ພົນເອກ ຈັນສະໝອນ ຈັນຍາລາດ ເຂົ້າຮ່ວມພິທີເປີດງານວາງສະແດງອຸປະກອນເຕັກນິກການທະຫານສາກົນ 2024 ທີ່ສະຫະພັນຣັດເຊຍ.
ວັນທີ 12 ສິງຫາ 2024 ພົນເອກ ຈັນສະໝອນ ຈັນຍາລາດ ຮອງນາຍົກລັດຖະມົນຕີ ລັດຖະມົນຕີກະຊວງປ້ອງກັນປະເທດ ພ້ອມດ້ວຍຄະນະ ໄດ້ເດີນທາງເຂົ້າຮ່ວມພິທີເປີດງານວາງສະແດງອຸປະກອນເຕັກນິກການທະຫານສາກົນ 2024. ຊື່ງໄດ້ຈັດຂຶ້ນທີ່ສູນປະຊຸມ ແລະ ວາງສະແດງສາກົນ ປາຕຼີອົດ, ກູບິນກາ, ນະຄອນຫລວງມົດສະກູ ສະຫະພັນຣັດເຊຍ. ໂດຍມີບັນດາຄະນະນຳຈາກກະຊວງປ້ອງກັນປະເທດ ແລະ ຕົວແທນອຸດສາຫະກຳຈາກປະເທດຕ່າງໆ, ບັນດາບໍລິສັດຂອງສະຫະພັນຣັດເຊຍ ແລະ ຈາກຕ່າງປະເທດ ເຂົ້າຮ່ວມ.
ງານວາງສະແດງອຸປະກອນເຕັກນິກການທະຫານສາກົນ 2024 ຈັດຂຶ້ນໃນລະຫວ່າງວັນທີ 12-14 ສິງຫາ 2024 ໃນງານຈະໄດ້ສະແດງໃຫ້ເຫັນບັນດາເຕັກໂນໂລຊີຕ່າງໆຫລາກຫລາຍຮູບແບບ, ມີທັງອາວຸດຍຸດໂທປະກອນເຕັກນິກການທະຫານທີ່ມີຄວາມທັນສະໄໝທີ່ສຸດ, ມີເອກະລັກສະເພາະຕົວຈາກປະເທດລັດເຊຍ ຊື່ງມີບໍລິສັດຊັ້ນນຳທີ່ໄດ້ຮັບການຍ້ອງຍໍໃນລະດັບສາກົນ. ນອກນັ້ນຍັງມີ 4 ປະເທດເຂົ້າຮ່ວມ ຄື: ສປ ຈີນ, ເບຣາລຸດ, ອີຣານ, ອິນເດຍ ແລະ ມີຕົວແທນບໍລິສັດຈາກຕ່າງປະເທດທີ່ລົງທະບຽນເຂົ້າຮ່ວມຫລາຍກວ່າ 120 ແຫ່ງ. ໃນປີນີ້ໄດ້ຈັດຂຶ້ນເປັນຄັ້ງທີ 10 ມີຜະລິດຕະພັນປະມານ 1,500 ລາຍການ ແລະ ໄດ້ຮັບຄວາມສົນໃຈຫລາຍຈາກຕົວແທນຜູ້ຊ່ຽວຊານ ແລະ ສື່ຈາກຕ່າງປະເທດຢ່າງສະໝໍ່າສະເໝີ.
ພ້ອມດຽວກັນນີ້ກໍໄດ້ເປັນບ່ອນພົບປະ, ປືກສາຫາຫລື, ແລກປ່ຽນປະສົບການ, ເພີ່ມທະວີການຮ່ວມມືດ້ານການຜະລິດ, ສະໜອງອຸປະກອນເຕັກນິກການທະຫານໃຫ້ບັນດາບໍລິສັດຕ່າງໆຂອງຣັດເຊຍ ແລະ ບໍລິສັດອື່ນໆຈາກຕ່າງປະເທດ ເພື່ອສ້າງຄວາມເຂົ້າອົກເຂົ້າໃຈເຊີ່ງກັນ ແລະ ກັນ, ຊຸກຍູ້ປົກປັກຮັກສາສັນຕິພາບ ແລະ ສະຖຽນລະພາບຢູ່ພາກພື້ນ ແລະ ສາກົນ.
ພາບຂ່າວ: ວິທະຍຸກະຈາຍສຽງກອງທັບປະຊາຊົນລາວ
