ປີ 2024 ສປປ ລາວ ຖືກຜົນກະທົບນໍ້າຖ້ວມ 15 ແຂວງ ມີຜູ້ເສຍຊີວິດ 10 ຄົນ ແລະ ສູນຫາຍ 2 ຄົນ

ວັນທີ 24 ກັນຍາ 2024, ຄະນະກໍາມະການຄຸ້ມຄອງໄພພິບັດຂັ້ນສູນກາງ ໄດ້ຈັດກອງປະຊຸມປຶກສາຫາລື ກ່ຽວກັບການແກ້ໄຂໄພພິບັດນໍ້າຖ້ວມ ປະຈຳປີ 2024 ຢູ່ບັນດາແຂວງໃນລາວ, ມີ ພົນເອກ ຈັນສະໝອນ ຈັນຍາລາດ ຮອງນາຍົກລັດຖະມົນຕີ, ລັດຖະມົນຕີກະຊວງປ້ອງກັນປະເທດ ປະທານຄະນະກໍາມະການຄຸ້ມຄອງໄພພິບັດຂັ້ນສູນກາງ ເປັນປະທານ.

ທ່ານ ວົງຄໍາ ພັນທະນຸວົງ ຫົວໜ້າກອງເລຂາຄະນະກຳມະການຄຸ້ມຄອງໄພພິບັດຂັ້ນສູນກາງ ລາຍງານວ່າ: ນັບແຕ່ວັນທີ 18 ກໍລະກົດ 2024 ຮອດປັດຈຸບັນ, ລາວເຮົາ ໄດ້ຮັບຜົນກະທົບຈາກພາຍຸ 4 ຫົວຄື: ພາຍຸດີເປຣຊັນ, ພາຍຸໝູນເຂດຮ້ອນພຣະພິຣຸນ, ພາຍຸໄຕ້ຝຸ່ນຢາກິ, ພາຍຸຊູລິກ ລວມມີ 15 ແຂວງ ທີ່ຖືກຜົນກະທົບ ຄື: ນະຄອນຫລວງວຽງຈັນ, ຜົ້ງສາລີ, ຫລວງນໍ້າທາ, ບໍ່ແກ້ວ, ໄຊຍະບູລີ, ຫົວພັນ, ຊຽງຂວາງ, ອຸດົມໄຊ, ຫລວງພະບາງ, ໄຊສົມບູນ, ວຽງຈັນ, ບໍລິຄຳໄຊ, ຄໍາມ່ວນ, ສາລະວັນ ແລະແຂວງ ເຊກອງ.

ອີງຕາມຂໍ້ມູນຄະນະກຳມະການຄຸ້ມຄອງໄພພິບັດຂັ້ນແຂວງລາຍງານຜົນກະທົບວ່າ ຮອດວັນທີ 24 ກັນຍາ 2024, ລວມທັງໝົດ 125 ເມືອງ, ມີ 1,337 ບ້ານ; 50,889 ຄອບຄົວ, ປະຊາຊົນຖືກຜົນກະທົບ 200,000 ກວ່າຄົນ, ເສຍຊີວິດ 10 ຄົນ, ສູນຫາຍ 2 ຄົນ, ເຮືອນໄດ້ຮັບຄວາມເສຍຫາຍ 969 ຫລັງ, ໃນນີ້: ມີເຮືອນ137 ຫລັງເສຍຫາຍໝົດຫລັງ, 832 ຫລັງ ເສຍຫາຍບາງສ່ວນ, ເນື້ອທີ່ທໍາການຜະລິດຖືກກະທົບ ເກືອບ 30,000 ເຮັກຕາ, ຊົນລະປະທານ 125 ແຫ່ງ, ໜອງປາ 697 ໜອງ, ສັດໃຫຍ່ ແລະ ສັດປີກຫຼາຍກວ່າ 11.860 ໂຕ; ເສັ້ນທາງ 272 ເສັ້ນ, ຂົວ 14 ແຫ່ງ, ໂຮງຮຽນ 79 ຫລັງ, ໂຮງໝໍແຂວງ 1 ແຫ່ງ, ສຸກສາລາ 13 ແຫ່ງ, ນໍ້າລິນ 37 ແຫ່ງ, ເສົາໄຟຟ້າ 312 ເສົາ, ລະບົບນໍ້າປະປາ 6 ຈຸດ.

ນອກນີ້, ຍັງມີລະບົບໂທລະຄົມ, ອາຄານສໍານັກງານຫ້ອງການຂອງລັດ-ເອກະຊົນ, ຮ້ານຄ້າ, ໂຮງງານ, ຕະຫລາດ ແລະ ພາຫະນະ ກໍໄດ້ຮັບຜົນກະທົບຫລາຍສົມຄວນ, ຄາດຄະເນມູນຄ່າຜົນເສຍຫາຍເບື້ອງຕົ້ນ 720 ຕື້ກວ່າກີບ. ສໍາລັບແຂວງທີ່ໄດ້ຮັບຜົນກະທົບຫລາຍກວ່າໝູ່ແມ່ນແຂວງຫລວງນໍ້າທາ ແລະ ນະຄອນຫລວງວຽງຈັນ.

ໂອກາດນີ້, ພົນເອກ ຈັນສະໝອນ ຈັນຍາລາດ ໄດ້ຊີ້ນຳໃຫ້ຄະນະກໍາມະການຄຸ້ມຄອງໄພພິບັດ ແລະ ພາກສ່ວນທີ່ກ່ຽວຂ້ອງຕ່າງໆເອົາໃຈຍົກສູງຄວາມຮັບຜິດຊອບຂອງຕົນເປັນໜ້າທີ່ສຳຄັນ, ມີແບບແຜນ, ມີການປະສານສົບທົບກັນຢ່າງລະອຽດໃນແຕ່ລະຂັ້ນເພື່ອແກ້ໄຂໃຫ້ທວງທັນເວລາ, ສືບຕໍ່ໂຄສະນາຕິດຕາມການປ່ຽນແປງຂອງສະພາບອາກາດ ເພື່ອແຈ້ງເຕືອນໃຫ້ປະຊາຊົນ ມີສະຕິລະວັງຕົວປ້ອງກັນລ່ວງໜ້າຢ່າງເປັນເຈົ້າການ, ຄະນະກຳມະການຄຸ້ມຄອງໄພພິບັດແຕ່ລະຂັ້ນນັບແຕ່ຂັ້ນສູນກາງ ຮອດຂັ້ນທ້ອງຖິ່ນ ຕ້ອງກຽມຄວາມພ້ອມຮອບດ້ານເພື່ອຮັບມື ແລະ ແກ້ໄຂຟື້ນຟູ, ສ້ອມແປງຢ່າງຮີບດ່ວນ ໃນການຊ່ວຍເຫຼືອດ້ານຕ່າງໆຕໍ່ບັນດາແຂວງທີ່ໄດ້ຖືກຜົນກະທົບຈາກໄພພິບັດນ້ຳຖ້ວມໃຫ້ກັບມາສູ່ສະ ພາບປົກກະຕິໃຫ້ໄດ້ໄວທີ່ສຸດ.

ຂ່າວ: ປະຊາຊົນ