ຢາກແອວນ້ອຍແອວບາງຕ້ອງເຮັດແບບໃດ ?

ບັນຫາເລື່ອງສ່ວນເກີນທີ່ເກີດຂຶ້ນໃນບໍລິເວນຮອບແອວ ແລະ ໜ້າທ້ອງຖືເປັນໜຶ່ງບັນຫາໃຫຍ່ຕໍ່ຮູບຮ່າງຂອງແມ່ຍິງເຮົາ ບາງຄົນເຖິງວ່າຈະຈ່ອຍແຕ່ກໍມີໜ້າທ້ອງ, ເຊື່ອວ່າແມ່ຍິງເກີນ 50% ພົບກັບບັນຫາກ່ຽວກັບໜ້າທ້ອງ.

– ການມີໜ້າທ້ອງ ຫລື ມີພຸງ ເກີດຈາກສາເຫດຫລັກໆຄື :

1. ໄຂມັນສ່ວນເກີນໃນບໍລິເວນຮອບແອວ ແລະ ໜ້າທ້ອງ,
2. ກະເພາະອາຫານ ແລະ ລຳໄສ້ໃຫຍ່, ມີແກ໊ສຫລາຍໃນກະເພາະອາຫານຫລືອາຫານບໍ່ຍ່ອຍ.
3. ການໃກ້ຈະເປັນປະຈຳເດືອນ ໂດຍມີເລືອດຫໍ້ຢູ່ບໍລິເວນທ້ອງນ້ອຍ ແລະ ຮູ້ສຶກອຶດອັດ.
4. ໜ້າທ້ອງໜາ ຫລື ຢ່ອນຍານ ໂດຍສະເພາະແມ່ຍິງທີ່ເຄີຍຖືພາມາແລ້ວ.

– ຮອບແອວເທົ່າໃດຈື່ງພໍດີ ?

ເອົາລວງສູງຂອງທ່ານມາຫານສອງ ຜົນຮັບທີ່ໄດ້ແມ່ນຂະໜາດຮອບແອວທີ່ຫລາຍສຸດຂອງທ່ານ. ໂຕຢ່າງຄົນທ່ີມີລວງສູງ 160 ຊັງຕີແມັດ ຄວນມີຮອບແອວບໍ່ເກີນ 80 ຊັງຕີແມັດ ຫລື 32 ນິ້ວ.

– ວິທີແກ້ໄຂ ແລະ ຈັດການກັບບັນຫາໜ້າທ້ອງ :

1. ອອກກຳລັງກາຍຢ່າງສະໝໍ່າສະເໝີ ອາດຈະແມ່ນການຫລິ້ນໂຢຄະ, ບໍລິຫານໜ້າທ້ອງ ຫລື ເຕັ້ນກໍໄດ້. ສ່ວນການຊິດອັບ ກໍຕ້ອງເຮັດໃຫ້ຖືກວິທີ ແລະ ຄວາມເໝາະສົມຂອງສະພາບຮ່າງກາຍແຕ່ລະບຸກຄົນ, ແຕ່ຖ້າໃຜບໍ່ມີເວລາອອກກຳລັງກາຍຂໍແນະນຳໃຫ້ໄປຍ່າງເລື້ອຍໆ ວິທີນີ້ກໍຊ່ວຍປ້ອງກັນບໍ່ໃຫ້ມີໜ້າທ້ອງໄດ້ ຈາກຜົນການວິໄຈພົບວ່າ ແມ່ຍິງທີ່ຍ່າງເປັນປະຈຳມີແອວບາງກ່ວາຜູ້ທີ່ບໍ່ໄດ້ຍ່າງ 25%.
2. ກິນອາຫານຈຳພວກເສັ້ນໄຍໄຟເບີ ເພື່ອການຂັບຖ່າຍທີ່ສະດວກ ເຊັ່ນ : ຜັກໃບຂຽວ, ຜັກທີ່ມີນຳ້ເມືອກ ເປັນຕົ້ນແມ່ນຜັກປັງ, ຜັກບົ້ງ, ຜັກອີ່ຮຸມ ລວມເຖິງຖົ່ວຊະນິດຕ່າງໆ ແລະ ໝາກໄມ້.
3. ຫລີກເວັ້ນອາຫານຫວານ ແລະ ມີໄຂມັນ ລວມໄປເຖິງຈຳພວກເຫລົ້າເບຍທັງໝົດທີ່ເປັນສາເຫດຫລັກຂອງການມີໜ້າທ້ອງ ຈື່ໄວ້ເລີຍວ່າທ່ານບໍ່ມີທາງມີແອວຄອດກິ່ວ ແລະ ໜ້າທ້ອງແປໆໄດ້ ຫາກທ່ານຍັງບໍ່ເຊົາດື່ມເບຍເປັນປະຈຳ ຫລື ໂດຍເພາະການດື່ມໃນປະລິມານຫລາຍຈົນເມົາ.
4. ຮຽນຂັບຖ່າຍໃຫ້ເປັນເວລາ ແລະ ສະໝໍ່າສະເໝີເພື່ອບໍ່ໃຫ້ມີອາຫານບູດເນົ່າກັກຄ້າງຢູ່ໃນລຳໄສ້ເປັນເວລາດົນ ເພາະອາດເຮັດໃຫ້ຍື່ງທ້ອງ, ກິ່ນໂຕບໍ່ສະອາດ ແລະ ຜິວໜັງໝອງຄຳ້.
5. ຝຶກຫຸບໜ້າທ້ອງເຂົ້າເລື້ອຍໆຈົນເປັນນິໄສ ເພາະນອກຈາກຈະເຮັດໃຫ້ມີບຸກຄະລິກທີ່ສະຫງ່າງາມແລ້ວ ແລະ ຍັງເຮັດໃຫ້ກ້າມທ້ອງແຂງແຮງນຳອີກ.

