ທ່ານ ນາຍົກລັດຖະມົນຕີ ແລະ ຄະນະ ສືບຕໍ່ເຄື່ອນໄຫວໃນກອງປະຊຸມພາກອະພິປາຍທົ່ວໄປຂອງສະມັດຊາໃຫຍ່ ອົງການສະຫະປະຊາຊາດ ສະໄໝທີ 79 ແລະ ກອງປະຊຸມປິ່ນອ້ອມ
ວັນທີ 26 ກັນຍາ 2024 ທ່ານ ສອນໄຊ ສີພັນດອນ, ນາຍົກລັດຖະມົນຕີ ເເຫ່ງ ສປປ ລາວ ໄດ້ນໍາພາຄະນະຜູ້ເເທນ ເຂົ້າຮ່ວມກອງປະຊຸມສະມັດຊາໃຫຍ່ ອົງການ ສະຫະປະຊາຊາດ (ສປຊ) ສະໄໝທີ 79, ທີ່ ນິວຢອກ, ສ. ອາເມລິກາ. ພິເສດ, ທ່ານ ນາຍົກລັດຖະມົນຕີ ໄດ້ພົບປະ ກັບ ທ່ານ ເອັນໂຕນິໂອ ກຸເຕເຣັສ, ເລຂາທິການໃຫຍ່ ອົງການ ສປຊ ເຊິ່ງທ່ານນາຍົກລັດຖະມົນຕີ ໄດ້ສະເເດງຄວາມຂອບໃຈ ເເລະ ຕີລາຄາສູງ ຕໍ່ສາຍພົວພັນການຮ່ວມມື ລະຫວ່າງ ສປປ ລາວ ເເລະ ອົງການ ສປຊ, ໂດຍສະເພາະເເມ່ນການຊ່ວຍເຫຼືອ ໃນການເເກ້ໄຂບັນຫາລະເບີດບໍ່ທັນເເຕກ (UXO) ເຊິ່ງ ສປປ ລາວ ເເລະ ອົງການ ສປຊ ໄດ້ມີ ເເຜນການຮ່ວມມືຍຸດທະສາດ ນັບຕັ້ງເເຕ່ປີ 2003 ເປັນຕົ້ນມາ. ໃນໂອກາດດຽວກັນນີ້, ທ່ານ ນາຍົກລັດຖະມົນຕີ ເເລະ ທ່ານ ເລຂາທິການໃຫຍ່ ໄດ້ເເລກປ່ຽນ ກ່ຽວກັບການເປັນປະທານອາຊຽນຂອງ ສປປ ລາວ, ສະພາບການໃນ ມຽນມາ ໃນຖານະການເປັນປະທານ ອາຊຽນ ຂອງ ສປປ ລາວ ໃນ ປີ 2024 ລວມທັງສະຖານະການໄພພິບັດທາງທໍາມະຊາດ ທີ່ກໍາລັງເກີດຂຶ້ນຢູ່ ສປປ ລາວ. ຕໍ່ກັບບັນຫາດັ່ງກ່າວ, ທ່ານ ເລຂາທິການໃຫຍ່ ໄດ້ໃຫ້ຄໍາໝາຍໝັ້ນທີ່ຈະສືບຕໍ່ສະໜັບສະໜູນ ເເລະ ຊ່ວຍເຫຼືອ ສປປ ລາວ ໃນການເກັບກູ້ລະເບີດບໍ່ທັນເເຕກ ເເລະ ໄດ້ສະເເດງຄວາມຊົມເຊີຍ ຕໍ່ການເປັນປະທານອາຊຽນ ລວມທັງຄວາມພະຍາຍາມ ຂອງ ສປປ ລາວ ໃນການຫຼຸດພົ້ນອອກຈາກສະຖານະພາບປະເທດດ້ອຍພັດທະນາ. ທ່ານ ເລຂາທິການໃຫຍ່ ໄດ້ຢໍ້າຄືນວ່າອົງການ ສປຊ ຈະສືບຕໍ່ເພີ່ມທະວີການຊ່ວຍເຫຼືອ ເເລະ ລະດົມທຶນຮອນ ເພື່ອຊ່ວຍບັນດາປະເທດກຳລັງພັດທະນາ ທີ່ບໍ່ມີຊາຍເເດນຕິດທະເລ ໃຫ້ສາມາດຈັດຕັ້ງປະຕິບັດເປົ້າໝາຍການພັດທະນາເເບບຍຶນຍົງ ໄດ້ຕາມຄາດໝາຍ, ພ້ອມທັງຈະເພີ່ມທະວີການຊ່ວຍເຫລືອໃນດ້ານຂອງການເຊື່ອມຈອດໃຫ້ຫລາຍຂຶ້ນກວ່າເກົ່າ ແລະ ຈະສືບຕໍ່ຜັນຂະຫຍາຍການຮ່ວມມືລະຫວ່າງ ສປປ ລາວ – ອົງການ ສປຊ ແລະ ພາກພື້ນໃຫ້ນັບມື້ນັບເກີດດອກອອກຜົນ.
