນບ່າຍວັນທີ 2 ພະຈິກນີ້, ໂດຍມີມວນຊົນຊາວນະຄອນຫລວງວຽງຈັນ, ພ້ອມດ້ວຍນັກທ່ອງທ່ຽວທັງພາຍໃນ ແລະ ຕ່າງປະເທດເຂົ້າຮ່ວມເປັນຈໍານວນຫລວງຫລາຍ, ໂດຍມີຂະບວນພະສົງ, ຂະບວນການນຳພັກ-ລັດ, ການນຳນະຄອນຫລວງວຽງຈັນ, ຂະບວນສິລະປະ, ຂະບວນຜາສາດເຜິ້ງທີ່ມາຈາກບັນດາເມືອງ, ຂະແໜງການ, ບ້ານ ແລະ ຂະບວນມວນຊົນຊາວນະຄອນຫລວງວຽງຈັນ, ໂດຍເລີ່ມແຕ່ຖະໜົນ 23 ສິງຫາຕໍ່ໜ້າວັດໜອງບອນເຄື່ອນເຂົ້າສະໜາມຫລວງແລ້ວແຫ່ອ້ອມພະທາດຫລວງ 3 ຮອບ ເພື່ອສັກກາລະບູຊາພະທາດຫລວງຕາມຮີດຄອງປະເພນີອັນດີງາມທີ່ເຄີຍປະຕິບັດມາ ແລະ ໃນຕອນເຊົ້າວັນທີ 3 ພະຈິກນີ້, ຊຶ່ງເປັນມື້ສຸດທ້າຍຂອງບຸນນະມັດສະການພະທາດຫລວງແມ່ນມີພິທີຕັກບາດຖວາຍສັງຄະທານແດ່ພະພິຂຸສົງສຳມະເນນຫລາຍພັນອົງ, ພ້ອມທັງຮັບຟັງທຳມະເທສະໜາຕາມຄຳສອນຂອງພຸດທະເຈົ້າຕໍ່ການໃຫ້ທານ, ຖືສິນພາວັນນາຕາມຮີດຄອງປະເພນີທີ່ມີມາແຕ່ດຶກດຳບັນ, ເຊິ່ງການເຮັດບຸນດັ່ງກ່າວເພື່ອລະນຶກເຖິງຄຸນງາມຄວາມດີ ແລະ ອຸທິດບຸນກຸສົນແດ່ພະເຈົ້າໄຊຍະເສດຖາທິລາດທີ່ເປັນຜູ້ກໍ່ສ້າງ ແລະ ປະຕິສັງຂອນພະທາດຫລວງວຽງຈັນ ແລະ ໃນຕອນບ່າຍວັນດຽວກັນຈະມີການແຂ່ງຂັນຕີຄີລະຫວ່າງທີມລັດຖະບານ ແລະ ທີມປະຊາຊົນ, ສ່ວນຕອນຄໍ່າຈະມີພິທີວຽນທຽນ ແລະ ຄົບງັນຕາມປະເພນີ.
