ເຈົ້າໜ້າທີ່ປ່າໄມ້ແຂວງບໍລິຄໍາໄຊ ທຳລາຍຊິ້ນສ່ວນສັດປ່າຫວງຫ້າມ ຫລາຍກວ່າ 100 ກິໂລ

ວັນທີ 23 ກັນຍາ 2024, ກອງກວດກາປ່າໄມ້ປະຈໍາແຂວງ, ກຸ່ມວຽກກວດກາສັດປ່າ ແລະ ເຄື່ອງປ່າຂອງດົງ ພະແນກກະສິກໍາ ແລະ ປ່າໄມ້ ແຂວງບໍລິຄໍາໄຊ ໄດ້ທໍາລາຍຊິ້ນສ່ວນສັດປ່າທີ່ຢຶດໄດ້ ຄື: ສັດປ່າ 64 ໂຕ ແລະ ຊິ້ນສ່ວນໝູປ່າ ນໍ້າໜັກ 58 ກິໂລ ລວມທັງໝົດ 107,5 ກິໂລ ມາທຳລາຍຖິ້ມໂດຍການຝັງດິນ.

ທ່ານ ພັດທະຈອນ ແກ້ວພຸດທະວົງ ຫົວໜ້າພະແນກກະສິກໍາ ແລະ ປ່າໄມ້ແຂວງ ກ່າວວ່າ: ໄລຍະ 3 ເດືອນຜ່ານມາ ທາງເຈົ້າທີ່ກວດກາປ່າໄມ້ແຂວງ ໄດ້ລົງສົມທົບໜ່ວຍງານກວດກາປ່າໄມ້ເມືອງທ່າພະບາດ, ປາກກະດິງ ແລະ ເມືອງວຽງທອງ ເພື່ອກວດກາການລັກລອບ ຊື້-ຂາຍສັດນໍ້າ ແລະ ສັດປ່າ ຕາມຕະຫລາດພາຍໃນເມືອງດັ່ງກ່າວ ແລະ ຈຸດຕ່າງໆ ກວດພົບເຫັນສັດປ່າທີ່ຍັງມີຊີວິດປະເພດ ແລນ 10 ໂຕ ນໍ້າໜັກ 21 ກິໂລ, ກະຮອກ 1 ໂຕ, ກະທ້າງ 5 ໂຕ, ເຕົ່າ 1 ໂຕ ແລະ ກວດພົບຊິ້ນສ່ວນສັດຕາຍມີຄື: ຊິ້ນສ່ວນໝູປ່າ 58 ກິໂລ, ເຫງັນ 2 ໂຕ, ຫອນ 1 ໂຕ, ກະທ້າງ 8 ໂຕ, ອົ້ນ 1 ໂຕ ແລະ ກະຮອກ 35 ໂຕ ແລ້ວນຳມາທໍາລາຍ.