ທ່ານ ນາຍົກລັດຖະມົນຕີ ກໍຍັງໄດ້ພົບປະສອງຝ່າຍກັບ ທ່ານ ເຄ ພີ ຊາມາ ໂອລິ, ນາຍົກລັດຖະມົນຕີ ເເຫ່ງ ເນປານ ເຊິ່ງທ່ານ ນາຍົກລັດຖະມົນຕີ ແຫ່ງ ສປປ ລາວ ໄດ້ສະແດງຄວາມຊົມເຊີຍຕໍ່ກັບ ສາຍພົວພັນມິດຕະພາບອັນຍາວນານຂອງທັງສອງປະເທດ ນັບແຕ່ການສ້າງຕັ້ງສາຍພົວພັນການທູດນຳກັນ ໃນວັນທີ 20 ພຶດສະພາ 1970 ເປັນຕົ້ນມາ ເຊິ່ງມີບາດກ້າວຂະຫຍາຍຕົວຢ່າງຕໍ່ເນື່ອງ ສະແດງອອກໃນການພົບປະກັນຂອງການນໍາຂັ້ນສູງສອງປະເທດ ແລະ ການສະໜັບສະໜຸນເຊິ່ງກັນ ແລະ ກັນ ໃນເວທີກອງປະຊຸມສາກົນຕ່າງໆ.
ພ້ອມດຽວກັນນີ້, ທ່ານ ນາຍົກລັດຖະມົນຕີ ແຫ່ງ ສປປ ລາວ ກໍໄດ້ແລກປ່ຽນກ່ຽວກັບ ແນວທາງໃນການເສີມຂະຫຍາຍການ ຮ່ວມມືໃນຕໍ່ໜ້າ ໂດຍສະເພາະຕິດພັນກັບການລົງທຶນທາງດ້ານການຄ້າ, ການສົ່ງເສີມການທ່ອງທ່ຽວ ແລະ ການພັດທະນາຂົງເຂດອື່ນໆ ທີ່ເປັນທ່າແຮງຂອງທັງສອງປະເທດ. ພ້ອມກັນນີ້, ທ່ານ ນາຍົກລັດຖະມົນຕີ ແຫ່ງ ສປປ ລາວ ຍັງໄດ້ສະເໜີໃຫ້ມີການແລກປ່ຽນບົດຮຽນ ແລະ ຂໍ້ມູນລະຫວ່າງສອງປະເທດ ກ່ຽວກັບ ຂະບວນການກະກຽມຄວາມພ້ອມ ເພື່ອຫຼຸດພົ້ນອອກຈາກສະຖານະພາບປະເທດດ້ອຍພັດທະນາ ໃນປີ 2026.
