ລາວ-ຫວຽດນາມ ສະຫລຸບການຈັດຕັ້ງປະຕິບັດ ແຜນການຮ່ວມມືກາງສະໄໝ ປະຈຳປີ 2024
ວັນທີ 16 ສິງຫາ 2024 ຜ່ານມາ, ສອງຄະນະກໍາມະການຮ່ວມມືທະວິພາຄີ ລາວ-ຫວຽດນາມ, ຫວຽດນາມ-ລາວ ຈັດກອງປະຊຸມສະຫລຸບ ຕີລາຄາ ສະພາບການຈັດຕັ້ງຜັນຂະຫຍາຍແຜນການຮ່ວມມື ລາວ-ຫວຽດນາມ ກາງສະໄໝ ປະຈໍາປີ 2024 ແລະ ຕີລາຄາຊຸກຍູ້ ການຈັດຕັ້ງຜັນຂະຫຍາຍສັນຍາຮ່ວມມືທະວິພາຄີ ລາວ-ຫວຽດນາມ ໄລຍະປີ 2021-2025, ທີ່ແຂວງ ເຫງະອານ, ສສ ຫວຽດນາມ ໂດຍການເປັນປະທານ ຮ່ວມຂອງທ່ານ ເພັດ ພົມພິພັກ ລັດຖະມົນຕີກະຊວງແຜນການ ແລະ ການລົງທຶນ, ປະທານຄະນະກໍາມະການຮ່ວມມື ລາວ-ຫວຽດນາມ ແລະ ທ່ານ ເຈິນ ກວັກ ເຟືອງ ຮອງລັດຖະມົນຕີ ກະຊວງແຜນການ ແລະ ການລົງທຶນ ຫວຽດນາມ, ຮອງປະທານຄະນະກຳມະການຮ່ວມມື ຫວຽດນາມ-ລາວ, ພ້ອມດ້ວຍ ພາກສ່ວນກ່ຽວຂ້ອງ ຂອງ ທັງສອງຝ່າຍ ລາວ-ຫວຽດນາມ ເຂົ້າຮ່ວມ.
ທ່ານ ເພັດ ພົມພິພັກ ລາຍງານຕໍ່ກອງປະຊຸມວ່າ: ສະພາບການຈັດຕັ້ງປະຕິບັດຂໍ້ຕົກລົງແຜນການຮ່ວມມື ປະຈໍາປີ 2024 ແລະ ສັນຍາວ່າດ້ວຍການຮ່ວມມືທະວິພາຄີ ໄລຍະປີ 2021-2025 ນັບແຕ່ປີ 2021 ມາຮອດປັດຈຸບັນ ໂດຍພາຍໃຕ້ການຊີ້ນຳຕົວຈິງ ຂອງສອງພັກ-ສອງລັດ ລາວ ແລະ ຫວຽດນາມ, ບວກກັບ ຄວາມພະຍາຍາມຂອງບັນດາກະຊວງ, ຂະແໜງການ, ທ້ອງຖິ່ນ ຕະຫລອດຮອດ ພາກສ່ວນເສດຖະກິດຕ່າງໆ ຂອງທັງສອງຝ່າຍ ໄດ້ເຮັດໃຫ້ການປະຕິບັດສັນຍາວ່າດ້ວຍການຮ່ວມມື ໄລຍະປີ 2021-2025 ສາມາດຈັດຕັ້ງປະຕິບັດ ແລະ ມີຜົນສຳເລັດຫລາຍດ້ານ ຄື: ການພົວພັນດ້ານການເມືອງ-ການຕ່າງປະເທດ, ປ້ອງກັນຊາດ-ປ້ອງກັນຄວາມສະຫງົບ, ດ້ານການ ສຶກສາ, ພັດທະນາຊັບພະຍາກອນມະນຸດ ແລະ ກໍ່ສ້າງວິຊາຊີບ, ດ້ານການຮ່ວມມືໃນຂົງເຂດເສດຖະກິດ ເປັນຕົ້ນ ການຮ່ວມມືດ້ານການລົງທຶນ ແຕ່ປີ 2021 ຮອດປັດຈຸບັນ, ສປປ ລາວ ໄດ້ອະນຸຍາດການລົງທຶນໃໝ່ໃຫ້ວິສາຫະກິດຫວຽດນາມ ປະຕິບັດໂຄງການຈໍານວນໜຶ່ງ ດ້ວຍມູນຄ່າລົງທຶນທັງໝົດ 869,9 ລ້ານໂດລາສະຫະລັດ, ສະເພາະ 6 ເດືອນຕົ້ນປີ 2024, ສປປ ລາວ ໄດ້ອອກໃບອະນຸຍາດການລົງທຶນ ໃຫ້ແກ່ວິສາຫະກິດຫວຽດນາມ ຈໍານວນ 6 ໂຄງການ, ມູນຄ່າລວມ 339 ລ້ານໂດລາສະຫະລັດ. ໃນນີ້, ມີຂະແໜງບໍ່ແຮ່ 1 ໂຄງການ, ຂະແໜງໄຟຟ້າ 1 ໂຄງການ ແລະ ຂະແໜງສາທາລະນະສຸກ 4 ໂຄງການ. ພ້ອມນີ້, ການຮ່ວມືດ້ານການຄ້າ ສອງປະເທດ ຍັງມີລັກສະນະເພີ່ມຂຶ້ນຢ່າງຕໍ່ເນື່ອງ ສະເພາະໃນ 6 ເດືອນຕົ້ນປີ 2024 ບັນລຸໄດ້ 927,8 ລ້ານໂດລາສະຫະລັດ ເພີ່ມຂຶ້ນ 11,1% ທຽບໃສ່ໄລຍະດຽວກັນຂອງປີ 2023. ໃນນັ້ນ, ມູນຄ່າສິນຄ້ານໍາເຂົ້າຈາກ ສສ ຫວຽດນາມ ບັນລຸໄດ້ 289,2 ລ້ານໂດລາສະຫະລັດ ແລະ ມູນຄ່າສິນຄ້າທີ່ ສປປ ລາວ ສົ່ງອອກໄປຫວຽດນາມ ບັນລຸໄດ້ 638,6 ລ້ານໂດລາສະຫະລັດ. ນັບແຕ່ໄລຍະ 2021-2023 ມີອັດຕາການຂະຫຍາຍຕົວສະເລ່ຍ 17,7% ເຫັນວ່າສາມາດບັນລຸໄດ້ຕາມການຕົກລົງຂອງສອງລັດຖະບານ (ເພີ່ມຂຶ້ນປີລະ 10-15%). ນອກນັ້ນ, ຍັງມີ ການຮ່ວມມືດ້ານພະລັງງານ-ບໍ່ແຮ່, ການຄົມມະນາຄົມ-ກໍ່ສ້າງ ແລະ ການຮ່ວມມືໃນຂົງເຂດອື່ນໆ ລະຫວ່າງ ບັນດາກະຊວງ, ອົງການ, ຂະແໜງການ, ຄະນະກໍາມະການຂອງສະພາແຫ່ງຊາດ, ທ້ອງຖິ່ນ, ອົງການຈັດຕັ້ງມະຫາຊົນຕ່າງໆ ໄດ້ຮັບການຊຸກຍູ້ ແລະ ຈັດຕັ້ງປະຕິບັດຢ່າງຄ່ອງຕົວ. ພ້ອມນີ້, ໃນໄລຍະປີ 2021-2025, ລັດຖະບານ ສສ ຫວຽດນາມ ໄດ້ຕົກລົງໃຫ້ການຊ່ວຍເຫລືອແກ່ ລັດຖະບານ ສປປ ລາວ ດ້ວຍບ້ວງທຶນຊ່ວຍເຫລືອລ້າ ຈໍານວນ 3.600 ຕື້ດົງ. ໃນນັ້ນ, ປີ 2021 ໄດ້ຈັດສັນທຶນ ຈໍານວນ 719,3 ຕື້ດົງ, ປີ 2022 ຈັດສັນທຶນ ຈໍານວນ 733,66 ຕື້ດົງ, ປີ 2023 ໄດ້ຈັດສັນທຶນ ຈໍານວນ 751,29 ຕື້ດົງ ແລະ ປີ 2024 ໄດ້ຈັດສັນທຶນ ຈໍານວນ 719,23 ເພື່ອຈັດຕັ້ງປະຕິບັດແຜນການຮ່ວມມືດ້ານການສຶກສາ ແລະ ບັນດາກິດຈະການ, ໂຄງການ ເຊິ່ງບັນດາໂຄງການຊ່ວຍເຫລືອລ້າ ທີ່ໄດ້ສໍາເລັດນັບແຕ່ປີ 2021 ຮອດປັດຈຸບັນ ແມ່ນມີ 18 ກິດຈະການ/ໂຄງການ, ໃນນັ້ນ ພົ້ນເດັ່ນແມ່ນ ໂຄງການຫໍສະພາແຫ່ງຊາດ ຫລັງໃໝ່, ໂຄງການໂຮງຮຽນມັດທະຍົມ-ວິຊາຊີບຕົວແບບ ມິດຕະພາບ ລາວ-ຫວຽດນາມ ຢູ່ເມືອງໜອງບົກ ແຂວງຄໍາມ່ວນ, ໂຄງການວິທະຍາຄານການເມືອງ ປ້ອງກັນຄວາມສະຫງົບ.
