ນາຍົກລັດຖະມົນຕີ ຫວຽດນາມ ເຂົ້າພົບປະ ປະທານສະພາແຫ່ງຊາດ
ວັນທີ 8 ຕຸລາ 2024 ທີ່ສະພາແຫ່ງຊາດ, ທ່ານ ໄຊສົມພອນ ພົມວິຫານ ປະທານສະພາແຫ່ງຊາດ ພ້ອມດ້ວຍຄະນະ ໄດ້ຕ້ອນຮັບ ທ່ານ ຟ່າມ ມິ່ງ ຈິງ (Phạm Minh Chính) ນາຍົກລັດຖະມົນຕີ ແຫ່ງ ສສ.ຫວຽດນາມ ພ້ອມດ້ວຍຄະນະ ເຂົ້າຢ້ຽມພົບປະໃນໂອກາດຢ້ຽມຢາມ ແລະ ເຂົ້າຮ່ວມກອງປະຊຸມສຸດຍອດອາຊຽນຄັ້ງທີ 44 ແລະ 45 ທີ່ ສປປລາວ ເປັນເຈົ້າພາບ.
ທ່ານ ໄຊສົມພອນ ພົມວິຫານ ໄດ້ຕີລາຄາສູງຕໍ່ການມາເຄື່ອນໄຫວວຽກງານຄັ້ງນີ້ ເຊິ່ງເປັນການຮັດ ແໜ້ນ ແລະ ເພີ່ມພູນຄູນສ້າງສາຍພົວພັນມິດຕະພາບອັນຍິ່ງໃຫຍ່, ຄວາມສາມັກຄີພິເສດ ແລະ ການຮ່ວມມືຮອບດ້ານ ລະຫວ່າງສອງພັກ, ສອງລັດ ແລະ ປະຊາຊົນສອງຊາດ ລາວ-ຫວຽດນາມ; ພິເສດການພົບປະສະພາແຫ່ງຊາດເທື່ອນີ້ ເປັນການສະໜັບສະໜູນ, ຊຸກຍູ້ໃຫ້ການພົວພັນຮ່ວມມືຂອງສອງອົງການນິຕິບັນຍັດສອງປະເທດ ມີການເສີມຂະຫຍາຍເປັນຮູບປະທຳຍິ່ງໆຂຶ້ນ ທັງເປັນການສະໜັບສະໜູນ ແລະ ໃຫ້ກໍາລັງໃຈແກ່ສະພາແຫ່ງຊາດໃນການເປັນປະທານກອງປະຊຸມສະມັດຊາໃຫຍ່ລັດຖະສະພາລະຫວ່າງຊາດອາຊຽນ ຄັ້ງທີ 45 ໄດ້ຮັບຜົນສໍາເລັດຕາມຈຸດປະສົງລະດັບຄາດໝາຍ.
ນອກນັ້ນ, ຍັງແຈ້ງໃຫ້ຊາບເຖິງການພົວພັນຮ່ວມມືລະຫວ່າງສອງອົງການນິຕິບັນຍັດ ທີ່ໄດ້ຮັບການເສີມຂະຫຍາຍທັງທາງກວ້າງ ແລະ ທາງເລິກສະເໝີມາ ທັງໃຫ້ຄຳໝັ້ນສັນຍາວ່າ ຈະຮ່ວມກັບບັນດາສະຫາຍຫວຽດນາມ ສືບຕໍ່ປົກປັກຮັກສາ ແລະ ເພີ່ມພູນຄູນສ້າງສາຍພົວພັນພິເສດທີ່ການນໍາຮຸ່ນກໍ່ຕັ້ງໄດ້ທະນຸຖະໜອມມາເປັນເວລາຫຼາຍທົດສະວັດ ແລະ ໄດ້ຮັບການເສີມຂະຫຍາຍໂດຍບັນດາການນໍາຮຸ່ນຕ່າງໆ, ບັນດານັກຮົບປະຕິວັດ ແລະ ປະຊາຊົນສອງຊາດ ທີ່ໄດ້ທຸ່ມເທດ້ວຍເຫື່ອ ແຮງເລືອດເນື້ອມາເປັນເວລາຍາວນານນັ້ນ ໄດ້ກາຍເປັນມໍລະດົກລວມອັນລໍ້າຄ່າຂອງສອງຊາດ, ເປັນກົດເກນແຫ່ງການຄົງຕົວ ແລະ ຂະຫຍາຍຕົວຂອງສອງປະເທດ ເປັນໜຶ່ງໃນບັນດາປັດໄຈຕັດສິນໄຊຊະນະຂອງການປະຕິ ວັດຂອງແຕ່ລະປະເທດ ໃຫ້ນັບມື້ນັບມີປະສິດທິຜົນ ແລະ ສວຍສົດງົດງາມຕະຫລອດໄປ.
ໂອກາດນີ້, ທ່ານ ຟ່າມ ມິ່ງ ຈິງ ໄດ້ແຈ້ງໃຫ້ຊາບໂດຍຫຍໍ້ຜົນສຳເລັດຂອງການພົບປະສອງຝ່າຍກັບທ່ານ ນາຍົກລັດຖະມົນຕີ ສອນໄຊ ສີພັນດອນ ເຊິ່ງໄດ້ຢືນຢັນຮ່ວມກັນຈະຈັດຕັ້ງຜັນຂະຫຍາຍບັນດາຂໍ້ຕົກລົງຂອງການນໍາຂັ້ນສູງຂອງສອງພັກ, ບັນດາຂໍ້ຕົກລົງຂອງສອງລັດຖະບານທີ່ຫາກໍໄດ້ຕົກລົງກັນ ເພື່ອເພີ່ມທະວີການພົວພັນຮ່ວມມືສອງຝ່າຍໃຫ້ເຊື່ອມຈອດກັນທາງດ້ານເສດຖະກິດ, ດ້ານການເງິນ, ດ້ານກົດໝາຍ, ດ້ານພື້ນຖານໂຄງລ່າງ, ດ້ານຄົມມະນາຄົມ, ດ້ານພະລັງງານ, ດ້ານໄຟຟ້າ, ດ້ານໂທລະຄົມ, ດ້ານການທ່ອງທ່ຽວ; ຊຸກຍູ້ ແລະ ລະດົມໃຫ້ບັນດາຄູ່ຮ່ວມມືສາກົນທີ່ເໝາະສົມ ເຂົ້າມາຮ່ວມມື, ລົງທຶນ ແລະ ສະໜັບສະໜູນບັນດາໂຄງການເຊື່ອມຕໍ່ທີ່ເປັນຍຸດທະສາດລະຫວ່າງສອງປະເທດ ໃຫ້ຫລາຍຂຶ້ນ.
