ປະທານອົງການກວດກາແຫ່ງລັດ ເນັ້ນໃຫ້ເມືອງນາແລ ເພີ່ມທະວີວຽກງານກວດກາພັກ-ກວດກາລັດ ເພື່ອສ້າງການຫັນປ່ຽນຢ່າງເລິກເຊິ່ງຮອບດ້ານ

ວັນທີ 23 ສິງຫາ 2024, ທ່ານ ຄໍາພັນ ພົມມະທັດ ປະທານຄະນະກວດກາສູນກາງພັກ, ປະທານອົງການກວດກາແຫ່ງລັດ, ຫົວໜ້າອົງການຕ້ານການສໍ້ລາດບັງຫລວງຂັ້ນສູນກາງ ພ້ອມດ້ວຍຄະນະ ໄດ້ລົງເຄື່ອນໄຫວຢ້ຽມຢາມ ແລະ ເຮັດວຽກຢູ່ເມືອງນາແລ, ແຂວງຫລວງນ້ຳທາ.

ການລົງເຄື່ອນໄຫວຄັ້ງນີ້, ທ່ານ ຄຳພັນ ພົມມະທັດ ມີຄຳເຫັນໂອ້ລົມ ແລະ ຊີ້ນຳຄະນະພັກ, ຄະນະນຳຂອງເມືອງ ສືບຕໍ່ການສຶກສາອົບຮົມການເມືອງ – ນໍາພາແນວຄິດ ໃຫ້ສະມາຊິກພັກ, ພະນັກງານ-ລັດຖະກອນ, ທະຫານຕໍາຫຼວດ, ປະຊາຊົນບັນດາເຜົ່າພາຍໃນເມືອງ ສ້າງລະບົບການເມືອງ-ແນວຄິດໃຫ້ເຂັ້ມແຂງ; ສືບຕໍ່ນຳພາ-ຊີ້ນໍາ ຊຸກຍູ້ຈັດຕັ້ງປະຕິບັດແຜນພັດທະນາເສດຖະກິດ-ສັງຄົມ, ສຸມໃສ່ການພັດທະນາຂະແໜງການເປັນຕົ້ນແມ່ນການປູກຝັງ, ລ້ຽງສັດ, ສ້າງເສດຖະກິດເອກະລາດເປັນເຈົ້າຕົນເອງ ຕິດພັນກັບການຜັນຂະຫຍາຍແນວທາງການປ່ຽນແປງໃໝ່ໃຫ້ເຂົ້າສູ່ລວງເລິກ, ແກ້ໄຂບັນຫາຕົວຈິງ, ເປັນເຈົ້າການນໍາພາ-ຊີ້ນຳການກະກຽມດຳເນີນກອງປະຊຸມໃຫຍ່ 3 ຂັ້ນ, ໂດຍສະເພາະດ້ານເນື້ອໃນ ໃຫ້ເອົາໃຈໃສ່ໃນການຕີລາຄາ ແລະ ປະເມີນຄືນໃນໄລຍະຜ່ານມາຢ່າງຈິງຈັງວ່າຜົນສໍາເລັດທີ່ຍາດມາໄດ້ແມ່ນຍ້ອນຫຍັງ, ສາເຫດມີຜົນສໍາເລັດຍ້ອນປັດໄຈຫຍັງແດ່ ແລະ ຄວາມສາມາດບົ່ມຊ້ອນຂອງເມືອງມີຫຍັງ, ບົນພື້ນຖານນັ້ນຕ້ອງເບິ່ງບຸກຄົນທີ່ມີຄວາມຮູ້, ຄວາມສາມາດ, ມີຮັບຜິດຊອບສູງຕໍ່ໜ້າທີ່ການເມືອງ, ມີຄວາມເສຍສະຫລະ, ຜູ້ທີ່ມີຄວາມກ້າຫານກ້າເຮັດກ້າຮັບຜິດຊອບ.

ນອກນີ້, ທ່ານຍັງໄດ້ເນັ້ນໃຫ້ຄະນະພັກແຕ່ລະຂັ້ນຕ້ອງເອົາໃຈໃສ່ວຽກງານຕິດຕາມ, ກວດກາຢ່າງແຂງແຮງ, ເພີ່ມທະວີຈັດຕັ້ງປະຕິບັດບົດບາດຂອງວຽກງານກວດກາພັກ-ກວດກາລັດ ເພື່ອສ້າງການຫັນປ່ຽນຢ່າງເລິກເຊິ່ງຮອບດ້ານ ຕິດພັນກັບການແກ້ໄຂບັນຫາ ກໍ່ຄືຄວາມຮັບຜິດ ຊອບຕົວຈິງຂອງຄະນະພັກແຕ່ລະຂັ້ນ ໃຫ້ມີຜົນສໍາເລັດດ້ວຍປະສິດທິພາບ ແລະ ປະສິດທິຜົນສູງ.