ສຳລັບທິດທາງແຜນການການຈັດຕັ້ງປະຕິບັດການຮ່ວມມືີໃນຕໍ່ໜ້າ ລະຫວ່າງ ສອງກະຊວງແຜນການ ແລະ ການລົງທຶນ ລາວ-ຫວຽດນາມ ຈະ ສືບຕໍ່ເສີມຂະຫຍາຍການພົວພັນຮ່ວມມືຮອບດ້ານ ທີ່ມີມູນເຊື້ອ, ອັນສໍາຄັນແມ່ນ ສອງຝ່າຍ ຈະຕ້ອງຮ່ວມກັນສ້າງແຜນການຮ່ວມມື ໃນໄລຍະໃໝ່ ໃນຕໍ່ໜ້າ ຮ່ວມກັນຕື່ມ ເພື່ອເປັນບ່ອນອີງໃນການຈັດຕັ້ງປະຕິບັດ ບາງເນື້ອໃນສໍາຄັນ ຄື: ສືບຕໍ່ເພີ່ມທະວີການຮ່ວມມືຮອບດ້ານ ລະຫວ່າງ ສອງກະຊວງແຜນການ ແລະ ການລົງທຶນ ໃນຂົງເຂດແຜນການ ແລະ ການລົງທຶນ; ໃນການຊຸກຍູ້ການພົວພັນຮ່ວມມືຂອງສອງປະເທດ; ສົ່ງເສີມ ແລະ ຄຸ້ມຄອງ ການລົງທຶນຂອງວິສາຫະກິດ ຢູ່ແຕ່ລະປະເທດ ພ້ອມທັງ, ເປັນໃຈກາງໃນການປະສານງານ ເພື່ອກະຕຸກຊຸກຍູ້ໃຫ້ບັນດາວິສາຫະກິດທີ່ໄດ້ມີສັນຍາ ຫລື ຂໍ້ຕົກລົງຮ່ວມກັນ ໃຫ້ໄດ້ຮັບການຈັດຕັ້ງປະຕິບັດຕາມແຜນການທີ່ວາງໄວ້ ແລະ ແກ້ໄຂບັນດາຂໍ້ຄົງຄ້າງຕ່າງໆ ຂອງບັນດາໂຄງການລົງທຶນ ທີ່ໄດ້ຮັບອະນຸຍາດໃນແຕ່ລະໄລຍະ ໃຫ້ຫລຸດລົງ; ສືບຕໍ່ຊ່ວຍເຫລືອໃນການກໍ່ສ້າງ, ບຳລຸງສ້າງດ້ານວິຊາສະເພາະ ໃຫ້ແກ່ພະນັກງານຂະແໜງ ແຜນການ ແລະ ການລົງທຶນ ຂອງລາວ ໃນແຕ່ລະໄລຍະ ໂດຍສະເພາະແມ່ນ ການຝຶກອົບຮົມການລົງທຶນເອກະຊົນ ແລະ ເຂດເສດຖະກິດພິເສດ, ວິທີການຄຸ້ມຄອງ ແລະ ຈັດສັນທຶນຂອງໂຄງການລົງທຶນ ຂອງລັດ ແລະ ໂຄງການຊ່ວຍເຫລືອ ຈາກຕ່າງປະເທດ; ວຽກງານສະຖິຕິດ້ານຄຸ້ມຄອງບໍລິຫານ ແລະ ຂົງເຂດວຽກງານອື່ນໆ; ສືບຕໍ່ ສົ່ງຊ່ຽວຊານດ້ານເສດຖະກິດມະຫາພາກຂອງກະຊວງແຜນການ ແລະ ການລົງທຶນ ຫວຽດນາມ ມາເຮັດວຽກ, ຮ່ວມກັບຝ່າຍລາວ ເພື່ອໃຫ້ການແນະນໍາຕໍ່ການແກ້ໄຂສະພາບຄວາມຫຍຸ້ງຍາກທາງດ້ານເສດຖະກິດ-ການເງິນ.
