ຜູ້ຊ່ຽວຊານຈາກ WHO ກ່າວວ່າ Mpox ບໍ່ລະບາດໜັກຄືໂຄວິດ ຢືນຢັນຮູ້ວິທີຮັບມື
ດຣ. ຮານ ຄລູກ ຜູ້ອໍານວຍການພາກພື້ນເອີຣົບຂອງອົງການອະນາໄມໂລກ (WHO) ຖະແຫລງສະຫລຸບສະຖານະການການແຜ່ລະບາດຂອງພະຍາດຕິດເຊື້ອພະຍາດໝາກສຸກລີງ (Mpox) ໂດຍຢືນຢັນວ່າ: ຄວາມສ່ຽງໃນການແຜ່ລະບາດຂອງ Mpox ຕໍ່ປະຊາກອນທົ່ວໄປນັ້ນຢູ່ໃນລະດັບຕໍ່າ.
ໂດຍທ່ານປະຕິເສດການປຽບທຽບຄວາມຮຸນແຮງຂອງການແຜ່ລະບາດລະຫວ່າງ Mpox ກັບ ໂຄວິດ ເນື່ອງຈາກຜູ້ຊ່ຽວຊານຮູ້ດີວ່າຕ້ອງຄວບຄຸມການແຜ່ລະບາດແນວໃດ ແລະ ຮູ້ວ່າແມ່ນຫຍັງຄືຂັ້ນຕອນທີ່ຈໍາເປັນເພື່ອແກ້ໄຂການແຜ່ລະບາດໃຫ້ໝົດໄປ.
ກ່ອນໜ້ານີ້, WHO ໄດ້ປະກາດໃຫ້ Mpox ເປັນສະຖານະການສຸກເສີນດ້ານສາທາລະນະສຸກລະຫວ່າງປະເທດ ເຊິ່ງຖືເປັນຄັ້ງທີ 2 ໃນຮອບ 2 ປີ ພາຍຫລັງພົບກໍລະນີການລະບາດຮຸນແຮງຂອງໄວຣັສ Mpox ສາຍພັນໃໝ່ ເອີ້ນວ່າ: Clade 1b ໃນຫລາຍພື້ນທີ່ທາງພາກກາງ ແລະ ພາກຕາເວັນອອກຂອງທະວີບອາຟຣິກາ.
ໂດຍຜູ້ຕິດເຊື້ອສ່ວນຫລາຍ 90% ພົບຢູ່ຄອງໂກ ເຊິ່ງມີລາຍງານຜູ້ຕິດເຊື້ອແລ້ວ 15,600 ກວ່າຄົນ ແລະ ເສຍຊີວິດແລ້ວຢ່າງໜ້ອຍ 540 ຄົນ.
ຂະນະທີ່ອາທິດຜ່ານມາ ຍັງພົບກໍລະນີການລະບາດຂອງ Mpox ສາຍພັນ Clade 1b ຢູ່ສະວີເດັນ ເຊິ່ງຖືເປັນປະເທດທໍາອິດນອກອາຟຣິກາ.
ສໍາລັບການແຜ່ລະບາດຂອງ Mpox ໃນປີ 2022 ທີ່ເກີດຂຶ້ນໃນຫລາຍປະເທດທົ່ວໂລກ ເກີດຈາກໄວຣັສ Mpox ສາຍພັນ Clade 2 ທີ່ຮຸນແຮງໜ້ອຍກວ່າ.
ດຣ. ຄລູກ ໝັ້ນໃຈວ່າການແຜ່ລະບາດຂອງ Mpox ສາມາດຢັບຢັ້ງໄດ້ດ້ວຍການຮ່ວມມືກັນຂອງທຸກປະເທດ. ພ້ອມທັງຮຽກຮ້ອງໃຫ້ທົ່ວໂລກຮ່ວມກັນວາງລະບົບຄວບຄຸມ ແລະ ຢັບຢັ້ງການລະບາດຂອງ Mpox ໃນຕອນນີ້.
ອ້າງອີງ:
