ໝົດກັງວົນເລື່ອງຕຸ່ມຜື່ນຜ້າອ້ອມສຳເລັດຮູບ

- advert banner 728 90 728x90 - ໝົດກັງວົນເລື່ອງຕຸ່ມຜື່ນຜ້າອ້ອມສຳເລັດຮູບ

ສຳລັບພໍ່ແມ່ມືໃໝ່ທີ່ກຳລັງມີບັນຫາກັບການລ້ຽງລູກ ໂດຍສະເພາະເລື່ອງຂອງຕຸ່ມຜື່ນຈາກຜ້າອ້ອມສຳເລັດຮູບທີ່ສ້າງຄວາມ ກັງວົນໃຫ້ກັບພໍ່ແມ່ ແລະ ຄວາມບໍ່ສະບາຍໂຕໃຫ້ແກ່ລູູກນ້ອຍ ເຊິ່ງຕຸ່ມຜື່ນຜ້າອ້ອມສຳເລັດຮູບນີ້ມີຫລາຍຮູບແບບ ບໍ່ວ່າຈະແມ່ນຕຸ່ມ ຜື່ນເມັດນ້ອຍໆໄປຈົນເຖິງຜິວໜັງແຫ້ງແຕກທີ່ອາດເຖິງຂັ້ນມີເລືອດຊຶມ ຈາກສານແອມໂມໂນຍທີ່ມາຈາກຄວາມປຽກຊຸ່ມຂອງຜ້າອ້ອມສຳເລັດຮູບ ແລະ ຜ້າອ້ອມທົ່ວໄປ ເຮົາຈຶ່ງໄດ້ລວບລວມວິທີການຮັບມືກັບບັນຫານີ້ມາແນະນຳ ເພື່ອໃຫ້ພໍ່ແມ່ສະບາຍໃຈຫລາຍຂຶ້ນ.

- new3 - ໝົດກັງວົນເລື່ອງຕຸ່ມຜື່ນຜ້າອ້ອມສຳເລັດຮູບ

– ໝັ່ນກວດເບິ່ງ ແລະ ປ່ຽນຜ້າອ້ອມເລື້ອຍໆ : ວິທີແກ້ໄຂບັນຫາເລື່ອງຕຸ່ມຜື່ນຜ້າອ້ອມທີ່ດີສຸດແມ່ນການປ່ຽນຜ້າອ້ອມໃຫ້ລູກທຸກເທື່ອທີ່ມີການຂັບຖ່າຍອອກມາ ເຊິ່ງເດັກນ້ອຍໃນໄວນີ້ຍັງບໍ່ສາມາດບອກໄດ້ວ່າຈະຍ່ຽວ ຫລື ຖ່າຍອາຈົມເມື່ອໃດ ຈຶ່ງເປັນໜ້າທີ່ຂອງພໍ່ແມ່ໃນການລ້ຽງລູກທີ່ຈະຕ້ອງໄດ້ໝັ່ນເບິ່ງວ່າຜ້າອ້ອມປຽກ ຫລື ຊຸ່ມຫລືບໍ່ ຈະໄດ້ປ່ຽນຜ້າອ້ອມໃໝ່ໃຫ້ເພື່ອຫລຸດປະຕິກີລິຍາແອມໂມເນຍທີ່ອາດເກີດຂຶ້ນ.

– ຫລຸດການສຽດສີລະຫວ່າງຜິວໜັງກັບຜ້າອ້ອມ : ເຖິງວ່າພໍ່ແມ່ຈະປ່ຽນຜ້າອ້ອມຫລາຍເທື່ອປານໃດ,​ ແຕ່ຖ້າບໍ່ມີການທາແປ້ງ ຫລື ທາຄຣີມເພື່ອຫລຸດຄວາມອັບຊຸ່ມ ຫລື ການສຽດສີໂດຍກົງລະຫ່ວາງຜິວບໍລິເວນກົ້ນຂອງລູກກັບຜ້າອ້ອມ ກໍອາດສົ່ງຜົນໃຫ້ເກີດຕຸ່ມຜື່ນຜ້າອ້ອມໄດ້ເຊັ່ນກັນ ລອງໃຊ້ຜະລິດຕະພັນອໍແກນິກ ຈະຊ່ວຍຕື່ມຄວາມຊຸ່ມຊື່ນໃຫ້ຜິວຂອງລູກ.

