ຮອງນາຍົກລັດຖະມົນຕີ ເຂົ້າຮ່ວມກອງປະຊຸມສຸດຍອດວ່າດ້ວຍອະນາຄົດ ຢູ່ນິວຢອກ ສ. ອາເມຣິກາ

ວັນທີ 23 ກັນຍາ 2024, ​ທ່ານ ສະເຫລີມໄຊ ກົມມະສິດ ຮອງນາຍົກລັດຖະມົນຕີ,​ ລັດຖະມົນຕີກະຊວງການຕ່າງປະເທດ ພ້ອມດ້ວຍຄະນະຜູ້ເເທນ ສປປ ລາວ ໄດ້ສືບຕໍ່ເຂົ້າຮ່ວມກອງປະຊຸມສຸດຍອດວ່າດ້ວຍອະນາຄົດ ທີ່ສໍານັກງານໃຫຍ່ ອົງການສະຫະປະຊາຊາດ,​ ທີ່ ນິວຢອກ, ສ. ອາເມຣິກາ ເປັນມື້ທີ2.

ທ່ານ ຮອງນາຍົກລັດຖະມົນຕີ ໄດ້ປະກອບຄໍາເຫັນໃນພາກສົນທະນາ ພາຍໃຕ້ຫົວຂໍ້ທີ 3: ກ້າວໄປສູ່ອະນາຄົດດ້ານດີຈິຕອນ ຮ່ວມກັນ: ຮັດແໜ້ນການຮ່ວມມື ເເລະ ນະວັດຕະກໍາ ທີ່ກວມລວມ ເພື່ອຮັດເເຄບຊ່ອງວ່າງທາງດ້ານດີຈິຕອນ ຊຶ່ງເປັນໜຶ່ງໃນ 4 ຫົວຂໍ້ ຂອງພາກສົນທະນາທີ່ດໍາເນີນຄູ່ຂະໜານກັບກອງປະຊຸມຄົບຄະນະ. ພ້ອມທັງເນັ້ນຢ້ຳເຖິງບົດບາດຄວາມສໍາຄັນຂອງນະວັດຕະກໍາດີຈີຕອນ ໃນການຊ່ວຍເລັ່ງລັດການບັນລຸວາລະ 2030 ເພື່ອການພັດທະນາແບບຍືນຍົງ ກໍຄືການສະໜັບສະໜູນການພັດທະນາເສດຖະກິດ-ສັງຄົມຂອງປະເທດຕ່າງໆ ໂດຍສະເພາະກຸ່ມປະເທດທີ່ມີເງື່ອນໄຂພິເສດ (Group of countries in special situations) ໄດ້ມີຄວາມພະຍາຍາມເພື່ອນຳໃຊ້ເຕັກໂນໂລຊີດ້ານດິຈິຕອນ ແຕ່ກໍຍັງມີຄວາມເເຕກໂຕນກັນຫລາຍໃນການຫັນປ່ຽນທາງດ້ານດີຈິຕອນ ຊຶ່ງຕ້ອງໄດ້ແກ້ໄຂອຸປະສັກກີດຂວາງຕ່າງໆ.

ພ້ອມນັ້ນ, ກໍໄດ້ຍົກໃຫ້ເຫັນວ່າ ລັດຖະບານ ສປປ ລາວ ໄດ້ໃຫ້ຄວາມສຳຄັນຕໍ່ວິທະຍາສາດ, ເຕັກໂນໂລຊີ ເເລະ ນະວັດຕະກໍາ ທີ່ເປັນເຄື່ອງມືອັນສຳຄັນ ສຳລັບການຜ່ານຜ່າສິ່ງທ້າທາຍໃນບັດຈຸບັນ ແລະ ການພັກດັນການພັດທະນາປະເທດຊາດ ເພື່ອກ້າວໄປສູ່ການເຕີບໂຕສີຂຽວ ແລະ ເສດຖະກິດດີຈິຕອນ ພ້ອມທັງໄດ້ຮຽກຮ້ອງໃຫ້ມີການເພີ່ມທະວີການຮ່ວມມືສາກົນ, ເປັນຕົ້ນເເມ່ນຂອບການຮ່ວມມືລະຫວ່າງປະເທດທີ່ພັດທະນາແລ້ວ ແລະ ປະເທດກຳລັງພັດທະນາ (ເໜືອ-ໃຕ້), ລະຫວ່າງປະເທດກຳລັງພັດທະນາດ້ວຍກັນ (ໃຕ້-ໃຕ້) ເເລະ ການຮ່ວມມືສາມຝ່າຍ ເພື່ອຮັດເເຄບຊ່ອງວ່າງທາງດ້ານດີຈິຕອນ ໂດຍສະເພາະການພັດທະນາພື້ນຖານໂຄງລ່າງດ້ານດີຈິຕອນ ແລະ ຊັບພະຍາກອນມະນຸດ, ການແລກປ່ຽນບົດຮຽນທີ່ດີໃນຂະແໜງການດັ່ງກ່າວ ແລະ ການສົ່ງເສີມການຖ່າຍທອດເຕັກໂນໂລຊີ ກໍຄືການເພີ່ມທະວີການລົງທຶນໃນຂະແໜງສຶກສາຂັ້ນສູງ, ການຄົ້ນຄວ້າ ແລະ ການພັດທະນາ.

 ຂ່າວ: ກະຊວງການຕ່າງປະເທດ