1 ປີສົງຄາມກາຊາ ຫລາຍປະເທດຊຸມນຸມຕໍ່ຕ້ານ-ສະໜັບສະໜູນອິດສະລາແອນ

       ປະຊາຊົນຫລາຍເມືອງໃຫຍ່ທົ່ວໂລກອອກມາຮ່ວມການຊຸມນຸມໃນທ້າຍອາທິດຜ່ານມາ ເພື່ອຕໍ່ຕ້ານ ແລະ ສະໜັບສະໜູນອິດສະລາແອນໃນການລະນຶກຄົບຮອບ 1 ປີ ເຫດການກຸ່ມຮາມັດບຸກໂຈມຕີອິດສະລາແອນ ແລະ ການເຮັດສົງຄາມຢູ່ເຂດກາຊາທີ່ເລີ່ມຂຶ້ນໃນວັນທີ 7 ຕຸລາປີຜ່ານມາ.

      ໂດຍຢູ່ອາເມລິກາ ມີກຸ່ມຜູ້ສະໜັບສະໜູນປາແລັສຕິນອອກມາເດີນຂະບວນຢູ່ໜ້າທໍານຽບຂາວໃນນະຄອນຫລວງວໍຊິງຕັນ ຮຽກຮ້ອງລັດຖະບານອາເມລິກາໃຫ້ຢຸດການສະໜັບສະໜູນ ແລະ ຊ່ວຍເຫລືອອິດສະລາແອນໃນການຂ້າລ້າງເຜົ່າພັນຊາວປາແລັສຕິນ ແລະ ເຮັດສົງຄາມຢູ່ລີບັງ.

      ຂະນະທີ່ຢູ່ນະຄອນນິວຢ໋ອກມີກຸ່ມຜູ້ສະໜັບສະໜູນອິດສະລາແອນອອກມາຮ່ວມຊຸມນຸມຮຽກຮ້ອງໃຫ້ມີການປ່ອຍຕົວປະກັນອີກ 100 ກວ່າຄົນທີ່ຍັງຖືກກັກຂັງຢູ່ເຂດກາຊາ.

      ສ່ວນຢູ່ອົດສະຕຣາລີ ມີກຸ່ມຜູ້ສະໜັບສະໜູນປາແລັສຕິນຫລາຍພັນຄົນໃນນະຄອນເມວເບິນ ແລະ ອີກຫລາຍເມືອງ ຮ່ວມເດີນຂະບວນຕໍ່ຕ້ານການເຮັດສົງຄາມຢູ່ເຂດກາຊາ ແລະ ໄວ້ອາໄລຜູ້ເສຍຊີວິດຫລາຍໝື່ນຄົນ.