ໃນຕອນບ່າຍຂອງວັນດຽວກັນ ທ່ານ ນາຍົກລັດຖະມົນຕີ ກໍຍັງໄດ້ພົບປະກັບ ທ່ານ ຈີອານີ້ ອິນຟານທີໂນ້, ປະທານສະມາຄົມສະຫະພັນບານເຕະສາກົນ ເພື່ອປຶກສາຫາລືກ່ຽວກັບ ການຮ່ວມມືລະຫວ່າງ ລັດຖະບານແຫ່ງ ສປປ ລາວ ກໍຄື ສະຫະພັນບານເຕະແຫ່ງຊາດລາວ ແລະ FIFA ແລະ ຂອບການຮ່ວມມືໃນລະດັບພາກພື້ນ ກໍຄື ອາຊຽນ. ທ່ານ ປະທານ FIFA ກໍຖືືໂອກາດດັ່ງກ່າວ ຢໍ້າຄືນຄວາມພ້ອມທີ່ຈະສືບຕໍ່ຮ່ວມມືກັບ ສປປ ລາວ ຢ່າງຮອບດ້ານ ໂດຍສະເພາະການສະໜັບສະໜູນ ແລະ ພັດທະນາພື້ນຖານໂຄງລ່າງທີ່ຈຳເປັນຢູ່ໃນຂອບເຂດທົ່ວປະເທດ ຊຶ່ງນອກຈາກໂຄງການສ້າງສູນຝຶກແລ້ວ ຍັງຈະສົ່ງເສີມການນຳໃຊ້ກິລາບານເຕະເຂົ້າໃນໂຮງຮຽນໃຫ້ຫຼາຍຂຶ້ນ ເພື່ອນຳໃຊ້ເປັນເຄື່ອງມືສ້າງຄ່ານິຍົມ ແລະ ການເຄົາລົບຕໍ່ລະບຽບອັນຖືກຕ້ອງ ສຳລັບເດັກນ້ອຍທີ່ຈະເຕີບໃຫຍ່ ແລະ ສືບຕໍ່ປະກອບສ່ວນເຂົ້າໃນວົງການກິລາບານເຕະໃນອະນາຄົດ.
ສຳລັບການເຄື່ອນໄຫວຂອງຄະນະຕິດຕາມ, ໃນວັນທີ 26 ທ່ານ ສະເຫຼີມໄຊ ກົມມະສິດ, ຮອງນາຍົກລັດຖະມົນຕີ, ລັດຖະມົນຕີກະຊວງການຕ່າງປະເທດ ໄດ້ໃຫ້ສໍາພາດກັບສໍານັກຂ່າວ China Global Television Network ຂອງ ສປ ຈີນ ກ່ຽວກັບເເຜນພັດທະນາເສດຖະກິດ-ສັງຄົມຂອງ ສປປ ລາວ, ການຊຸກຍູ້ສົ່ງເສີມສັນຕິພາບ ເເລະ ການຮ່ວມມືໃນພາກພື້ນອາຊີຕາເວັນອອກສ່ຽງໃຕ້, ໂຄງການລົດໄຟ ລາວ-ຈີນ ເເລະ ທ່າຂະຫຍາຍໃນການຮ່ວມມືກັບ ສປ ຈີນ.
ພ້ອມກັນນັ້ນ, ທ່ານ ນ. ບຸນຄໍາ ວໍລະຈິດ, ລັດຖະມົນຕີກະຊວງຊັບພະຍາກອນທໍາມະຊາດ ເເລະ ສິ່ງເເວດລ້ອມ ໄດ້ເຂົ້າຮ່ວມກອງປະຊຸມແຜນງານ 1.5 (Roadmap to Mission 1.5) ໂດຍທ່ານ ລັດຖະມົນຕີ ໄດ້ແຈ້ງໃຫ້ກອງປະຊຸມຊາບກ່ຽວກັບການຈັດຕັ້ງບັນດາສົນທິສັນຍາສາກົນ, ຂໍ້ຕົກລົງສາກົນ ລວມທັງການ ປະຕິບັດແຜນງານແຫ່ງຊາດ ເພື່ອຕອບສະໜອງໃຫ້ແກ່ການບັນລຸແຜນ 1.5 ໂດຍສະເພາະການປະກອບສ່ວນ ແລະ ການລົງນາມເອກະສານຕ່າງໆຂອງອາຊຽນໃນນາມການເປັນປະທານຂອງ ສປປ ລາວ 2024 ແລະ ການຈັດຕັ້ງປະຕິບັດແຜນງານພາຍໃຕ້ສັນຍາປາຣີ.