– ລະບາຍອາກາດໃຫ້ລູກ : ບໍ່ຈຳເປັນຈະຕ້ອງໃສ່ຜ້າອ້ອມສຳເລັດຮູບໃຫ້ລູກຕະຫລອດເວລາ ລອງໃຫ້ລູກນອນເປືອຍກົ້ນແດ່ ຢ່າງໜ້ອຍມື້ລະ 15 ນາທີ ຫລັງອາບນຳ້ ຈະເຮັດໃຫ້ລູກຮູ້ສຶກສະບາຍໂຕ ແລະ ຊ່ວຍປ້ອງກັນຕຸ່ມຜື່ນຜ້າອ້ອມທີ່ອາດເກີດຂຶ້ນໄດ້ ແຕ່ຄວນລະສັງມົດ ແລະ ແມງໄມ້ທີ່ອາດກໍ່ບັນຫາໃຫ້ຫລາຍກ່ວາຕຸ່ມຜື່ນແບບທຳມະດານຳ.

– ບໍ່ຈຳເປັນຕ້ອງໃຊ້ສະບູ : ເຂົ້າໃຈວ່າພໍ່ແມ່ບາງຄົນຍັງໃໝ່ສຳລັບການລ້ຽງລູກ ຈຶ່ງອາດເຜີຮັກສາຄວາມສະອາດຫລາຍເກີນ ໄປ ໂດຍການເອົາສະບູລ້າງກົ້ນລູກທຸກໆມື້, ແຕ່ຜິວໜັງຂອງເດັກໃນໄວນີ້ມີຄວາມບອບບາງ ແລະ ລະອຽດອ່ອນ ການລ້າງດ້ວຍສະບູທຸກມື້ຈຶ່ງເຮັດໃຫ້ຜິວແຫ້ງ ເຊິ່ງອາດເຮັດໃຫ້ເກີດການລະຄາຍເຄືອງຫລາຍຂຶ້ນ ຫາກຢາກເຮັດຄວາມສະອາດແທ້ໆ ຄວນເລືອກໃຊ້ຜະລິດຕະພັນທີ່ສະກັດຈາກທຳມະຊາດ.

– ປຶກສາແພດ : ຫາກລູກມີອາການຂອງຕຸ່ມຜື່ນຜ້າອ້ອມແລ້ວ ຢ່າຊື້ຢາມາໃຊ້ເອງ ເພາະຢາບາງຊະນິດກໍອາດຈະໄປກະຕຸ້ນໃຫ້ເກີດການແພ້ຫລາຍຂຶ້ນກ່ວາເກົ່າ ໂດຍສະເພາະຢາປະເພດຂີ້ເຜິ້ງທີ່ເມື່ອທາແລ້ວຢາຈະໄປເຄືອບຜິວຈົນເຮັດໃຫ້ເກີດການອັບຊຸ່ມຫລາຍກ່ວາເກົ່າ ຄວນປຶກສາແພດທຸກເທື່ອເພື່ອໃຫ້ໄດ້ຢາປິ່ນປົວທີ່ຖືກຕ້ອງທີ່ສຸດ ເພາະບັນຫາຕຸ່ມຜື່ນຜ້າອ້ອມຂອງລູກເປັນບັນຫາທີ່ພໍ່ແມ່ທຸກຄົນຕ້ອງພົບຢູ່ແລ້ວ,​ ແຕ່ຖ້າພໍ່ແມ່ຮູ້ວິທີຮັບມືດ້ວຍການໃຊ້ 5 ວິທີຂ້າງເທິງນີ້ໃນການປ້ອງກັນ ກໍສາມາດຫລຸດຄວາມກັງວົນໃນເລື່ອງນີ້ໄດ້ແລ້ວ ແລະ ຍັງຊ່ວຍໃຫ້ລູກລ່າເລີງຈາກຄວາມສະບາຍໂຕໄດ້ນຳ.

error: Content is protected !!