ແຂວງຫລວງນ້ຳທາ ເລັ່ງຊ່ວຍເຫລືອຜູ້ປະສົບໄພນ້ຳຖ້ວມ 9 ຈຸດ

ວັນທີ 10 ກັນຍາ 2024 ນີ້, ທ່ານ ຄຳເລົາ ແກ້ວລະກຳ ຫົວໜ້າພະແນກ ແຮງງານ ແລະ ສະຫວັດດີການສັງຄົມ ຮອງປະທານຄະນະກຳມະການຄຸ້ມຄອງໄພພິບັດ ແຂວງຫລວງນ້ຳທາ ຕໍ່ຂ່າວ ໜັງສືພິມລາວພັດທະນາ ວ່າ: ເຫດການນໍ້າຖ້ວມຢູ່ແຂວງ ຫລວງນໍ້າທາ ເລີ່ມແຕ່ຕອນເຊົ້າ ວັນທີ 9 ກັນຍາ ມີສະພາບສະພາບນ້ຳຖ້ວມທັງໝົດ 9 ຈຸດນັ້ນ ເຖິງເວລາ 10:00 ຂອງວັນທີ 10 ກັນຍາ 2024 ມີ 4 ຈຸດທີ່ນໍ້າເລີ່ມບົກແຫ້ງລົງຄື ຈຸດບ້ານແຟນໃໝ່, ທົ່ງໄຈ້ເໜືອ, ທົ່ງໄຈ້ໃຕ້ ແລະ ບ້ານດອນສຳພັນ. ສ່ວນອີກ 5 ຈຸດຄື: ຈຸດ ບ້ານວຽງເໜືອ, ບ້ານວຽງໃຕ້, ບ້ານຫລວງ, ບ້ານຄອນ ແລະ ບ້ານດອນຄູນຍັງຢູ່ໃນລະດັບສູງ ປັດຈຸບັນ ກຳລັງເລັ່ງຂຸ້ນຂ້ຽວລົງໄປຊີ້ນຳແຕ່ລະຈຸດ ພ້ອມກຳລັງພົນ ແລະ ມີເຮືອກູ້ໄພຈຳນວນໜຶ່ງເຂົ້າຊ່ວຍຍົກຍ້າຍປະຊາຊົນອອກຈາກພື້ນທີ່ອັນຕະລາຍ ແຕ່ຍັງບໍ່ສາມາດປະເມີນຄວາມເສຍຫາຍໄດ້ເທື່ອ.

ການຊ່ວຍເຫລືອເບື້ອງຕົ້ນ ປະຊາຊົນໄດ້ຮັບການຊ່ວຍເຫລືອໄປຢູ່ເຂດທີ່ມີຄວາມປອດໄພແລ້ວ ຢູ່ຕາມສູນທີ່ຈັດໄວ້ ແລະ ບາງພາກສ່ວນກໍໄປຢູ່ນຳພີ່ນຳນ້ອງຕາມຄວາມສະໜັກໃຈ ແລະ ຈັດສົ່ງເຄື່ອງຊ່ວຍເຫລືອປະເພດສະບຽງອາຫານການກິນໃຫ້ເຂົາເຈົ້າຈົນເຖິງທີ່ ພ້ອມທັງແຕ່ງຕັ້ງຄະນະຮັບຜິດຊອບສະບຽງອາຫານແຕ່ງຢູ່ຄົວກິນໃຫ້ແກ່ຜູ້ປະສົບໄພ ຄຽງຄູ່ກັນນີ້ກໍມີທັງແພດໝໍລົງໄປປະຈຳຢູ່ຕາມສູນຕ່າງເພື່ອຕິດຕາມກວດ ແລະ ປິ່ນປົວສຸຂະພາບໃຫ້ຜູ້ທີ່ປະສົບເຄາະຮ້າຍ. ພ້ອມທັງຂໍຮຽກຮ້ອງໃຫ້ທຸກພາກສ່ວນ ບໍລິສັດ ຫ້າງຮ້ານ ທັງພາຍໃນແຂວງ ຕ່າງແຂວງ ແລະ ພາກສ່ວນອື່ນໆ ລວມທັງຕ່າງປະເທດທີ່ມີໃຈໃສສັດທາຢາກຊ່ວຍເຫລືອຜູ້ປະສົບໄພ ກໍ່ຂໍຮຽກຮ້ອງຈະເປັນວັດຖຸ ຫລື ເງິນສົດກໍ່ແລ້ວແຕ່ເງື່ອນໄຂຊຶ່ງພວກເຮົາໄດ້ສົມທົບກັບຫ້ອງວ່າການປົກຄອງແຂວງ ເປີດສູນຮັບບໍລິຈາກເຄື່ອຊ່ວຍເຫລືອ ຜູ້ປະສົບໄພຢູ່ ສະໂມສອນໃຫຍ່ ຂອງແຂວງ ແລະ ເປີດບັນຊີໄວ້ຢູ່ ສອງທະນາຄານຄື ທະນາຄານພັດທະນາລາວ ກັບ ທະນາຄານການຄ້າຕ່າງປະເທດລາວມະຫາຊົນ ຊຶ່ງລາຍລະອຽດຫ້ອງວ່າການເພິ່ນຈະເປັນຜູ້ເອົາລົງ.

ທ່ານ ຄຳເລົາ ແກ້ວລະກຳ ຫົວໜ້າພະແນກ ແຮງງານແລະ ສະຫວັດດີການສັງຄົມ ຮອງປະທານຄະນະກຳມະການຄຸ້ມຄອງໄພພິບັດ ແຂວງຫລວງນ້ຳທາ ເວົ້າໃຫ້ຮູ້ຕື່ມວ່າ: ໃນຕໍ່ໜ້າຈະໄດ້ຮຽກເອົາພາກສ່ວນຄະນະຄຸ້ມຄອງໄພພິບັດແຕ່ລະຂັ້ນ ທັງຂັ້ນແຂວງ ຂັ້ນເມືອງ ຂັ້ນບ້ານຕິດຕາມສະພາບດິນຟ້າອາກາດແຈ້ງໃຫ້ຄະນະໄພພິບັດແຕ່ລະຂັ້ນຫັ້ນຍົກສູງຄວາມຮັບຜິດຊອບຂອງຕົນເອງອີກ ປະກາດໃຫ້ພໍ່ແມ່ປະຊາຊົນຮັບຮູ້ ແລະ ເຂົ້າໃຈຕື່ມໃຫ້ຮັບຮູ້ເຖິງຜົນຮ້າຍຂອງໄພພິບັດທາງທຳມະຊາດ ໃຫ້ເຂົາເຈົ້າຍົກສູງສະຕິລະວັງຕົວຕື່ມ ແລະ ພວກເຮົາຈະໄດ້ປັບປຸງກົງຈັກການຈັດຕັ້ງໃຫ້ຂະຫຍາຍຕົວແລະເຂັ້ມແຂງຂື້ນຕື່ມໃນການເຝົ້າລະວັງໃນແຕ່ລະປີ.