ພົບລະເບີດບໍ່ທັນແຕກ ຢູ່ບ້ານນາໝໍ້ເໜືອ ແລະ ນາໝໍ້ໃຕ້ ແຂວງອຸດົມໄຊ

ຄະນະທີມງານຄຸ້ມຄອງ ເພື່ອແກ້ໄຂລະເບີດບໍ່ທັນແຕກ ແຂວງອຸດົມໄຊ ລາຍງານວ່າ: ວັນທີ 1 ຕຸລາ 2024 ໄດ້ຮັບແຈ້ງຈາກປະຊາຊົນບ້ານນາໝໍ້ເໜືອ ແລະ ນາໝໍ້ໃຕ້ ເມືອງນາໝໍ້ ວ່າພົບເຫັນລະເບີດບໍ່ທັນແຕກ ຢູ່ພາຍໃນພື້ນທີ່ຂອງບ້ານ, ສະນັ້ນ, ທາງເມືອງຈິ່ງແຕ່ງຕັ້ງຄະນະຮັບຜິດຊອບ 6 ຂະແໜງການທີ່ກ່ຽວຂ້ອງຄື: ປກສ, ປກຊ, ຫ້ອງວ່າການ, ຮສສ, ພາຍໃນ ແລະ ຍທຂ ເຂົ້າກວດກາພື້ນທີ່ຕົວຈິງ.

ຜ່ານການກວດກາ ພົບລະເບີດບໍ່ທັນແຕກ ທັງໝົດ 4 ໜ່ວຍ, ໃນນີ້ຢູ່ບ້ານນາໝໍ້ໃຕ້ 1 ໜ່ວຍ ເປັນປະເພດ ລູກປືນຄົກ 82 ມມ ,ໜັກ 2.8 ກິໂລ ແລະ ຢູ່ບ້ານນາໝໍ້ເໜືອ 3 ໜ່ວຍ ເປັນປະເພດ ລູກປືນຄົກ 60 ມມ 2 ໜ່ວຍ, ໜັກ 2.4 ກິໂລ ແລະ ມິ່ນທິດ 1 ໜ່ວຍ,ໜັກ 2 ກິໂລ, ຫລັງຈາກນັ້ນ ຄະນະທີມງານຄຸ້ມຄອງ ເພື່ອແກ້ໄຂລະເບີດບໍ່ທັນແຕກ ໄດ້ກວດກາ ແລະ ປັກຫລັກໝາຍຂອບເຂດທີ່ມີຄວາມສ່ຽງທີ່ອາດຈະມີລະເບີດບໍ່ທັນແຕກຕົກຄ້າງຢູ່ ພ້ອມທັງແຈ້ງ ແລະ ຫ້າມບໍ່ໃຫ້ປະຊາຊົນໄປທຳການຜະລິດໃນຂອບເຂດດັ່ງກ່າວ ຈົນກວ່າຈະມີການກວດກາລະອຽດສຳເລັດ.

ສ່ວນລະເບີດທີ່ພົບໃນຄັ້ງນີ້ພາກສ່ວນກ່ຽວຂ້ອງໄດ້ເກັບກູ້ອອກ ແລ້ວນໍາໄປເກັບມ້ຽນໄວ້ຢູ່ບ່ອນປອດໄພເປັນທີຮຽບຮ້ອຍແລ້ວ.