ປກສ ເມືອງບາຈຽງຈະເລີນສຸກ ສຶກສາອົບຮົມກຸ່ມແກ້ງຂີ່ລົດກວນເມືອງ 5 ຄົນ

ວັນທີ 20 ສິງຫາ 2024, ເຈົ້າໜ້າທີ່ຕຳຫລວດ ປກສ ເມືອງບາຈຽງຈະເລີນສຸກ ແຂວງຈຳປາສັກ ໄດ້ສຶກສາອົບຮົມກຸ່ມແກ້ງຂີ່ລົດກວນເມືອງ ແລະ ດັດແປງສະພາບເຕັກນິກລົດ 5 ຄົນ ພ້ອມທັງເຮັດບົດບັນທຶກສຶກສາອົບຮົມ ເພື່ອບໍ່ໃຫ້ພວກກ່ຽວກັບມາກະທຳຜິດອີກ ແລ້ວມອບສົ່ງຄືນໃຫ້ພໍ່ແມ່ຜູ້ປົກຄອງນຳໄປສຶກສາອົບຮົມຕື່ມອີກ, ຖ້າຫາກພວກກ່ຽວກະທຳຜິດອີກ ແມ່ນຈະໄດ້ດຳເນີນຄະດີ ແລະ ປັບໃໝຕາມລະບຽບການ.

ພັນຕີ ພອນສະຫວັນ ລິນສາລີ ຫົວໜ້າໜ່ວຍງານຈະລາຈອນ ປກສ ເມືອງບາຈຽງຈະເລີນສຸກ ໄດ້ສຶກສາອົບຮົມ ແລະ ກ່າວເຕືອນໃຫ້ພວກກ່ຽວຮັບຮູ້ ແລະ ເຂົ້າໃຈເຖິງຜົນຮ້າຍ ໄພອັນຕະລາຍຂອງການຂັບຂີ່ລົດໄວໃຊ້ສຽງດັງລົບກວນສັງຄົມ, ຂັບຂີ່ລົດເປັນພຶງເປັນແພ, ຍົກລໍ້, ຂັບຂີ່ລົດດັດແປງສະພາບເຕັກນິກ ແລະ ບັນຫາອື່ນໆ ທີ່ພາໃຫ້ເກີດອຸປະຕິເຫດ ເຊິ່ງການກະທຳດັ່ງກ່າວແມ່ນສົ່ງຜົນກະທົບຕໍ່ຕົນເອງ, ຄອບຄົວ ແລະ ສັງຄົມ. ພ້ອມທັງຮຽກຮ້ອງໃຫ້ພວກກ່ຽວຢຸດເຊົາພຶດຕິກຳທີ່ບໍ່ດີ ທີ່ຜິດຕໍ່ລະບຽບກົດໝາຍບ້ານເມືອງ, ປັບປຸງຕົນເອງໃຫ້ກາຍເປັນຄົນດີຂອງພໍ່ແມ່, ຄອບຄົວ ແລະ ສັງຄົມ.