– ເຄັດລັບການແຕ່ງໂຕປິດບັງໜ້າທ້ອງສ່ວນເກີນ :

1. ນຸ່ງເສື້ອສີເຂັ້ມພໍດີຮູບຮ່າງບໍ່ຮັດແໜ້ນ, ຫລີກເວັ້ນຜ້າຍືດບາງໆ ຫລື ຜ້າຮັດຕິດຜິວໜັງຢ່າງເດັດຂາດ ເພາະມັນຍິ່ງເຮັດໃຫ້ ເນັ້ນເຫັນໜ້າທ້ອງອອກມາເປັນຊັ້ນໆ ຈົນຄົນເຫັນຮັບບໍ່ໄດ້.
2. ຫລີກເວັ້ນເຄື່ອງນຸ່ງລາຍຂວາງສີສົດໆ ເພາະມັນຍິ່ງເຮັດໃຫ້ເຮົາບໍ່ມີແອວ.
3. ຢ່າຄິດວ່າໂສ້ງແອວສູງຈະປົກປິດໜ້າທ້ອງໄດ້ ເພາະມັນຍິ່ງເນັ້ນໃຫ້ເຫັນໜ້າທ້ອງກ່ວາເກົ່າ.
4. ບໍ່ຄວນນຸ່ງສິ້ນແອວລອຍ ຄວນນຸ່ງສິ້ນແອວສູງພຽງຮອດສາຍບື ແລະ ເອົາເສື້ອເຂົ້າໃນສິ້ນ.
5. ປິດບັງສ່ວນເກີນຂອງທ່ານດ້ວຍເສື້ອຄຸມ ຫລື ເສື້ອແວັດສຸພາບກໍໄດ້ ແລ້ວແຕ່ໂອກາດ.
6. ພະຍາຍາມໃສ່ເຄື່ອງປະດັບ ຫລື ອັນໃດກໍຕາມທີ່ເຮັດໃຫ້ບໍລິເວນແອວຂອງທ່ານບໍ່ສະດຸດຕາຄົນອື່ນ ຈົ່ງຫັນເຫຄວາມສົນໃຈ ນັ້ນໄປໃສ່ກະເປົ໋າໜ່ວຍງາມ ຫລື ເກີບສົ້ນສູງຄູ່ສະຫງ່າຂອງທ່ານກໍໄດ້.

7. ກະໂປ່ງຊົງໂຕ A ສີເຂັ້ມ ຍາວພຽງຫົວເຂົ່າຈະຊ່ວຍປົກປິດໜ້າທ້ອງ ແລະ ກົກຂາໄດ້ເປັນຢ່າງດີ.