ພາກເໜືອຫວຽດນາມເສຍຫາຍໜັກ ມີຜູ້ເສຍຊີວິດແລ້ວ 4 ຄົນ ຈາກອິດທິພົນພາຍຸໄຕ້ຝຸ່ນຢາງິ
ມີຜູ້ເສຍຊີວິດຢ່າງໜ້ອຍ 4 ຄົນ ຈາກຄວາມຮຸນແຮງຂອງພາຍຸໄຕ້ຝຸ່ນຢາງິ ເຊິ່ງສ້າງຄວາມເສຍຫາຍເປັນວົງກວ້າງໃຫ້ພາກເໜືອຂອງຫວຽດນາມ.
ວັນທີ 8 ກັນຍາ, ສື່ທ້ອງຖິ່ນຂອງຫວຽດນາມລາຍງານວ່າ: ມີຜູ້ເສຍຊີວິດແລ້ວຢ່າງໜ້ອຍ 4 ຄົນ ແລະ ໄດ້ຮັບບາດເຈັບອີກຢ່າງໜ້ອຍ 78 ຄົນ ຈາກອິດທິພົນຮຸນແຮງຂອງພາຍຸໄຕ້ຝຸ່ນຢາງິ ເຊິ່ງພັດຂຶ້ນຝັ່ງລະຫວ່າງເມືອງຮາຍຟອງກັບແຂວງກວາງນິນ ທາງພາກເໜືອຂອງຫວຽດນາມ ໃນວັນທີ 7 ກັນຍາຜ່ານມາ ດ້ວຍຄວາມໄວລົມສູງສຸດໃກ້ສູນກາງ 203 ກິໂລແມັດຕໍ່ຊົ່ວໂມງ ສົ່ງຜົນເຮັດໃຫ້ເກີດຝົນຕົກໜັກ, ລົມພັດແຮງຈົນຕົ້ນໄມ້ຫັກ ແລະ ອາຄານບ້ານເຮືອນເປ່ເພເສຍຫາຍຈໍານວນຫລາຍ ແລະ ມີລາຍງານນໍຖ້າຖ້ວມກະທັນຫັນໃນຫລາຍພື້ນທີ່.
ທັງນີ້, ເມືອງຮາຍຟອງເຊິ່ງເປັນເມືອງທ່າໃຫຍ່ອັນດັບ 3 ຂອງຫວຽດນາມ ແລະ ມີປະຊາກອນປະມານ 2 ລ້ານຄົນ ໄດ້ຮັບຜົນກະທົບຈາກພາຍຸຢາງິຢ່າງໜັກ ໂດຍເກີດໄຟຟ້າມອດເປັນເວລາດົນໃນຫລາຍພື້ນທີ່ຂອງເມືອງ.
ຂະນະທີ່ໜ່ວຍງານບັນເທົາທຸກອົບພະຍົບປະຊາຊົນອອກຈາກພື້ນທີ່ສ່ຽງແລ້ວເກືອບ 50,000 ຄົນ ແລະ ຍັງມີການຮັກສາຄໍາສັ່ງໃຫ້ປະຊາຊົນໃນພື້ນທີ່ປະສົບໄພຫລີກລ່ຽງການອອກນອກເຄຫາສະຖານ. ນອກຈາກນີ້ ກະຊວງສຶກສາທິການຫວຽດນາມສັ່ງປິດໂຮງຮຽນໃນ 12 ແຂວງຊົ່ວຄາວ ລວມທັງນະຄອນຫລວງຮ່າໂນ້ຍ.
ກົມອຸຕຸນິຍົມວິທະຍາແຫ່ງຊາດຫວຽດນາມລາຍງານວ່າ: ເຖິງວ່າຄວາມໄວຂອງພາຍຸຢາງິຫລຸດລົງເມື່ອເຂົ້າສູ່ແຜ່ນດິນ, ແຕ່ຍັງຢູ່ໃນລະດັບສູງປະມານ 102 ກິໂລແມັດຕໍ່ຊົ່ວໂມງ ໃນຄືນວັນທີ 7 ກັນຍາຜ່ານມາ ແລະ ປະລິມານນໍ້າຝົນຢູ່ເມືອງຮາຍຟອງ ແລະ ແຂວງກວາງນິນສະສົມສູງເຖິງ 20 ຊັງຕີແມັດ ແລະ ພາຍຸມີທິດທາງມຸ້ງໜ້າຂຶ້ນເໜືອ ເດີນທາງສູ່ລາວເປັນຈຸດໝາຍຕໍ່ໄປ.
ກ່ອນພາຍຸໄຕ້ຝຸ່ນຢາງິ ເຊິ່ງເປັນພາສາຍີ່ປຸ່ນ ໝາຍຄວາມວ່າ: ແບ້ ເຄື່ອນທີ່ມາຫວຽດນາມ ພາຍຸໄດ້ພັດຜ່ານມົນທົນໄຫ່ໜານ ທາງພາກໃຕ້ຂອງຈີນ ດ້ວຍຄວາມໄວລົມສູງສຸດໃກ້ສູນກາງຫລາຍກວ່າ 230 ກິໂລແມັດຕໍ່ຊົ່ວໂມງ ສົ່ງຜົນເຮັດໃຫ້ມີຜູ້ເສຍຊີວິດແລ້ວ 3 ຄົນ ແລະ ໄດ້ຮັບບາດເຈັບອີກຫລາຍກວ່າ 100 ຄົນ.