ນອກຈາກນັ້ນ, ທ່ານ ປອ. ໄພວັນ ເເກ້ວປະເສີດ, ຮອງລັດຖະມົນຕີກະຊວງສາທາລະນະສຸກ ໄດ້ເຂົ້າຮ່ວມກອງປະຊຸມວ່າດ້ວຍການທົນທານຕໍ່ຢາຕ້ານເຊື້ອຈຸລິນຊີ, ເຊິ່ງໄດ້ຈັດຂຶ້ນ ພາຍໃຕ້ຫົວຂໍ້ “ການລົງທຶນໃນປະຈຸບັນ ເເລະ ການຮັບປະກັນອະນາຄົດຮ່ວມກັນ: ເລັ່ງລັດການຈັດຕັ້ງປະຕິບັດໃນລະດັບປະເທດ, ພາກພື້ນ ເເລະ ສາກົນ ເພື່ອເເກ້ໄຂບັນຫາ ເຊື້ອຈຸລິນຊີທີ່ທົນທານຕໍ່ຢາ”.
ໃນວັນດຽວກັນນີ້, ທ່ານ ທອງຜ່ານ ສະຫວັນເພັດ, ຮອງລັດຖະມົນຕີກະຊວງການຕ່າງປະເທດ ກໍ່ໄດ້ເຂົ້າຮ່ວມກອງປະຊຸມລັດຖະມົນຕີຂອງກຸ່ມປະເທດດ້ອຍພັດທະນາ, ກອງປະຊຸມລັດຖະມົນຕີຕ່າງປະເທດ ຂອບການຮ່ວມມືເວທີປຶກສາຫາລື ແຫ່ງ ອາຊີ (ACD) ເເລະ ກອງປະຊຸມລັດຖະມົນຕີຂອງກຸ່ມປະເທດດ້ອຍພັດທະນາທີ່ບໍ່ມີຊາຍເເດນຕິດກັບທະເລ ຄັ້ງທີ 23, ພ້ອມທັງໄດ້ພົບປະສອງຝ່າຍກັບຄູ່ຮ່ວມຕໍາແໜ່ງ ທ່ານ ເເດນ ຄິດເຕີນບິ້ງ, ຮອງລັດຖະມົນຕີກະຊວງການຕ່າງປະເທດ ສ. ອາເມລິກາ ເພື່ອປຶກສາຫາລືຫລາຍຫົວຂໍ້ປິ່ນອ້ອມເປັນຕົ້ນແມ່ນການສົ່ງເສີມການຮ່ວມມື ແມ່ນ້ຳຂອງ-ສ.ອາເມລິກາ (Mekong-US Partnership ), ເຊິ່ງທ່ານ ຮອງລັດຖະມົນຕີກະຊວງການ ຕ່າງປະເທດ ສ. ອາເມລິກາ ໄດ້ສະແດງຄວາມຊົມເຊີຍ ສປປ ລາວ ໃນການປະຕິບັດໜ້າທີ່ເປັນປະທານອາຊຽນໃນປີນີ້ ພ້ອມທັງຢືນຢັນຄຳໝາຍໝັ້ນເພື່ອເສີມຂະຫຍາຍການເປັນຄູ່ຮ່ວມມືແບບຮອບດ້ານລະຫວ່າງສອງປະເທດ.
